1Mibpedayun pa megkaǥi is Nengazen te, “Dutun he timpu, egkehimu a he Megbevayà te langun he pemilya te Israel, ne egkehimu zan he menge etew ku.
2Iyan a is Nengazen migkaǥi he ed-eturen ku is nesamà kandan he menge uuyag dutun te kedhipanew zan diyà te sibsivayan. Edlikù a te kebeǥey te menge Israilihanen te egkehimelayan dan.”
3Dengan mibpaahà is Nengazen te menge Israilihanen he migkaǥi te, “Mahal ku sikiyu te wazà pidtemanan he kebmahal. Tenged te keupiya ku, impeuvey ku sikiyu kayi te kedì.
4Ibpeuman ku sikiyu ibpehitindeg is menge tig-Israel he iring te vahi he wazè pa mehileveti. Ne ebpekesayew kew tenged te kegkelipey te ebpezumahan te tukar te menge tamburin niw.
5Ne ebpemula kew en maan te menge paras diyà te menge vuntud te Samaria, ne iyan kew ebpekepulus te menge veǥas din.
6Egkeuma is timpu he zutun is menge vantey ziyà te menge vuvungan he Efraim ne ebpemensag, ‘Hendini kew, su edtekezeg kiw ziyà te Jerusalem te ked-azap te Nengazen he Megbevayè tew.’ ”
7Migkaǥi pa is Nengazen te, “Kanta kew wey ugyab kew tenged te kegkelipey para te Israel he iyan lavew te langun he menge nasyun. Dalig kew wey ihabet niw ivensag is, ‘Nengazen, libriya nu is menge etew nu he nengesamà he uuyag he menge Israilihanen.’
8Pemineg kew! Iyan a mismu egkuwa wey edtiǥum kandan puun te zizaya wey ziyà te minsan hendei he vahin te kelibutan. Ragkes en he ebpekezuma kandan, is menge lakap wey menge pigket. Iring din daan is menge meǥingey wey umaanak. Utew mahabet is ebpemen-ulì.
9Ed-umanan ku sikandan ed-uwità is edsineǥew wey ebpengemuyù. Ed-uwiten ku sikandan diyà te menge wahig, ne ed-ikul sikandan diyà te meupiya he zalan he kenè dan duen ebpekesipà. Su iyan a amey te menge Israilihanen, ne si Efraim is kakey he anak ku.
10“Sikiyu is menge etew ziyà te menge nasyun, pemineǥa niw is egkeǥiyen ku te Nengazen, ne tudtula niw ziyà te meziyù he lugar: Impeyapat ku is menge Israilihanen, piru edtiǥumen ku zed sikandan, ne ebentayan ku sikandan iring te kebantey te ebantey te menge kerehidu.
11Edlibriyen ku sikandan is menge kevuwazan ni Jacob diyà te ǥehem te menge etew he edhuna he mekeǥeǥehem kandan.
12Edhendiyè dan te Buvungan he Zion ne ed-ugyab sikandan tenged te kegkelipey. Egkelipey zan tenged te menge keupiyaanan he ibeǥey ku kandan–he iyan is uzar he trigu, binu, lana, wey menge uyaǥen. Egkeiring sikandan te pemuleey he layun ebinyaǥi, ne kenè dan en egkeseeng.
13Is menge raǥa wey menge kenakan kandan ragkes en is memeǥurang, edsayew tenged te kegkelipey. Edliwanan ku is kebpekesineǥew zan te kelipey. Kenè en sikandan ebpekelalew su edlipayen ku sikandan.
14Edhentayen ku is menge memumuhat te utew zekelà wey metaam he menge keenen. Ebpezaharan ku is menge etew ku te meupiya he menge vutang.”
15Mibpedayun te Nengazen is menge lalag din te, “Duen egkezineg he sineǥawan wey lendag diyà te inged he Rama. Edsineǥew si Raquel tenged te menge anak din. Egketulung en sikandin egkeiinek su nemematey is menge anak din.”
16Piru guntaan migkaǥi is Nengazen te, “Kenè ke en meiinek su edsuhulan ku sikew tenged te menge vaal nu. Ed-ulì is menge anak nu puun te tanà te menge kuntada zan.
17Umbe, duen nu egkeperateng diyà te egkehuziyanan. Su kenà duwazuwa he edlikù is menge anak nu ziyà te keugelingen dan he tanà. Iyan a, is Nengazen, is migkaǥi kayi.”
18Nezineg ku is sineǥawan te menge tig-Efraim. Ke sikandan te, “Nengazen, neiring key te nati he vaka he wazà melayam te eyuǥu, iyan, mibpenurù key kenikew te kebpezumazuma kenikew. Iyan ka Nengazen he Megbevayè dey, umbe ilikù key kenikew ziyà te tanè dey.
19Dengan mid-ewaan dey sikew, iyan, guntaan kenè dey en heeyan ed-ul-ulahan. Hein neseǥipè dey en he nekesalè key nekeisip-isip key tenged te kegkeseeng dey. Utew zey ingkeeled is mibeelan dey hein menguhed key pa.”
20Midtavak is Nengazen te, “Sikiyu is menge tig-Efraim he pelanggè ku he menge anak, ingkelipey ku sikiyu. Minsan migkaǥi a te ebpekesuǥat keniyu, pinelanggè ku ǥihapun sikiyu. Mibulung a keniyu wey nehizuwan ku sikiyu.
