Yohanes 11:12-36

¹²Yesus apa arakovo utavondi ai wo ayao rasakinav ware, “Lasarus niki, wea kavinta sauman.”

¹³Yesus apa ayao ama ine mi so: Lasarus opamo kakai to. Weramu Apa arakove wo rakarae ware Yesus pare Lasarus ta niki vayavea.

¹⁴Maisyare omai ti, Yesus po raura kakavimbe mansai pare, “Lasarus opamo kakai to.

¹⁵Arono kakai kobe, rino no ratuije ramu. Weramu inanayanambe weye syare Syo ana inta rarorono wasai indamu wapanave kobe. Soamo wade wanta no Lasarusa nui.”

¹⁶Naije Tomas napi aura tavonamo Didimus (weye arikainyo tapume pa) po raura nanto Yesus apa arakovo kaijinta mansai pare, “Wade wantavondi ai muno wangkakai atavon!”

¹⁷Arono Yesus puiya nanto no Lasarus norije rai, Lasarus tami no aipapo raija masyote mambi to.

¹⁸Munijo Betania mangkepan no Yerusalem, ama waravainye mamo kilometerije mandei.

¹⁹Vatano Yahudi wanui rave ude wo Marta muno Maria yapan indamu woyov weye aya anakavo kakai.

²⁰Arono Marta mo Yesus anauno dei, muje ti nande Ai no apa unanuije rai, yara Maria no no yavare ama uga.

²¹Marta mo raura nanto Yesus ai mare, “Injae, ranivara Winy no no naiso ratire, sya anakavo pamo kakai ramu.

²²Weramu syo raen Amisye pamo indati po Winya nyo ranajo Ai raunande.”

²³Yesus po raura akananto Marta rai pare, “Nya arakova indati kovakato no wene rai.”

²⁴Marta mo raura mare, “Syo raen Lasarus kovakato arono munije ama akari.”

²⁵Yesus po raura nanto rai pare, “Risyirati syo kove raunande muno Syo kovakato raunanto vatano kakai to mansai. Are pirati panave Rinai to, umba wene nde anasine rai kai, weramu opamo indati kova no tawan weye Syo kovo nuge nuganui raunande ai.

²⁶Muno vatano kova no so ara panave Rinai, wepamo weno nuge nuganui omamo siso rai ramu. Winyamo nyanave ayao Syo raura so rai rako?”

²⁷Marta ama ayao mo raura mare, “Risyanave Injae winai, Winyamo Arikainyo Amisy muno Mesias. Winyirati Injayo Amisye po natutir nde no mine so wepi Winy.”

²⁸Marta mo ama ayao raurawa mewen, naije makato mo ama rijata Maria rawain muno mo ransamuabe nanto rai mare, “Injae Kurune pamo no no naisoa. Po nawain.”

²⁹Maria mo raraniva jewen, umba mbeseo mavave nto no Yesusa nui.

³⁰Arono naije, Yesus pana siso munijo namije rai rainy, yara no no unanuije raija nene, nai rati Marta nande aijoe.

³¹Vatano Yahudi nanawirati wo Maria rayove no ama yavar wo raen mbeseo mavave musyo. Weti wuruta utavondi rai, weye wo rakarae ware vemo moronto moyov no aipapo.

³²Maria muiya nanto Yesus nori muno mo aen, ama vukane ranteteraje no amun muno mo raura mare, “Injae, ranivara Winy no no naiso ratire, sya anakavo kakai ramu.”

³³Arono Yesus po Maria raen moyov muno vatano Yahudi utavondi rai woyov tavon, anuga ranimaumbe muno mbe memembe rave.

³⁴Naije Po manajo pare, “Nai rui rati wapo Lasarus augaveta antuna?” Wo raura Yesus ai ware, “Injae, nde ramu Nyo raen.”

³⁵Naije Yesus poyov.

³⁶Weti vatano Yahudi wayao ware, “Waperata Opamo muiny dave irati Lasarus ai!”