Iosua 11:4-13

⁴E huriki a hariki nga ri longoa a ngava iea, ri valai turane huriki a nugumaheto ne ria. E huriki a nugumaheto ne ria ri ala kupo hateka manga a hire na lavu. A maka hos a karis ne ria ranga i kupo hateka.

⁵Ri ru palupu e huriki a tara ne ria, ri vaubi turane huriki a Israel. A mada ne ria ri ratea tabukoi na naru e Merom.

⁶Lakea e BAKOVI DAGI i takia e Iosua, “Naha ni mangenge ne ria. Kuduvi na tahuna maea ga tuhori e huriki a Israel ri gi rabalaki e huriki a pile. Mu toloputu a maka vahana hos ne ria, mu rungani a maka karis ne ria.”

⁷Na tahuna e huriki a pile ri tababana ni kisi puru a maki na vabinga ne ria, e Iosua turane huriki a nugumaheto vona ri malaviriri kunana ri vakatubu a vabinga ne ria na naru e Merom.

⁸E BAKOVI DAGI i tuhori e huriki a Israel ri mulangi na vabinga, ri rangi e huriki a pile. E huriki a Israel ri valili sike ne ria i harena na tanga e Sidon e Misrepot-Maim. Muri ri valili ne ria, ri lakea na tabeke na nirikena haro na maloku ne Mispa. Ri vaubi turane ria, ri vakalobo liu ria.

⁹Lakea e Iosua i toloputu a maka vahana hos i rungani a maka karis ne ria, i ramai a ngava i takia e BAKOVI DAGI.

¹⁰Na tahuna iea e Iosua i hamule, i bolea a tanga e Hasor, i rabalakia a hariki vona. E Hasor i matakari a robo lobo nga.

¹¹E huriki a Israel ri rabalaki lobo e huriki a tahotanga ne Hasor, i uka tara viri ge mahuri. Muri ri rungania a tanga iea.

¹²E Iosua i nugutata lobo e huriki a hariki i bole a maka tanga ne ria. I rabalaki lobo e huriki a tahona, i manga a ngava i taki e Moses a vora ne BAKOVI DAGI.

¹³Pali e huriki a Israel i uka ma ri rungani a maka tanga ni rata na maka kupona. A tanga i takia e Iosua ni gi rungani kunana e Hasor.