1Hein ikeepat he tuig te kedhadì ni Jehoyakim he anak ni Josia diyà te Juda, migkaǥi is Nengazen diyà te ki Jeremias te,
2“Kuwa ka te linulun he suratà ne isurat nu is langun he migkaǥi ku kenikew vahin te Israel, Juda, wey langun he menge nasyun. Isurat nu is langun he migkaǥi ku puun te puunà te kebpekidlalag ku kenikew (hein si Josia pa is hadì diyà te Juda) taman en guntaan.
3Su kela ke mahalin is isip te menge etew ziyà te Juda emun egkezineg dan is menge kezeetan he mibpelenuwan ku te ebaal ziyà te kandan ne ed-engkezan dan is mezaat he menge vetasan dan. Emun egkeulaula heini, ebpeseyluwen ku sikandan te kelelalung dan wey menge salè dan.”
4Umbe, impetawag ni Jeremias si Baruc he anak ni Neria ne indikta zin kandin is langun he migkaǥi te Nengazen, ne insurat heini ni Baruc diyà te linulun he suratà.
5Migkeǥiyan ni Jeremias si Baruc te, “Imbandu kedì is kedhendiyà te valey te Nengazen.
6Umbe, iyan ke zà hendiyà te valey te Nengazen dutun te andew te kebpuasa. Edtiǥum dutun is menge etew ziyà te Juda he ebpuun diyà te menge inged dan, ne vesaha nu ziyà te kandan is menge lalag te Nengazen kayi te velesahan he indikta ku kenikew is kedsurata zuen.
7Su kela ke pinaaǥi kayi edangep sikandan diyà te Nengazen, ne ed-engkezan dan is mezaat he vetasan dan. Su mibpetizeenan en sikandan te Nengazen he edsilutan sikandan tenged te utew zin kegkepauk.”
8Umbe, mibasa ni Baruc is menge lalag te Nengazen diyà te valey te Nengazen sumalà te insuǥù kandin ni Jeremias.
9Neulaula heini hein andew te kebpuasa zuen te ikesiyam he vulan te ikelima he tuig te kedhadì ni Jehoyakim diyà te Juda, he anak ni Josia. Dutun midtiǥum diyà te valey te Nengazen is menge meǥinged diyà te Jerusalem wey ziyà te menge inged diyà te Juda.
10Ne zutun te ebpemineg is menge etew, mibasa ni Baruc is menge lalag ni Jeremias he ingkesurat diyà te linulun he velesahan. Mibeelan heini ni Baruc diyà te valey te Nengazen, diyà te ruǥu ni Gemaria he sikritaryu he anak ni Shafan. Heini is ruǥu ni Gemaria diyà te zivavew te lama zuen te valey te Nengazen he uvey te veyeey pehendiyà te migngezanan he Beǥu he Pultahan.
11Ne hein nezineg ni Micaya he anak ni Gemaria wey apù ni Shafan is menge lalag te Nengazen he mibasa ni Baruc,
12midhendiyà sikandin te turuǥan, diyà te ruǥu te sikritaryu he zutun edtiǥum is langun he menge upisyal. Dutun si Elishama he sikritaryu, si Delaya he anak ni Shemaya, si Elnatan he anak ni Acbor, si Gemaria he anak ni Shafan, si Zedekia he anak ni Hanania, wey is duma pa he menge upisyal.
13Midtudtul kandan ni Micaya is langun he nezineg din he mibasa ni Baruc diyà te menge etew.
14Ne zutun, midsuǥù te menge upisyal si Jehudi he anak ni Netania he apù ni Shelemia wey apù te vuel ni Cushi, te kedhendiyà te ki Baruc, ne mibpekeǥiyan dan te, “Uwita nu sikan is linulun he velesahan ne hengkayi ka te kenami.” Umbe midhendiyà si Baruc te kandan he uwiten din sikan is linulun he velesahan.
15Ne hein nekeume en si Baruc, migkaǥi haazà is menge upisyal te, “Pinuu ka ne vesaha nu kayi te kenami is ingkesurat keniyan te linulun he velesahan.” Umbe mibasa haazà ni Baruc diyà te kandan.
