1Bab-Jehová weyob soged: “A-ibagangine, ani an bela Israel-dulemar-e-Bab-Dummadga guoed, Israel-dulemala an-dulaga gumarmogoed.”
2Bab-Jehová weyob soged: “Es-suidgi-burgwissurmaladi, nega-dulesulidganba obunnoged-aminadapmargu, egi-nued an binsasad.”
3Bab-Jehová anmarse dikasurgus magarosad, anmarga weyob sogsad: “Gusgu degisadegu an be-sabgudanikid, a-ulale, amba nue-wile an be-dakdiid.
4Israel-dulemar, gannar an be-urbemaloed. Gannar neggweburga an be-imakoed. Gannale gar-pandereta be suoed, weligwaledba be dodonai guoed.
5Gannar Samaria-yala-mullugangi, uvaʼmar be nasikmaloed. Dulemar uva-digmaloedi, e-uvaʼgi yeer-itodii gumaloed.
6Ibagwengine, dule-nakulemaladi, binnasuli Efraín-yala-mulluganba weyob gormakgwichi gumaloed: ‘Be dagmar. Sión-yalase anmar nakwenamar, anmar-Bab-Dummad-Jehová-yalase anmar namar.’ ”
7Weyob Bab-Jehová soged: “Weligwaledba be Jacob-wagan-nuggi namakmar, yeer-itogedgi neggwebur-biriginedga be gormakmar. Bab-Dummad-nug-odummoleged-itolegega be imakmar, weyob be gormar: ‘Bab-Jehová, be-dulamar be bendake, Israel-dulemar-napi-besad be bendake.’
8Bemar dad-nakwed-argan-sapiledsik-bukmaladi ani an bemar sedagoed. Bela napneg-ugakaase be bukmaladi, gannar danar wegi an bemar-urbemaloed. ¡Bela-belad-bur-ichesuli gannar nonimaloed! Amar-abargi, dala-satemalad danimarmogoed. Muya-muya-nanamaladi, siamar-gurgin-nikamaladi, degine, muugan-sikwigamaladi, danimarmogoed.
9Boed-abalagi danimaloed. Igar-nuedba sedaniki an saoed, igar-olloo-maidba dii-maidse an bemar-idudani guoed, a-igarbali, be gowarmaknadapi guosurmalad. Ani an, Israel-e-Babad, an-machi-sailanaginedi, Efraínʼad.
10”Dulemar-yar-baid-baidgi-bukmalad, Bab-Jehová-sunmaked be itomar. Neggwebur-dikasuli-bukmaladga be weyob gayaburba sogmar: ‘Israel-dulemar-oaisakisadi, a-dule gannar Israel-dulemar danar-oambikubaloed, igi sibad-wawaad-edarbed na e-sibad-akwe, deyobi, e-dulamar-akwemogoed.’
11Ar Bab-Jehová Jacob-wagan-abonosad, dule-gandikidgi ollor-imaksad.
12Nonimaloed, Sión-yala-birse weligwar namaknonimaloed, Bab-Jehová-ega-ibmar-nuegan-ukedgi yeer-itomaloed. Bab-Dummad ega we-ibmar ukoed: Orosgi-dakleged-trigo-nugad, vino-binid, olivo-gwallu, sibad-wawaadmar, moli-bebe-nikmalad, ega ukoed. Nainu-senigwad-nue-egi-arbalediidyob gumaloed, bar abgan-galagan itogosurmalad.
13Weligwaledba yagana gwirdemaloed, sapingana, weligwaledba serganmala gwirdemarmogoed. E-naibi-itodimalad bar nunmake itogosurmalad, gwagegi-baisur-itomalaga an imakoed. E-nunmak-itomalad, yeer-itogega an saoed.”
14Bab-Jehová soged: “Dule-irwa-anse-gormaladga ise-obinagwar ibmar an ukoed, an-ibmar-nuegangi an-dulamar yeer-itogoed.”
15Weyob Bab-Jehová soged: “Dulemar Ramáʼgi binnasuli-oimake itoleged, dulemar ise-boale, degi, nunmakedba-bukib-binsae itoleged. Wede Raquel, e-mimmiganga bonaid, dule-e-gwage-gadi-gadi-imaked abesulid, e-mimmigana bela ei girgusad.”
16Weyob Bab-Jehová soged: “Raquel, melle bar be boe, be-boed be bargae, ganna be sae. Ar be-wile-itogedi, bega ibmar-nuedga guoed. Be-mimmigan, e-isdarmalad-yargi nonikoed.”
17Bab-Jehová soged: “Yoedse bega ibmar-nueganbi guo-dakleged, be-mimmigana gannale e-yalase nonimaloed.
18”Efraín-dulemar weyob binnasuli-ogormake an itosad: ‘Sabsur-be-an-imaksad, moli-bebe-nikad-bipi binnasur-gunaidaedyob an gudinad, emide be an-odurdaksad an nued-itosad. Gannar bese-dagega be an-sae, adi, gannar an beba gudioed. Ar bee be an-Bab-Dummad-Jehová gued.
