Juan 11:12-36

¹²Jaskaketian, ja jaonmea onanaibaon yoikana iki neskáakin: —Ibó, jaskati oxaa ikaxki benxoai —akin.

¹³Ikaxbi Jesussen jato yoia iká iki, ja Lazaro moa mawata yoikin, ikaxbi jaonmea onanaibaon shinankana iki, nekebi oxaares yoiira ibirai jaskati ixon.

¹⁴Jatianra jato Jesussen onantiakin yoia iki: —Lázarora moa mawáke.

¹⁵Jatianra ea raroai jain iamaax, jaskarara jakon iki mato beboni eki koshiti kopí. Ikaxbi rama moa oinnon bokanwe —akin jato aká iki.

¹⁶Jatian Jesussen jato jaskáaketian, ja Rabébaon akin akanai Tomassen, wetsabo jato aká iki, neskáakin: —Noaribi jabé bonon bokanwe, noa jabébi mawánon —akin.

¹⁷Jatian moa Betaniain nokóxon Jesussen onanna iki, Lazaro miinhibakana moa chosko nete.

¹⁸Ja Betania jemara iká iki, Jerusalén ochóma kimisha kilómetrobira.

¹⁹Jatian icha judío koshibo Jerusalénhainoax, Marta betan Mariaiba bokana iká iki, onískanaitian jato shinan koshikiini.

²⁰Jatian moa Jesús nokotai ninkatax, Marta já bechii kaa iki. Jatian Maríabiribi, xobonbi baneta iki.

²¹Kaxon Jesús bechixon, Martan yoia iki neskáakin: —Mia neno iketianra, nokon poi mawáyamakeanke Ibó.

²²Jaskara ikenbira en onanke, rama jatíbi min Dios yokatabo mia meniai —akin.

²³Jatian Jesussen yoia iki: —Ja min poira jakiribi jiriribiai —akin.

²⁴Jatian Martan yoiribia iki: —Ikon riki jiriribiranoxiki, ja mawatabo jirititian —akin.

²⁵Jatian Jesussen yoiribia iki: —Ea riki ja mawatabo jirimai, jainoax jato jamai. Jaweratonki ea ikonhai jara mawataxbi jaresti iki.

²⁶Jainoax jatíbi ja japarixon ea ikonhaibora jawetianbi mawátima iki, ¿Minki akai ikonhakin neskara? —akin.

²⁷Jaskáa ja ainbaon yoia iki: —Enra akai ikonhakin Ibó, mia riki ja Cristo, ja Diossen Bake nato neten joti yoipaokani —akin.

²⁸Jaskáakin yoitaanan, Marta jawen wetsa María kenai kaa iki. Kaxon Martan netéshoko yoia iki neskáakin: —Ja maestrora moa neno, iki miara kenai —akin.

²⁹Jaskáakin yoiatianbi wenítaanan, Jesús oinni María kaa iki.

³⁰Jatian Jesús iká iki jeman nokotamapari, ja jainoa Martan nokowanainkobi.

³¹Jaskati María ishtonbires pikókainaitian, ja shinan raromai boá jain iká judíobaon chibankana iki, ja mawá miinkana kini bebonmeax winiira kabirai ixon.

³²Jaskatax kaax Jesús ikain nokóxon, Marían ja bebon chirankooxon yoia iki: —Mia neno iibaketianra, nokon poi mawáyamakeanke Ibó —akin.

³³Jatian María itan ja chibani boá judíoboribi winiai oinnax, Jesús jaribi onísxon jato noibaa iki.

³⁴Jainxon jato yokata iki: —¿Jawerano maton miinarin? —akin. Jatian yoikana iki: —Oinni jowé Ibó —akin.

³⁵Jainoax Jesús winia iki.

³⁶Jaskataitian ja judío koshibo ikana iki: —¡Oinkanwe kikinbiresakin noiabira iká ikibetin! —ikibo.