1Heini he tudtul mehitenged te menge etew ziyà te Juda migkaǥi te Nengazen diyà te ki Jeremias hein ikeepat he tuig te kedhadì ni Jehoyakim diyà te Juda, te anak ni Josia. Ne iyan daan heini nehuna he tuig te kedhadì ni Nebucadnezar ziyà te Babilonia.
2Migkeǥiyan te ebpeneuven he si Jeremias is langun he menge etew ziyà te Juda wey is langun he meǥinged diyà te Jerusalem te:
3Seled te 23 he tuig–puun te ike-13 he tuig te kedhadì ni Josia ziyà te Juda, he anak ni Amon ne taman en guntaan is kebpekidlalag te Nengazen kedì. Ne edtulungan ku en edtudtula ziyà te keniyu is menge lalag din, piru wazè kew iyan mebpemineg.
4Ne minsan layun edsuǥù is Nengazen te menge suluǥuen din he menge ebpeneuven diyà te keniyu, wazè kew ǥihapun medseǥipà wey mebpemineg.
5Migkaǥi is Nengazen pinaaǥi te menge ebpeneuven din te, “Engkezi niw en is mezaat he menge vetasan niw wey menge ulaula niw su para meubpai niw taman te taman heeyan is tanà he imbeǥey ku keniyu wey te menge kepuun niw.
6Kenè kew penilbi wey azap te zuma he menge ed-ezapen. Kenè niw himuwa he mepauk a pinaaǥi te kebpenilbi niw wey ked-azap te menge ed-ezapen he bineelan niw zà, su para kenè ku sikiyu siluti.”
7Piru wazè kew iyan mebpemineg te Nengazen. Midhimu niw he mepauk sikandin pinaaǥi te menge vineelan niw he zuma he menge ed-ezapen. Umbe iyan kew mismu mid-uwit te silut para keniyu.
8Umbe, iyan heini migkaǥi te Nengazen he Mekeǥeǥehem: “Ǥeina te wazè kew mebpemineg te menge lalag ku,
9ibpesurung ku sikiyu te menge etew ziyà te zizaya he ebpenguluwan te suluǥuen ku he si Hadì Nebucadnezar he hadì te Babilonia. Edsurungen dan heini he tanà wey is langun he meǥinged kayi, ragkes en is langun he menge nasyun diyà te nekeelingkus kayi. Ebpurungan ku sikiyu edezeeti, ne egkeheratan is menge etew he ebpekaahà te egkehitavù keniyu ne egkehimu kew he telemayen. Uya, egkezeetan kew taman te taman.
10Edhimuwen ku he kenè kew en ebpekeǥusà wey ebpekelipeylipey. Kenè en egkezineg is kebpeeyuwà te veuǥu, wey wazè en daǥing te ebpenggaling te trigu wey edtemtem te sulù ke mezukilem.
11Egkehimu he mekevulungbulung heini is tivuuk he tanà. Heini he nasyun wey is menge nasyun diyà te peliǥuy kayi ebpenilbi te hadì te Babilonia seled te 70 he tuig.
12“Iyan, emun egketapus en is 70 he tuig, edsilutan ku is hadì te Babilonia wey is menge etew zin tenged te salè dan. Edhimuwen ku zaan is nasyun dan he mekevulungbulung taman te taman.
13Ibpeǥezaman ku ziyà te nasyun dan is langun he migkaǥi ku he ebpekesuǥat kandan wey is langun he nekaǥi ni Jeremias he ebpekesuǥat te zuma he menge nasyun he ingkesurat kayi te libru.
14Egkeuripen sikandan te mahabet he menge nasyun wey te mekeǥeǥehem he menge hadì. Edsilutan ku sikandan te sungkad te menge vaal zan.”
15Migkaǥi kayi te kedì is Nengazen he Megbevayà te Israel te, “Kuwaa nu ziyà te velad ku is tasa he nepenù te pauk ku, ne ipeinum nu te menge etew ziyà te langun he menge nasyun he zutun ku sikew suǥùa.
16Emun ebpekeinum sikandan kayi, ebpekeziregdireg sikandan is henduen be te ebuneǥen, tenged te tebek he ibpaaǥi ku ziyà te kandan.”
17Umbe, migkuwa ku haazà is tasa ziyà te velad te Nengazen ne impeinum ku te menge etew ziyà te langun he menge nasyun he zutun e zin suǥùa.
