Kölfel 132:5-18

⁵tori ai üpwe küna eu leni fän iten ewe Samol mi Lapalap, eu imw fän iten Ewe mi Unusen Tekia, än Jakop we Kot.”

⁶Sa rongorong usun ewe pworofel me lon Petleem, sa küna me lon ekewe mälämälen Jearim.

⁷Sa apasa, “Ousipwe feila ren imwen ewe Samol mi Lapalap o fel ngeni me arun lenien puun pechen.”

⁸Ai Samol mi Lapalap, kopwe feito o tolong lon ewe imwenfel, en me ewe pworofel asisilen om manaman.

⁹Noum kewe souasor repwe föri mine a pwüng fansoun meinisin, nge noum kewe chon pin repwe mweireir fän pwapwa.

¹⁰Pokiten Tafit noum we chon angang kosap aliwini noum we mi kepit.

¹¹Ewe Samol mi Lapalap a akapel ngeni Tafit eu pwon mi let, nge esap atai, “Üpwe awisa eman me lein noum kewe mwän epwe siwiliik lon wisom wisen king.

¹²Are noum kewe mwän repwe tümwünü ai we pwon me ai kewe allük üa aiti ngeniir, nöür kewe mwän repwe pwal siwiliik lon wisom wisen king tori feilfeilachök.”

¹³Pun ewe Samol mi Lapalap a fen filätä Sion. I a mochen pwe epwe lenien imwan,

¹⁴“Iei ewe leni üpwe nonom lon tori feilfeilachök, iei ai we lenien nemenem, pun iei ai mochen.

¹⁵Üpwe afeiöchü Sion ren chomong wöü, üpwe awora enen ekewe chon wöüngau.

¹⁶Üpwe ngeni ekewe souasor seni Sion manau, nge nöün chon pin kana repwe mweireir fän pwapwa.

¹⁷Ikenan üpwe awora eman mwirimwirin Tafit mi pöchökül epwe king, üpwe föri pwe nei we mi kepit epwe chök nemenem.

¹⁸Iwe, üpwe awora säw ngeni chon oputan, nge won möküren ewe mi kepit epwe wor epa mwärämwär mi ling.”