Jon 11:12-36

¹²Tesol kahikahin pahoi i ukek, “Tel Masiwi, na masin i mamatih pake i ewi.”

¹³Tuahe salangawe kakai Jises i ukek ka Lasarus matewen ape lato sokok i ukek Lasarus tua mamatih.

¹⁴Aile ape Jises kaxi haxewa hani lato, “Lasarus matewen.

¹⁵Kalak nga kumahe kapin ti lokon i mat, nga amuam nake waliko ti lehe i sohot, i pon haxoxoi namilomuto tetak. Kako nahih hani kapin.”

¹⁶Tomas, tel laha axai i Sangasang, hone tesol tuaun, “Kako nahih kahiti tel masiwi lehe tin kako mat ohoi i.”

¹⁷Ti lato tahiawa Betani, Jises hong ka laha tihiniwen Lasarus ngain hinalo tamusuen.

¹⁸Betani kumahe xauxaun ti Jerusalem, sai toluhu kilomita.

¹⁹Kilan seilon nahih paxai Mata ma Mary hasolialalu ti matei tel ukalalalu.

²⁰Ti Mata hongoa ka Jises nanahima, i nahih tengeni i a Mary tutuen leili ing.

²¹Mata kakane Jises, “Tel Masiwi, na masin o ie, kaie tel ukalak i tai mat.

²²Tuahe kalak Lasarus matewen, nga tioi hawane ka Haeu aile tuahe tenen na o kamei i.”

²³Jises hone i ukek, “Tel ukalam i xahat alia.”

²⁴Ape Mata ukek, “Nga tioi ka i xahat alia taen hatesol seilon xahat alia, ti taun ti hinitiai lawe seilon.”

²⁵Jises hone i ukek, “Nga tel xahateniai seilon maten ma hanialaha tonain kapi Haeu ti tap tahi tapoan. Tel na namilon xoxoan tetak kalak i mat i moihin tutuen.

²⁶Ape tel i soh tetak ma i to kapi Haeu lian tehue, tel ien i kum mat tamus. Kaie o soh ti waliko ie?”

²⁷Ape Mata pahoi i ukek, “Tel Masiwi, nga soh hawane ka o Krais, tel Nati Haeu, tetel Haeu taloma.”

²⁸Ti Mata kak kewa, i nahih alia. I waxi tahaini Mary ti teka seilon ape i ukek, “Tel Masiwi tahiawen, i kamekam o.”

²⁹Ti Mary hongoa i saxoh ahuta tengenian.

³⁰Ti lokon ien Jises tai soh hani leili toan, i tutuen tetesol ti Mata nahih tengeni i.

³¹Teteka seilon laha apupuha leili tehu ing kapi Mary ti hasolian, taen laha ningahi i tua ape i saxoh ahuta hani melal, laha kahiti i. Laha sokok lehe i nahih tang hani he amal.

³²Ti Mary tahia haniwa kapi Jises, i lokuha hani itan kapi aen ape i ukek, “Tel Masiwi, na masin o ie, kaie tel ukalak i tai mat.”

³³Ti Jises ningahiwa Mary ma teka seilon kapin tatangixi Lasarus, lon tel hetekie tian i kawat hawane.

³⁴I kamei lato, “Amuto hahanopi i ia?” Ape lato ukek, “Tel Masiwi, nahima paxai.”

³⁵Ape ti tatahan tetan kani pulan lil.

³⁶Hina seilon ien, laha ukek, “Paxaiwa, lalap wanen wawahen tetan ti Lasarus.”