Jeremías 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Dii bar wimaisulid-ular, Bab-Jehová Jeremíasʼga sunmaknonikid. Ega weyob sognonikid:

²“Judá-dulemar nue-bukib binsabukmalad, e-neggweburmar bergumamaigusad. Judá-neggweburgine, bela oakubukmalad, Jerusalén-dulemar bela binnasuli bobukmalad.

³Dule-nuga-nikamaladi, dule-ega-arbamalad ega dii-amiega barmiddaed. Dia-dummagan-siidse naddamalanad, degi-inigwele, diimar satedaed. Binged-abalagi gannar e-gwidu-ollo-ollo negse nonidamalad. Nue-naibi-itogedbali, e-nono gasa imakdamalad.

⁴Yalagi dii bar wisulidbali, napamar daas-daas naded. Dule-sapurgi-arbamaladi akusunna na itogusmalad, bukib binsagusmalad.

⁵Ar goe-sapurmarbela, gaganmar-bergusad-ular, sapurgi e-mimmi-mete naddamarsunnad.

⁶Moli-sapur-uayasuid, yar-mullugan-swiligangi achu-sapur-uaya-gannagannayob, masbina asa-nakwa-nakwa gudidamalad. Ar gaganmar-satesoggu, e-ibyamar mommoleddaed.”

⁷Ani Jeremías Bab-Jehováʼga sogded: “Bab-Jehová, anmar-isgued amba anmargi-yolena-inigwele, be-nug na-be-nue-sabedbali be anmar bendakdage. Ar anmar-isgued bukidargusad, anmar begi nue-isgusmalad.

⁸Bab-Dummad, ar be Israel-dulemar-abonogedid. Israel-dulemar suli-suli-itoalile, begi bendakleged. ¿Ar ibiga degite, be we-yalagi dule-baidyobi bakar-nadapi be gusunna? Emide be, igi dule-aineba-danikid ibagwen-wis-gabis-naddaedyob be gued.

⁹¿Ar ibiga be akusunna-ibmar-itogedyob be dasunna? ¿Ar ibiga be dule-bilagi-urwed gege-dule-bendakedyob be dasunna? Bab-Jehová, be anmar-abargi gudiid, bela dulemar wisid, anmar begadga gued. Melle be anmar-obane, wile be anmar-dake.”

¹⁰Bab-Jehová weyob bemarnik soged: “Ar be-itolegedba-gaamakdiid bur yeer-itomalad, gwen bogigusurmalad. A-ulale, an bemar-abingabisulid. Emisgindi, aka be, bemar-isguedgi-binsaega be an-imakarmalad, degisoggu, bemar-isgued-ular, be anse sabsur-odurdaklemarsunnoed.”

¹¹Geb Bab-Jehová weyob anga sokalid: “Jeremías, melle we-dulemar-bendakega be anse wilesakwaa golo.

¹²Ar anse-goled-ular, mas-gunsuli-gumalale, amba an itogosulid. Ar amba anga ibmar-ogumakar-ukmalale, anga ibmar-gwagmar-ukmalale, amba an abingaosulid. Es-suidgi an we-dulemar obelogoed, degi, ukudgi, boni-dummagangi an we-dulemar obelogoed.”

¹³Bab-Jehová-abin an sogded: “¡Bab-Dummad-Jehová! ¡Nunmaked-dummaddo! Ar Bab-Dummad-gayaburba-barsogedye-sogdimaladi, sunmakdimalad, we-dulemarde es-suidgi burgosurmarye, ukud-dummad-naguosurye sogmalad. Unnila, bede, we-yalagi ega neg-bogidikid-degisadeguad-ukoye sogdimalad.”

¹⁴Geb Bab-Jehová an-abin sogded: “Wedi, gayaburba-barsogmalad an-nuggi gakansaar sunmakdimalad. Gwen an we-dulemar barmissulid, gwen an ega an-nuggi-sunmakega igar uksasurbalid, gwen an ega sunmakdisulid. We-dulemar-sunmakmaladi, unnila binsa yogasaar na wargwen-ibya-apuredba sunmakdimalad, binsa ee gordimalad, dukin-yogasaar-e-itogedba sunmakmalad.”

¹⁵A-ulale, weyob Bab-Jehová soged: “We-dulemar an gwen-barmissulidi, an-nuggi sunmakmarye-sogmaladi, degine, na sogmarbalidi, we-yalagi dulemar es-suidgi burgosurye, ukud-dummad naguosurye. Ar wemala, na ukudba burgwemaloed, e-sunnagwad es-suidgi burgwemaloed.

¹⁶”Degine, dule-we-sunmakmalad-itosmaladi, Jerusalén-neggwebur-neg-imbabali ukudba mellemamai gumaloed, es-suidgi oburgwilemaloed, igarba-mellemamai gumaloed. E-omegan-e-muimar, e-masmala-e-muimar, e-bunamala-e-muimar gwen dule digosurmalad. Ar dule-muimar-digedbela sate gumaloed. Ar bela e-isgumalad egi aibinega an imakoed.

¹⁷”Be, Jeremías, we-dulemarga weyob be sogo: ‘Bane-bane an ise-boale gudii guoed, ar an-dulemar-na-nue-sabedi, nue-dummad wilesad. Bela-belad nue-sabsur odursaklesad.

¹⁸Sapurba an nadele, es-suidgi-dulemar-burgwisad-e-mui omilede an dakdaed. Neggweburgi an dogdele, ukudba-dulemar-burgwisad-e-mui omilede an dakdaed. Ar Bab-gayaburba-barsogmaladdi, degi, dule-irwa-Babse-gormaladbela, neg-gunaid akudakmalad.’ ”

¹⁹Ani Jeremías, Bab-Dummad-abin sogded: “Ar be Judá-dulemar nue-obachad, isdarsun be Jerusalén-dulemar daked. ¿Ibiga be dogdar sabsur-anmar-wiosa? Aisaar anmar bendakleged edarbediinad. Emide, gwen anmar ibmar-nued abingassulid. Anmar san-nued-gudigued edarbediinad, aka gwayed-dummad anmarga nonikid.

²⁰Bab-Jehová, anmar, anmar-isgusad magar na itoged. Anmar-babgan-begi-isgusad anmar magar-dakbalid. Anmar begi dummad-isgusad.

²¹Be-nug be nue-sabedbali, melle be isdar anmar-dake. Be-ologana-yeerdakleged-e-neg melle be isdar-dake. ¡Be anmarbo-igar-mesisad nue be ebinsae! ¡Melle be anmarbo-igar-mesisad bisge!

²²Bab-Dummad, ¿ar bab-dummagan-imbagi, gwensak dii-nabir-owied gudisi? Suli. Bab-Dummad-Jehová, ¿ar bee be, dii-owisursi? ¿Ar nibnega e-itolegedba dii-owiardasi? Suli. Ar bela be we-ibmarmar imaksad. A-ulale, anmar begi bensurmalad.”