Jeremias 41

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Heini si Ishmael anak ni Netania wey apù ni Elishama. Nesakup sikandin te lavew he pemilya ne sevaha sikandin duen te menge upisyal te hadì dutun te nehuna he timpu. Ne hein ikepitu he vulan dutun he tuig, midhendiyà si Ishmael te ki Gedalia diyà te Mizpa duma te sepulù he etew. Ne zutun te egkaan sikandan,

²midhitindeg si Ishmael wey sikan is sepulù he etew, ne midhimetayan dan si Gedalia pinaaǥi te ispada. Umbe mibpatey sikan is midhimu te hadì te Babilonia he gubirnedur ziyà te Juda.

³Midhimetayan daan eni Ishmael is langun he upisyal te menge Judio ziyà te Mizpa, ragkes is menge sundaru he menge tig-Babilonia.

⁴Ne kegkemeselem dutun te wazè pa netau te kedhimetayi ki Gedalia,

⁵duen 80 he menge etew he edhendiyà te Mizpa he ebpuun diyà te Shekem, Shilo, wey Samaria. Migkiskisan dan is menge sumpè dan, mibindasbindas dan is menge visti zan, wey mibpemelian dan is menge lawa zan tenged te kedlelaw zan. Duen uwiten dan he menge pemuhat he para gasa wey veyewà he edtutungen dan diyà te valey te Nengazen.

⁶Midsinuǥung sikandan ni Ishmael he ebpuun te Mizpa is uvag kun edsineǥew. Migkaǥi si Ishmael te, “Hendini kew, ahàa niw is nehitavù ki Gedalia.”

⁷Ne hein nekeuma zan diyà te inged, is duma kandan mibpenhimetayan ni Ishmael wey zuen te menge zuma zin. Ne kegkeipus dutun, impen-ulug dan is nemematey ziyà te vudsi he punduwà te wahig.

⁸Is sepulù kandan wazà mulà penhimetayi su migkeǥiyan dan si Ishmael te, “Kenè key himetayi! Ibeǥey zey kenikew is menge trigu zey, barli, lana, wey teneb he nekeeles diyà te vevesukà.”

⁹Is budsi he mibpen-uluǥan ni Ishmael te nemematey he mibpenhimetayan din duma te lawa ni Gedalia, gaked ni Hadì Asa he impekalut din hein midsurung sikandan ni Hadì Baasha he hadì te Israel. Heini he vudsi mibpenù ni Ishmael te nemematey.

¹⁰Mibihag ni Ishmael is nesamà he menge etew ziyà te Mizpa–is menge anak he vahi ni hadì Zedekia wey is menge etew he insarig ni Nebuzaradan ki Gedalia wey zin meetiman. Ne midlikù si Ishmael ziyà te Ammon duma te menge vihag din.

¹¹Ne nezineg ni Johanan he anak ni Karea wey zuen te zuma zin he menge upisyal te menge sundaru is kebpenhimatey ni Ishmael.

¹²Umbe, midtiǥum dan is langun he menge sakup dan ne migenat dan su ebpekidtebek dan ki Ishmael. Neseutan dan sikandin diyà te zekelà he peneng he ziyà te Gibeon.

¹³Ne hein naahà duen te menge vihag ni Ishmael si Johanan wey is duma zin he menge upisyal, nelipey sikandan.

¹⁴Sikan is langun he mibihag ni Ishmael puun te Mizpa pudu mibpelelaǥuy pehendiyà te ki Johanan.

¹⁵Piru si Ishmael wey is walu he menge sakup din mibpelaǥuy pehendiyà te Amon.

¹⁶Ne zutun midtiǥum ni Johanan wey zuen te zuma zin he menge upisyal is langun he mibihag ni Ishmael puun te Mizpa hein nepatey zin en si Gedalia he anak ni Ahikam. Ne puun diyà te Gibeon,

¹⁷midhendiyà sikandan te Gerut Kimhan he uvey te Betlehem, ne zutun nengandam sikandan te kedhendiyà te Ehipto.

¹⁸Su nahandek dan te menge tig-Babilonia tenged te kedhimetayi ni Ishmael ki Gedalia he iyan midhimu te hadì te Babilonia he gubirnedur te Juda.