Jeremías 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Bab-Jehová soged: “Judá-dulemar-e-isguedi, e-gwagegi, esgoro-swiswidikidgi narmakar naiyobid, akwa-diamante-e-dukugi narmakar naiyobid. Judá-dulemar-e-isguedi, Bab-Dummadga-ibmar-ogumakar-ukleged-aila-e-bebegi sobles naid.

²Ar be-mimmiganse-bakale, bab-dummad-bundor-Asera-e-wilubgan-sobsadi, ega e-ailamar sapi-dummagan-nagaba-sobsadi, nue ebinsamalad.

³Degi, yar-mullugangi sapurba-neg-ollornaidgi aila-sobar-bukwamarbalidi, nue ebinsamarbalid. ”Bemar-isgued-ulale, bela be-yargine, be-manimala, be-ibmar-nuegana be-isdarmaladga an ukoed, degine, be-bab-dummaganse-goled-negmar an ega ukbaloed.

⁴Na be dukin an-bemarga-yala-uksadi be surgumaloed. Be yar-dakdisulidgi, be-isdarmalad-e-maiga an be-imakoed. Ar be, nue an-oulussoggu, an-urwed, soo-geg-ginnedyobi, bemargi degisadegu gusunnoed.”

⁵Bab-Jehová weyob soged: “¡Dule dule-baidgi-bensuli-gued, duledar wilesun! ¡Dule, dulegi-bendakleged-amidiid, duledar wilesun! ¡Dule angi-banguedi, duledar wilesun!

⁶A-dule, sapi-matugana nega-dulesulidganba-nikadyob gumaloed: Neg-nuegan-nonikir, gwen werguosulid, unnila nega-dulesulidganba garmakdii guoed, napa-balubiidgi gudii guoed, agine, gwen dulemar gudidasurmalad. Debayobi, dule Bab-Dummadgi-banguder guoed.

⁷”Ar dule angine-bensuligueddi, anginbi-bendakleged-edarbediiddi, egi nued binsalesad.

⁸A-dule, sapi-diwar-naba-gwichidaedyobi gued, igi sapi-malimar diwarse-bategwichile, neg-ued-nonikile, gwen akar-gusuli, e-gagan aramakwisgudae, debayobi, a-dule gued. Deginbali, igi a-sapi yolagi gwen akar-gusuli birga-irba gusgu sanmakgwisdae, deyobi, we-dule gued.

⁹”Dule-binsaedi, ibmar-baiganba bur bule isganad, dule-yardakedgi binsadaed. ¿Ar wede doa dule-binsaed magar-dakosunna?

¹⁰”Unnila ani an Bab-Jehová-guedi, dulemar-ulubgi-binsaed magar-daked, dulemar-binsaed balamied. Degidbali, an e-ibmar-isgana-imakedba sabsur-odurdaked.

¹¹”Dule igar-maisulidba mani-ibedga-guedi, nuu-butu, igi nuu-baid-akwa-akwedae, deyobi gued. Dule-deyob-mani-ibedga-gusadi, sikwas-gudiidgi, gannar mani-sate gunonikoed, gannar dule-wilegedga gudoed.”

¹²Ani Jeremías, an weyob sogded: “Bab-Dummad, anmar-bese-goled-nega, ologana-gandikidba-yeerdakleged-negad, sailanagi bato agi be-nug odummoledanikid.

¹³¡Bab-Jehová, be Israel-dulemar-bendakega gued! Dulemar begi-aibatemaladi, bingegudmaloed. Dulemar begi-banguddamaladi, ukubgi-ibmar-narmaklegeyob yoggudmaloed. Ar Bab-Jehová-dii-nuedyob-gued iedmalad.

¹⁴”Bab-Jehová be an-nudake, adi, an nuguoed. Be an-abonoge, adi, an abonolegoed, unnila an be-nugbi odummoged.

¹⁵Ar dulemar anga sokardaed: ‘¿Ar bia Bab-Jehová-anmarga-ibmar-sogsadde? Anmarga-ibmar-sogsadi anmarga imakbi an abedo.’

