Samu 139:2-17

²Namba pilyu dupwa peparae embame silini. Emba kamame nanesa karapalape nambame suu pilyu dupwa soo gisiliniko.

³Nambame yulu angi pilipi panda mee luu palu silini lao kando silini. Dee yulu peparae pipunu dupwa embame silini.

⁴Kamame pii ene laroli dupwa dopa larelyamo lao soo oto karene.

⁵Namba karapunu pisipunu palipunu dusipana embako karo kapa pilini. Embena porainya renge dokome namba kyawa minyuo karene.

⁶Embame namba apiyakale lao soo gisapinyi doko nambame soo nyero ingya nalyamo.

⁷Nambame embena imambu dokome silini doko yuu anda mende nee pilyandena papala kanda nalase lao parose? Emba anjalapona kara napindena dokona pao yalu pirusi?

⁸Yake panda pulyuo paroramo dokopa emba dokona karareko ingilyamo. Dee kumuo yuu koko paliru ramo dokopa emba dokona karareko ingilyamo.

⁹Namba neta pyakaenge dorena ingyuo yalu pyuo paronopape dee neta yalyingi dorena nanesale ingyuo paronopape

¹⁰embame dokonako karo namba nyiso lanyuo papiri ingilyamo.

¹¹Nambame iminjingi dokome namba karo dokona nyuo yalu pinya laope dee yangenge doko namba karo dokona iminjinya laope larolapuli kapa lapuli.

¹²Dopa lapuliko doŋo iminjingi doko emba keta iminja nao mee korakama ingyaro karamo. Iminjingi dokope yangenge dokope emba keta mende ingya nao mee yangenge dopaleko ingilyamo.

¹³Nambana yanenge dokona mende embame wasa naende kara nalyamo Embame namba anyinya rombanda dokona kimbu sera sera pyuo inginyi retee.

¹⁴Embena kingi lakandapenge dokoko nambame lakandelyo. Embame yulu peparae pilini dupwa wambumi kanda nange keyange wakasa dupwa pilini. Dupwa nambana mona dokona soo manjo karo.

¹⁵Nambana anyinya rombanda dokona nee pyuo andeyonopa kuli dupwa kimbu sera sera piyamo dokopa embame dokona palene lao soo karee.

¹⁶Namba manjapa nayamopa embame kando sii. Namba ene ando karo yuu gii kararole dupwa wambo embame sepala embena buku dokona pyao retee.

¹⁷O Anatu, embena suu pingi dupwa nambame randa koo nao soo nyerolyamo. Embena suu pingi dupwa mee kuki pyuo ingya nalyamo.