16Ne hein nezineg dan is langun dutun nekedsisirapà sikandan tenged te kegkehandek dan ne ke sikandan diyà te ki Baruc te, “Kinahanglan he edtudtulen tew heini ziyà te hadì.”
17Ne zutun migkeǥiyan dan si Baruc, “Keǥiyi key ke mibmenumenu nu heini te edsurat. Midiktahan ke ve ni Jeremias?”
18Midtavak si Baruc te, “Uya, indikta kedì ni Jeremias heini is langun, ne insurat ku heini kayi te velesahan.”
19Ne migkeǥiyan dutun te menge upisyal si Baruc te, “Eles kew en ki Jeremias ne kenè niw ipetueni te minsan hentei ke hendei kew.”
20Ne insavuk duen te menge upisyal sikan is linulun he velesahan diyà te ruǥu ni Elishama te sikritaryu, ne midhendiyè dan te hadì diyà te lewahan duen te turuǥan, ne midtudtul zan is langun.
21Ne midsuǥù dutun te hadì si Jehudi he kuwaa zin sikan is linulun he velesahan. Ne migkuwa haazà ni Jehudi diyà te ruǥu ni Elishama ne mibasa zin duen te hadì wey te langun he ebpemenhitindeg diyà te avey zin he menge upisyal.
22Timpu haazà te meǥenew ne sikan is hadì diyà te ruǥu he hizezengà, is edhidhizazang.
23Ne kada ebpekepasad si Jehudi he ebasa te heepat he linya, ne edtempezen duen te hadì te kutsilyu zin haazà he vahin ne idtimbag din duen te hapuy, taman te naamin metutung haazà is belesahan.
24Ne wazà mahandek haazà is hadì wey is langun he menge upisyal zin he nekezineg te menge lalag dutun te velesahan. Wazè dan ganì bindasa is kumbalè dan te kepaahà te kegkeseeng dan.
25Minsan midhangyù si Elnatan, si Delaya, wey si Gemaria zutun te hadì he kenè din tutunga sikan is belesahan, ne wazà mebpemineg haazà is hadì.
26Kekenà, midsugù dutun te hadì si Jerameel he anak din, si Seraya he anak ni Azriel, wey si Shelemia he anak ni Abdeel te kedakep ki Baruc he sikritaryu wey ki Jeremias he ebpeneuven. Piru in-eles sikandan te Nengazen.
27Ne hein kegketutunge en te hadì duen te linulun he velesahan he midsuratan te menge lalag he indikta ni Jeremias diyà te ki Baruc, migkeǥiyan te Nengazen si Jeremias te,
28“Kuwa ka te selakew en he linulun he velesahan ne iuman nu isurat sikan is langun he ingkesurat duen te nehuna he velesahan he midtutung ni Hadì Jehoyakim he hadì te Juda.
29Ne keǥiyi nu sikan is hadì te iyan heini migkaǥi ku, ‘Midtutung nu sikan is linulun he velesahan su nekaǥi zutun he edezeetan te hadì te Babilonia heini he tanà ne ebpenhimetayan din is menge etew wey menge uyaǥen.
30Umbe, iyan heini migkaǥi ku mehitenged kenikew, Hadì Jehoyakim he hadì te Juda: Wazè nu kevuwazan he egkahadì diyà te ginhedian ni David. Edhimetayan ka, ne idtimbag dà is lawa nu. Egkekagkag heini emun maandew ne egkezehemuǥan emun mezukilem.
31Edsilutan ku sikew wey is menge anak nu, ragkes en is menge upisyal nu tenged te kelelalung niw. Ibpeseǥazan ku keniyu wey te menge etew te Jerusalem wey Juda is langun he kezeetan he nekaǥi ku he idezaat keniyu, su geina te wazè kew mebpemineg kedì.’ ”
32Umbe, migkuwa si Jeremias te selakew en he linulun he velesahan ne imbeǥey zin haazà ki Baruc, ne insurat dutun ni Baruc is langun he indikta kandin ni Jeremias, iring te mibeelan dan duen te nehuna he linulun he velesahan he midtutung ni Hadì Jehoyakim he hadì te Juda. Piru zuen in-uman ni Jeremias kayi he ebpekeiring ded duen te nehuna he insurat.
