Kölfel 140:1-13

¹Ngeni ewe mi emweni chon köl: Echö än Tafit köl. Ai Samol mi Lapalap, kopwe angasaei seni aramas mi ngau, kopwe tümwünüei seni aramas mi mwäneson,

²chokewe mi ekiekietä föför mi ngau lon leluker o popuetä maun iteiten fansoun.

³Ra akkeni chönawer pwe a ken usun chönawen eman serepenit, nge ar kapas a usun chök poisonun serepenit.

⁴Ai Samol mi Lapalap, kopwe epeti seniei ekewe aramasangau. Kopwe tümwünüei seni aramas mi mwäneson, chokewe mi rawangauaei pwe üpwe chepetek.

⁵Aramas mi lamalamtekia ra aopala eu sär fän itei, ra ameresala ar kewe chew o soni ar kewe likatup aropen ewe al pwe repwe liapeniei.

⁶Üa kapas ngeni ewe Samol mi Lapalap, “En ai Kot.” Ai Samol mi Lapalap, kopwe aüselinga ai kewe tüngor pwe kopwe ümöümöch ngeniei.

⁷Ai Samol mi Lapalap ai Kot, en chon angasaeila mi pöchökül, ka epeti seniei feiengau lon maun.

⁸Ai Samol mi Lapalap, kosap mwütätä mochenin ekewe aramasangau, kopwe atai ar kewe rawangau.

⁹Chokewe mi pwelifeiliei ra chimwetä mökürer. Amwo ar kapasen eniweniw ngeniei epwe püsin küür.

¹⁰Amwo molien ekkei mi sarara epwe turutiu wor. Repwe katurulong lon ekewe pwang, nge resap chüen tosefäliwu.

¹¹Amwo ekewe chon etipisimwäli chon arur resap nonomotiu lon ewe fanü. Amwo feiengau epwe chekaiiti ewe aramas mi mwäneson.

¹²Üa silei pwe en ai Samol mi Lapalap ka peni ekewe mi wöüngau o eäni pwüng ngeni ekewe chon mwelele.

¹³Ellet, ekewe chon pwüng repwe mwareiti itom, ekewe mi wenechar repwe nonom fän mesom.