¹⁶Bab-Jehová, an bega-ibmar-sogsadi be nue-wisid, ar an be-asabinni an bega ibmar sogsad. Degi-inigwele, an begi alamaknai gussulid, be we-dulemar sabsur-odurdakye, be we-dulemargi boni-dummagan-barmidaye an bega sogsasurbalid.

¹⁷Bab-Dummad, melle be an-ogwayega gue, ar boni-dummagangine, bee be an-bendakedid.

¹⁸¡Baba, melle bingeguega be an-imake! ¡We-dulemar be obingegsae! ¡Melle dobe-itogega be an-imake! ¡We-dulemar be odobgue! ¡Ibagan-bulegan ega be barmidage! ¡We-dulemar be obeloge! ¡Ilabogwadse be wioge!”

¹⁹Bab-Jehová weyob anga sogsad: “Be nae, neggwebur-yawagakse be gwisguna, bia Judá-reymar ubodae, degi, bia noardae, ase be gwisgunao. Geb, a-sorbali, bela Jerusalén-neggwebur-yawagak-bukmaladse be gwisgunabalo. Weyob be ega sogo:

²⁰‘Judá-dulemar-e-reymar, Bab-Jehová-gayaburba be itomar. Degi, bela Judá-dulemar, bela Jerusalén-dulemar we-yawagakgi-dogdimalad, Bab-Dummad-gayaburba be itomar.’ ”

²¹Bab-Jehová weyob soged: “Nue salakarmalo. Obunnoged-ibagi melle be ibmar-semalo, melle Jerusalén-yawagakgi ibmar-odomarbalo.

²²Deginbali, melle obunnoged-ibagi, be-negyagi ibmar-onomarbalo, degi, bipisaale, a-ibagi melle be arbamarbalo. We-obunnoged-iba iba-islidik be dakmalo. Igi an be-dadganga sogsagusa, deyob be dakmalo.

²³Degi-inigwele, be-dadgan an-itossurmalad, gwen an-sogedba ibmar imaksasurmalad, bur gwage-dutusuli gudmalad, gwen an-itossurmalad, degine, e-odurdaked abessurmarbalid.”

²⁴Bab-Jehová soged: “Ar bemar an-sogedba ibmar-imakmalale, gi we-neggwebur-yawagakba be ibmar-odosurmalale, unnila we-iba, iba-islidikidga be imakmalale, a-ibagi be ibmar-imaksurmalale,

²⁵we-neggwebur-yawagaknaba reymar, degi, reymar-masmala Rey-David-ologanagi sigmaloed. Reymar, reymar-masmala Judá-dulemar-abargi, degi, Jerusalén-dulemar-abargi ur-napaginedgi-sii dogmaloed, degi, moli-birgi-sii ubomaloed. We-neggweburgi dulemar bukwagu gumaloed.

²⁶”Judá-dulemar danikoed, dulemar-Jerusalén-neggwebur-dikarba-bukmalad danimaloed, degi, Benjamín-yalagi-bukwamalad danimarmogoed, degine, Sefela-yalagi-bukwamalad danimaloed. Degine, yalaganba-bukwamalad, degi, Neguev-yalaganba-bukwamalad danimarmogoed. Bab-Jehováʼse-goled-negse Bab-Jehováʼga-ibmar-ukega, ibmar-uklemalad sedanimaloed, degi, ibmar-ogumakar-uklemalad, orosgi-dakleged, degine, ina-wawagan, sedanimaloed. Deginbali, Bab-Dummadga dog-nuedye-sogega-ibmar-ukleged sedanimarbaloed.

²⁷Ar bemar anba-ibsasulile, an-igar-maidba obunnoged-iba iba-islidikidga be imaksurmalale, degi, Jerusalén-yawagak-dummagangi be ibmar-odomalale, an a-yawagakmar ogumakoed, dule gwen-oginnosulid, bela Jerusalén-reynegmar an ogumakoed.”