21“Sevuki niw te tuus etawa menge pasek he iyan ibpeketuredu niw te zalan. Purungi niw tentenuzi is mid-ikul niw su iyan ded heini egkeikul niw emun ed-ulì kew en. He menge tig-Israel he iring te vahi he wazè pa mehileveti, likù kew en diyà te menge inged niw.
22Keenu kew pe bes edlikù kayi te kedì, is menge anak ku he nengetazin. Ebaal a te veǥu kayi te kelibutan–iring te is bahi iyan en maan pengalang te maama.”
23Migkaǥi is Nengazen he Mekeǥeǥehem, he Megbevayà te Israel te, “Emun igkepelikù ku en is menge etew ziyà te Juda ziyà te tanè dan, ne egkaǥi en maan sikandan te, ‘Berakat he tuvazi te Nengazen is segradu he vuntud he iyan is Jerusalem, he iyan ubpeey zin.’
24Ed-ubpaan te menge etew is Juda wey is menge inged he nesakup kayi, ragkes en he ed-ubpà kayi is menge perevasuk wey is menge perevantey te menge kerehidu.
25Su ibpehimeley ku is nengeveley ne edhentayen ku is menge midluyahan tenged te kegkevitil. Umbe egkaǥi is menge etew te,
26‘Hein nepukew a, neǥezam ku he utew meupiya is kedlipezeng ku.’ ”
27Midpedayun megkaǥi is Nengazen te, “Egkeuma is timpu he utew ku ibpemahabet is menge etew ziyà te Israel wey Juda ragkes is menge uyaǥen dan.
28Dengan midezeetan ku, mibengkag ku, wey midaag ku sikandan. Piru ziyà te huziyan he timpu edtukuzen ku wey ibpeuman ku ibpehitindeg sikandan.
29Dutun he timpu is menge etew kenè en ebpekekaǥi te, ‘Migkaan is ginikanan te mepezes he paras ne elin kayi egkepezesan is menge anak dan.’
30Dutun, iyan dà egkepezesan sikan is migkaan te mepezes he paras. Iyan dà edhimetayan is etew he ebpekesalà.”
31Mibpedayun pa keǥiya te Nengazen is menge lalag din te, “Egkeuma is timpu he zutun edhimu a te veǥu he kebpekid-uyun ku te menge tig-Israel wey menge tig-Juda.
32Ne kenà heini iring te paaǥi he midhimu ku ziyà te menge kepuun dan hein migiyahan ku pa sikandan is ebpuun diyà te Ehipto. Minsan neiring a te esawa zan, wazè dan medtuman duen te nehuna he kebpekid-uyun ku kandan.” Iyan a, is Nengazen, is migkaǥi kayi.
33Migkaǥi pa is Nengazen te, “Is beǥu he kebpekid-uyun he edhimuwen ku ziyà te menge tig-Israel te egkeuma he timpu iyan heini: Idtaǥù ku is menge suǥù ku ziyà te isip dan wey idsurat ku heini ziyà te gehinawa zan. Egkehimu a he Megbevayè dan, ne egkehimu zan he menge etew ku.
34Wazè en egkaǥi ziyà te emurè din te inged etawa suled din te kinahanglan he egkilelaan nu is Nengazen. Su pudu en sikandan egkilala kedì, puun te kinemevevaan pehendiyà te kinetikangan is ked-etew zan. Su ebpeseyluwen ku sikandan te menge mezaat he neveelan dan, ne kenè ku en edtentenuzan is menge salè dan.” Iyan a, is Nengazen, is migkaǥi kayi.
35Mid-uman pa megkaǥi is Nengazen te, “Iyan a midsuǥù te andew te kedsilà emun maandew, wey te vulan wey menge vituen emun mezukilem. Ne migkutew ku is daǥat wey medreǥuuk is menge vaǥel. Mekeǥeǥehem he Nengazen is ngazan ku.
36Mintras kemulu pa is langit wey is kelibutan, ne ebpedayun daan is sevaha he nasyun is Israel te wazà pidtemanan.
37Iring te kenà egkesukud is langit wey kenà egketegkad is kezalem te pundasyun te kelibutan diyà te kinezizeleman, ne kenè ku zaan idselikwey is langun he kevuwazan ni Israel tenged te menge salà he neveelan dan.” Iyan a, is Nengazen, is migkaǥi kayi.
38Mibpedayun megkaǥi is Nengazen te, “Egkeuma is timpu he ed-umanan ebenguna is Jerusalem puun te Turi ni Hananel pehendiyà te Pultahan diyà te Suyuk.
39Ne puun keniyan he lugar, ebpedayun heini pehendiyà te vuntud he Goreb, ne ebulegkù pehendiyà te Goa.
40Minsan is tivuuk he suǥud-suǥud he timbaǥà te ebpematey wey menge igmuk te menge pemuhat, ne idsivey para kedì; ragkes en is langun he vevesukà diyà te Kidron he zal-ug diyà te edsilaan, pehendiyà te Pultahan te menge Kudà diyà te zizaya. Kenè en egkeuman egkezeeti heini he inged.”