19An begi bangusad, degi-inigwele, an magar-itosgua, bukib an binsasad, binasgar dataa dukin an imaksad. Bingedar an itoged, mesagwar an itoged, sapingwa-akar an isgudaniguad.’ ”
20Bab-Jehová soged: “¿Ar Efraín an-Machi-sabed-sunnadsursi? ¿Bur Efraínʼbina an nue-itosursi? Gandikidba an ega ibmar-sokalile, an ebinsaardaed. Efraín bur bela-belad an-gwage-ebudaed, we bur an nue-wiledaked.
21”Israel-dulemar, igarba wilubgan be nasikmar, bia be nasmala, agine be-gannar be nasikmar, igargi nue be atakmalo. Israel-dulemar-yeerdaklegedi, gannar be dagmala, be-neggweburse gannar be dagmala.
22Bunagwa-uayasulidaedi, ¿ar sanagwadse be yoggus-gudiguoye be soge? Bab-Jehová, ibmar-gwapid we-napneggi imaksad. Ome sui-ebirdii guoed.”
23Israel-dulemar-Bab-Dummad-Jehová Bela-Gangued-Nikadi soged: “Judá-dulemar gannar-we-yalase an senonikile, Judá-yalagi, degi, e-neggweburmargi weyob gannar sogdamarbaloed: ‘Yala-islidikid, igar-innikigwadba-ibmar-imakleged-neg, Bab-Jehová begi nued binsasun.’
24”Agine Judá-dulemar ambikumaloed, bela dule sapurgi-arbamalad, degi, moli-edarbemalad ambikumaloed.
25Dule uku-uku-itomaladi, an ogoboed. Dule ukumaada-itomaladi, masgi an ogunnoed.”
26Ani Jeremías, nue-gabmai, an ataas naded. Ibiyobi, negburgan-daksadi an nued-daksa.
27Bab-Jehová weyob soged: “Ibagan-dani, Israel-yalagine, degi, Judáʼgine dulemar-bukidar-ambikuega an imakoed, degi, ibmar-durgan bukidar-merguega an sabaloed.”
28Bab-Jehová soged: “Igi an bemarbina bemar-obelogega, bemar-wiogega, sabsur-bemar-imakega, degi, bemargi-gwichiguega, degine, bemargi bonigan-barmidagega an ibmar-imaksagusa, deyobi, an bemarbina bemar-urbega, degine, bemarga neggweburmar-sobega ibmar-imakdii gubaloed.
29A-ibagangine bar soglegosulid: ‘Babgan uva-soled guchaye, a-ulale, e-mimmigan nugar-iii-naddaye, bar soglegosulid.’
30”Emisgindi, bar deyob soglegosulid. Dule uva-soled-guchale, na-ee nugar-iii naoed. Wegisundo, na wala-walagwena e-isguedba burgwemaloed.”
31Bab-Jehová weyob soged: “Israel-dulemarbo, degi, Judá-dulemarbo an igar-binid-mesoed-ibagan dani.
32E-dadganbo-igar-mesisadyobi, an igar mesosulid. Deunni, Egipto-yalagi an e-dadgan-onosgu, anbo-igar mesisgusad. Angadga gusmar-inigwele, anbo-igar-mesisad bichismalad.”
33Bab-Jehová soged: “A-ibagangine, Israel-dulemar-ebo an weyob igar mesoed: E-gwage-ulubgi an-igar an ega nasikoed, e-binsaedgi an-igar an ega narmakoed. Ani an e-Bab-Dummadga guoed, emar an-dulaga gumarmogoed.
34Bar dule, dule-baid odurdakosulid, degi, bar dule, e-gwenad odurdakosulid, ega weyob bar sogosulid: ‘Bab-Jehová be amimala.’ Ar bela burwiganase, degi, serganse-bakale, an-amimaloed. Ar e-isgumaladi, isgussulidyob an dakoed, bipisaale bar an e-isgusadgi binsaosulid.”
35Bab-Jehová, Bab-Jehová-Bela-Gangued-Nikad, dad-ibeler-ibgi-gaega-nasiksadi, degi, nii, niisgwamar, mutik-gaega-imaksadi, degine, demar-uurmakega-osukamakedi, weyob soged:
36“We-igarmar-mamaidgi anga gwatirnonikile, a-ibagine, Israel-dulemar bar an-dulamarga gussuliled.”
37Bab-Jehová soged: “Dule, nibneg-matugued wilubsasale, degi, napneg-urba napneg-sailagan-mamaid wisgusale, ibmar-isgana-imaksamalad-ulale, an Israel-dulemar obachaled.”
38Bab-Jehová weyob soged: “An-neggwebur gannar soblegoed-ibagan dani. Nakuleged-galu-Hananeelʼye-nugad-akar yawagak-Ánguloʼye-nugadse neggwebur ambikuoed.
39We-akale, ibmar-wilubsaed-dub-baksa, Gareb-yar-mulluse naguoed. Geb Garebʼgi-baksa Goa-neggweburse aibiridoed.
40Bela neba-naidgi bia dulemar-mui-diglege, degi, burumar-milege bela angadga nugsalegoed. Degine, bela-nainumarnanaid-akale, Cedrón-dian-maidse, degine, dad-nakwedsik molimar-yawagak-gwichidse angadga nugsalegoed. Bipisaale, we-neggwebur bar berguosulid, degi, bar bibisgosulid. Degisadegu sii guoed.”
