Zozuwe 11:4-13

⁴Naama masagiti ta ta-ɠɔɔɠɔ nuiti kpein ti ɠulani. Ti ɠɛni ga bɛbɛi nii mɔinɗai, eɠɛ kpoloɗɛi ɠoba ɲaɠaegi. Soo ɓulugi ta wotoloiti ti ɠɛni ti ya, ti wola mɔinni gola.

⁵Naama masagiti kpein ti yeezoni, ti li, ti-ʋuuzuʋɛ ɓɛtɛ Meelɔme ɗɛi ɠobaʋɛ, ga ti kɔɔi ɠɔ Izelayɛle laalɔɠɔma.

⁶Ɠɔoɠɔ GALAGI ɠɛni Zozuwe ma: «Mina lua ti ʋa, mazɔlɔɔ lina, niima yeeɠɛɠalai ma, nà ti lɔɔzu Izelayɛle nuiti zeezu, ti maawana, ti za. Ɗa ta-zooiti kɔɠɔʋolu ɲatai leʋe, è ta-wotoloiti gala.»

⁷Zozuwe ta ná-kɔɔɠɔ nuiti ti ɠulani ti viliba, ti laalɛ ti wu Meelɔme ɗɛi ɠobaʋɛ.

⁸Ɠɔoɠɔ GALAGI ti lɔɔni Izelayɛle nuiti zeezu, ti vɔni ti ma, ti ʋilɛ ti ʋolu, eyɛsu ti zeeli Sidɔn taa wolai ʋɔ bɛ, eyɛsu ti zeeli Miselefɔte-Mayime, eyɛsu ti zeeli Misepa nɛmɛi zu, folo ɠulazu ʋelei. Ti pilɛ sɔlɔɔni ti ma, eyɛsu ti la nu vulu ɠila kpalaa zɛni ná.

⁹Zozuwe ti zoni, eɠɛʋelei Ɠɔoɠɔ GALAGI ma levei veeni la zea. É ta-zooiti kɔɠɔʋolu ɲataiti teʋeni, é ta-wotoloiti gala.

¹⁰Naama ziɛgi zu, Zozuwe ɠalesuʋɛ ma ga ʋogi, é Ɠasɔɔl zoni, é ma masagi ʋaa ga boɠa zɔkpɔi. Tɔun, mɔungi Ɠasɔɔl ɠa é ɠɛni ga masadai naati kpein ma laa wolai.

¹¹Ti naa ɠoloɠoloni, ti nuɓusɛi kpein suwuɠaaleʋe, nu vulu nɔpɛ ge la ɠɛni yɛni ná. Ti Ɠasɔɔl ɠalani.

¹²Zozuwe masagi naati ta-laa wolaiti kpein soni ɓalaa, é ti ɠoloɠolo, é ma masagiti ta ta-nuɓusɛiti kpein suwuɠaaleʋe, eɠɛʋelei Ɠɔoɠɔ GALAGI ná-botiɠɛ nui Moize ma levei veeni la.

¹³Anɛɛ naa ʋe, Izelayɛle nuiti ti la ɠɛni taa wolai taɠila kpalaa galani, niiti ti ʋuuni gizeiti ma, kɛni Ɠasɔɔl nɔ, nii Zozuwe galani.