Juan 11:12-36

¹²“Panginoon, ni konahud ay magpiyya la siya,” kagi nen disepulus na hidi.

¹³En gustu a kagiyán ni Jesus ay patay dán ti Lazaro, peru en akala nen disepulus na hidi ay talaga a tidug la.

¹⁴Kaya kinagi ni Jesus ti mahusay, “Natay dán ti Lazaro.

¹⁵Peru masayaák ta awanák haud tánni sumampalataya kam dikoku. Kaya kadtamon haud.”

¹⁶Nadid, ti Tomas a ngángngaranan di a Kambal, ay nagakit ten kaguman na hidi. “Kadtamon mákkuyug kitam ten Maistu, maski mákkatay kitam dikona.”

¹⁷Káddemát de Jesus ti Betania, ay natukuyan na a áppat dán a aldew a nakalábbáng ti Lazaro.

¹⁸Manga tállu a kilumetru en kadeyu ni Betania ti Jerusalem.

¹⁹Sakay makpal ten taga-Jerusalem hidi en ummangay kánde Marta ay ti Maria tánni mangparapara dikodi.

²⁰Ten pákkasanig ni Marta a pademát ti Jesus, ay tinagbu na sakay inuron na siya. Peru ti Maria ay nawarak la ten bilay di.

²¹Kinagi ni Marta, “Panginoon, ni ked ka la nakuwan háddi ay awan nakuwan natay en kapatkaka ku.

²²Peru tukoy ku, a maski nadid ay iyatád nen Diyos en ányaman a agidán mu dikona.”

²³Kinagi ni Jesus dikona, “Mabiyag a ruway en kapatkaka mu.”

²⁴Kinagi ni Marta, “Tukoy ku a mabiyag siya a ruway ten katapusan a aldew.”

²⁵Kinagi ni Jesus dikona, “Sikán en makapangatád ti biyag sakay en ruway a kákkabiyag. Ni deyaman en sumampalataya dikoku, maski matay ay mabiyag a ruway.

²⁶Sakay en deyaman a biyag nadid a sumampalataya dikoku ay awan matay maski nikan. Maniwala ka beman?”

²⁷Tummábbig siya, “Maniwalaák Panginoon! Sumampalatayaák dikomu sakay maniwalaák a siko en Cristo, en Anak nen Diyos, a áorayán mi a pademát ti munduwiday.”

²⁸Káttapos ni iyud ay ummuli ti Marta. Inangay na sinekretu en wadi na a kinagiyan, “Keddán en Maistu, padulaw na ka.”

²⁹Ten pákkasanig ni Maria, ay pagdaka siya a tummaknág sakay tummagbu kánni Jesus.

³⁰(Awan palla nakademát ti Jesus ten baryu, ked palla siya ten nangtagbuwan dikodi ni Marta.)

³¹Inumunud kánni Maria en Judio hidi a mangparapara dikodi, dikona ketan di a magalistu siya a lumuwas ten bilay di. Akala di ay angay siya ten páglábbángngan a magsanget.

³²Káddemát ni Maria ten puwestu ni Jesus, ay lummuhud siya ten táttaknággan na. Kinagi na, “Panginoon, ni ked ka la nakuwan háddi ay awan natay en kapatkaka ku.”

³³Nahabag ti Jesus ten pákketa na a magsanget ti Maria sakay en Judio hidi a kaguman na.

³⁴“Hádya nánglábbángngan moyid dikona?” kagi ni Jesus. “Karon hád Panginoon angen mu ilingán.” tábbig di dikona.

³⁵Nagsanget ti Jesus.

³⁶Kaya, kinagi nen Judio hidi, “Ilingán moy talaga a mahal na ti Lazaro!”