John 11:12-36

¹²Agaira na vaovarongo tara bosatughu, “Lord, ke vagha ke maturu ke, mi geva ke ghoi uto oli so.”

¹³Jesus te ghilala Lazarus te mate tua, ma gaira tara ghanaghana ke me maturu nina vamua.

¹⁴Kakeri ge Jesus te bosa kalea vanira, “Lazarus te mate tua.

¹⁵Na pukuna ighau, inau tu nia togotogo tu mua ghahau itatana, keri ge kau taluutuniu. Mai ghita ka va righia.”

¹⁶Ma Thomas, tara holoa nia na Baso, te bosa vanira rana vaovarongo, “Mai ghita udolu ka tumuria na Tarai, ge ka mate kolua.”

¹⁷Tana bona te sara mai Jesus, e vati tua na bongi te padi tara tavughia Lazarus tana vatuluma ni beku.

¹⁸Bethany te mua hauvia i Jerusalem, vaghaa sakai na togha lima hangalatu ni ghoto.

¹⁹Me subo na tinoni ni Jerusalem tara mai righira Martha ma Mary, ge kara kokoe togholuvura tana mateana vavinedira.

²⁰Tana bona Martha te rongovia na maiana Jesus, gaia te rughuhoru me va sodoa, ma Mary te kabu so tana vale.

²¹Ma Martha te bosa vania Jesus, “Lord, ke vagha ko ghahagho tua iani ke, na vavinegu ke mua mate!

²²Mi nau tu ghilala hughu itaeni, God ke lubatia vanigho na hava tua ko nongia itatana.”

²³Ma Jesus te bosa vania, “Na vavinemu ke ghoi vola oli so.”

²⁴Martha te bosatughu, “Inau tu ghilalaa gaia ke tughuru oli tana bongi sosoko.”

²⁵Ma Jesus te bosa vania, “Inau na tughuru oli mana vola. Ahei tua ke taluutuniu ke, ke vola, sakai vamua ke mate.

²⁶Ma hei tua te loghoa na vola maurihali me ke taluutuniu, ke mua ghoi mate tua. ?O taluutunia sughua eni?”

²⁷Ma Martha te ghaghua vania, “Eo Lord! Inau tu taluutunigho ighoe na Messiah, Dalena God! Ighoe agaia God te baubahu ge ke mai tana maramana.”

²⁸Mi murina Martha te bosa eni, agaia te pulohi tana vale, me va holokeha hoghona heghena, me bosa vania, “E mai tua na Tarai, me liona na righiamu.”

²⁹Tana bona Mary te rongovia eni, agaia te tapatughuru me mina me vaa righia.

³⁰Tana bona keri, Jesus te ghaha mua i paribebetena na komu, tana bona te sodoa iga Martha.

³¹Na vure tara kabu kolua Mary tana vale, mara kokoe togholuvua, tara saritaonia tana bona tara righia te mina tapatughuru me rughuhoru. Gaira tara ghanaghana ke me va tangi tana vatuluma ni beku.

³²Ma Mary te sara me righia mua Jesus, agaia te tualaghi tuturu vania me ghaghua, “Lord, ke vagha ko ghahagho tua iani ke, na vavinegu ke mua mate!”

³³Mi tana bona Jesus te righia Mary te tangimate, me righira ghua na vure tara ghaha kolua tara tangi ngangaraha. Na kutuna Jesus te dikalio me kanoragha ngangata.

³⁴Ge huatira me ghaghua, “?Ivei tau tavughia?” Agaira tara bosatughu, “Lord, ko mai righia.”

³⁵Jesus te tangi.

³⁶Keri ge na vure tara righia ge ra bosa, “Ko righia, agaia te dolovi ngangataa.”