JOSUA 11:4-13

⁴Eme jaŋe momori guru dindiŋfâc‐jeŋic hâwecko moŋgeŋ fokac irec sâc, erâ becâsic â keretac wiac‐jeŋic bocjaha amec‐joparâ fisimbiŋ.

⁵Eme ŋicwofuŋ sasawa i jaŋe roroc efârerâ raku Meram opâo tumaŋne‐fârerâ Israe ŋic jaŋehec qaqac eniŋte teuŋ âterâ fombiŋ.

⁶Eme Wofuŋzi Josua ʒiŋuc âzâcnewec: “Go jaŋere mi hâwicguoc. Tomâcko dameŋ ʒiŋucne hâcne noni joparâ Israe ŋic ŋoŋere meo râec‐jopa‐fârepemu. Go ine becâsicfâc‐jeŋic jaŋere rua hetâcnerâ keretac wiac‐jeŋic ʒoczi turuŋketec ʒazejec.”

⁷Eme Josua e momorifâc‐ticne jaŋehec ututuŋ jaha Merom opâo fisi‐jarewec.

⁸Eme Wofuŋzi Israe ŋic jaŋere meo râec‐jopame jopa jâpec ejare raku Sidoŋ‐Raba â Misirefo‐Maim haeo, erâ ʒoaŋ wewefunaopec ine Mizipe wâneŋko fisimbiŋ. Erâ moc mi akic‐jopa huŋgaŋkehuc ima samaki bacjopa‐fârembiŋ.

⁹Eme Josua e Wofuŋzi âzâcnewec irec sâcko becâsicfâc‐jeŋic jaŋere rua hetâcne‐fârewec â keretac wiac‐jeŋic ine ʒoczi turuŋkeme ʒafârewec.

¹⁰Eme Josua e dameŋ ira mocwâc risierâ Hazoro hae rorâ ŋicwofuŋ‐ticne ʒikazi imackewec. Hazoro hae i mâmâc jaha ŋicwofuŋ sasawa jaŋere hae qizec ŋewec.

¹¹Eme Israe ŋic jaŋe wiac jujune moc mi akic‐jopa huŋgaŋkehuc bâsirowec‐jopa‐fârembiŋ, â Hazoro hae ine Josuazi turuŋkeme ʒawec.

¹²Eme hae sasawa â ŋicwofuŋfâc‐jeŋic jaŋe ine Wofuŋte kiŋaŋŋic Mosezi mutâcnewec irec sâcko Josuazi rocjoparâ ʒikazi imac‐jopahuc bâsirowec‐jopa‐fârewec.

¹³Â hae gâcne tikio ŋerawec i ine Israe ŋic jaŋe ʒoczi moc mi turuŋkepie ʒawec, Hazoro hae sawa Josuazi turuŋkeme ʒawec.