Kölfel 139:2-17

²Ka silei fansoun ai mottiu me ai ütä, ka silei ai ekiek kana me toau.

³Ka nenengeniei, lupwen üa angang, pwal lupwen üa asösö, ka silei ai kewe föför meinisin.

⁴Nengeni, mwen ai üsamwo kapas, en, ai Samol mi Lapalap, ka fen unusen silei mine üpwe apasa.

⁵Ka pweliei me lükisöküri pwal fän mesei, ka pwal iseis poum woi.

⁶Ei sokun silelap a fokun amwarar ngeniei, a pwal tekia ngeniei pwe üsap tongeni to won.

⁷Ia üpwe feila ie seni Ngünum? Nge ia üpwe süla ie seni fän mesom?

⁸Are üpwe feitä läng, en ka nom ikenan. Nge are üpwe kon lon lenien sotup, en ka pwal nom ikenan.

⁹Are üpwe ässila ngeni ötiu ewe ia akkar a tötä me ie, ika nonom lesopolan matau me lotou,

¹⁰en kopwe emweniei me ikenan, nge pöüifichum epwe amwöchüei.

¹¹Are üpwe apasa pwe rochopwak epwe pwölüeila, nge ewe saram ünüki epwe wiliti pwin,

¹²inamwo nge ewe rochopwak esap roch me reöm, nge pwin a saram usun lerän, pun rochopwak a usun chök saram me reöm.

¹³En ewe mi förätä masouen loi, en ka achufengeniei me lon letipen inei.

¹⁴Üa mwareituk, pokiten a amairü o amwarar om föri ei. Om kewe föför ra amwarar. Üa fokun sileöchü ei.

¹⁵Chün inisi resap mon senuk, lupwen üa för lemonomon o kachufengen lon ekewe leni mi alolol lon fanüfan.

¹⁶En ka fen künaei, lupwen esamwo wor uluuli. Iteiten ränin manauei meinisin, ka awora fän itei, ra fen mak lon noum puk mwen ar resamwo fis.

¹⁷Ai Samol mi Lapalap, om kewe ekiek ra fokun aüchea ngeniei. Ra kon fokun chomong.