18Impeinum ku is menge etew ziyà te Jerusalem, wey is menge etew ziyà te menge inged diyà te Juda, ragkes is menge hadì dan wey menge upisyal su para mezeeti sikandan. Igkeherati is egkeula-ula kandan; edsudien wey ebpenrewakan sikandan iring te nehitavù guntaan.
19Impeinum ku zaan is Faraon he hadì te Ehipto, is menge upisyal zin, menge pengulu wey is langun he menge etew zin,
20ragkes en is kenà menge Ehiptohanen he ed-ubpà dutun te Ehipto. Impeinum ku zaan is menge hadì wey menge etew kayi he menge lugar: Uz, menge meǥinged diyà te menge inged diyà te Filistia (he iyan is Ashkelon, Gaza, Ekron, wey Ashdod),
21Edom, Moab, Ammon,
22Tyre, Sidon, is menge lugar he zehipag te zaǥat,
23Dedan, Tema, Buz, is menge mibpen-elutan is dapit te kendingen dan,
24Arabia, is menge tribu ziyà te disirtu,
25Zimri, Elam, Media,
26is menge lugar ziyà te zizaya, meziyù etawa uvey–is langun he ginhedian kayi te kelibutan. Ne is huziyan he ibpeinum ku iyan is diyà te Babilonia.
27Ne migkaǥi is Nengazen kayi te kedì te, “Keǥiya nu kayi he menge nasyun he siak, is Nengazen he Mekeǥeǥehem, he Megbevayà te Israel, migkaǥi te, ‘Sigi, inum kew kayi te tasa te pauk ku taman te egkengelangut kew, ebpengutè kew, ne egkengepiley he kenè en ebpemekeenew, su ebpeeǥiyan ku sikiyu te tebek.’
28“Emun kenè dan ed-inum, ne keǥiyi nu sikandan he iyan a, is Nengazen he Mekeǥeǥehem migkaǥi te: Kinahanglan he ed-inum kew!
29Ahàa niw man! Mibpuunan ku en is kebpaaǥi te kezeetan diyà te Jerusalem, kes inged he para te zengeg ku. Guntaan egkeisip niw ve he kenè ku sikiyu edsilutan? Edsilutan ku sikiyu! Su ibpedtetebek ku is langun he menge nasyun kayi te tivuuk he kelibutan. Iyan a, is Nengazen he Mekeǥeǥehem, is migkaǥi kayi.
30“Jeremias, keǥiya nu ziyà te kandan is langun he migkaǥi ku, ke sikew te: ‘Puun te langit iring te erimaung he edhiniǥer is Nengazen; edraǥeb is laǥeng din he ebpuun diyà te segradu he ubpeey zin. Ebpekezeǥingen din is kedhinigera zin te menge etew zin. Egkulehian din is langun he ed-ubpà kayi te kelibutan iring te etew he ebpengulahì emun egkeres sikandin te paras.
31Is laǥeng din egkezineg kayi te tivuuk he kelibutan, su ed-ekusaran din is menge nasyun. Edhukuman din is langun he menge etew, wey edsintinsyahan din pinaaǥi te tebek is menge lalung.’ ”
32Impelaus te Nengazen he Mekeǥeǥehem is menge lalag din: “Pengandam kew! Is kezeetan ebpekeuma ziyà te menge nasyun he henduen te mevendes he bagyu he ebpuun diyà te kinemeziyuan he vahin te kelibutan.”
33Dutun he andew mahabet is ebpenhimetayan te Nengazen. Ne minsan ebpekepeyapat diyà te minsan hendei is ebpematey, ne wazà egkeseeng etawa edtiǥum etawa edleveng kandan. Ebey-anan dà sikandan he henduen be te menge tai he nemekesavuk diyà te tanà.
34Sikiyu is menge pengulu, purung kew sineǥew he edtelulid diyà te eliyavuk tuus te utew niw kegkeseeng. Su neume en is timpu he edhimetayan kew he iring te edlepaan he kerehidu. Egkeruntek kew iring te mahalen he ziniyun he nerupet.
35Wazà lugar he egkehelinan niw etawa egkepeleǥuyan niw.
36Egkezineg is kedsineǥew wey kedlelendag niw, su midezeetan te Nengazen is nasyun niw.
37Tenged te utew kegkepauk te Nengazen, is melinawen he penebtavà egkehimu he disirtu.
38Is Nengazen, egkeiring te erimaung he migawas puun te elesè din su ebpen-ahà te edewiyen din. Egkehimu is tanà he mekevulungbulung tenged te tebek, wey tenged te utew kegkepauk te Nengazen.
