1Bab-Jehová Jeremíasʼga sognonikid.
2“Ani Israel-dulemar e-Bab-Dummad-Jehová soged: An bela bega ibmar-sogsad gardagi be narmako.
3Ar ibagan danikid, an-dula-Israel-dorgan, degi, an-dula-Judá-dorgan gales-bukmalad gannar an wese sedagoed. An e-dadganga-yala-uksadse an sedagoed, a-yalagi na yeer-itobukwa gumaloed.”
4Bab-Jehová Jeremíasʼga Israel-dulemargi sunmaksad, degi, Judá-dulemargi sunmaksad.
5Weyobi Bab-Jehová soged: “Dule dobedba binnasuli-gorbukwa itolesad, gwayale-gwayale oimakbukwa itolesad, neg-bogidikid itolesulid.
6Yamo be dakena, ese be egisena, machergan, omeganyobi muu-neggi nagusogeye. Degite, ¿ibiga machergana, siamar-muuneggi-nagueyobi, musiragi alamaknanai an daksunna? ¿Ar ibiga e-wagarmar bela sipuu daklesunna?
7¡Duledar-wiles! Ibagan-bulegan, ibagan-weyobid-dakledisulid omos. Jacob-dulemarga, suli-suli-itoged-ibaga guoed, degi-inigwele, we-ibagan-bulegangi ollorgumaloed.”
8Bab-Jehová-Bela-Gangued-Nikad soged: “An-dulamar mailediidgi an onogoed, atinnaryob-ebipilediid an esikoed. Dulemar-baigan-e-maiga bar guosurmalad.
9Unnila bemar be-Bab-Dummad-Jehováʼsebi, be gordii gumaloed. Be-e-reyga be arbadii gumaloed. Rey, Davidʼyobid an bemarga barmidagoed.”
10Bab-Jehová soged: “An-dula-Jacob-wagan, melle be gwayemar. An-dula-Israel-wagan, melle be dobee itomar. Jacob-wagan, ar an we-yargi be-onogoed, ar be-wagan-Babiloniaʼse-gales-selesmalad an onogoed. Gannar be bogidik-gudii guoed. Dobedsuli be garmakdii guoed, dulemar bar be-ogwayosurmalad.”
11Bab-Jehová soged: “An be-bendakega be-yalaba gwichid. Bia an be-oaisakismala, a-yarmala an bela-naitinagase obelogoed. Degi-inigwele, bemardi an be-obelogosulid, unnila igar-innikigwadba an sabsur-bemar-odurdakoed, an bemar-odurdaksuli an guosulid, an bemar-odurdakedsegad.”
12Bab-Jehová weyob soged: “Be-boni-amisad geg nudakleged, be-boni-yaa-siidga bendakleged-igar sulid.
13Bega-igar-nudakega dule-be-ulagwisgued sated, ar be-boniga bendakleged-igar sulid, ar be-boni-nikadga nugued-igar sated.
14Bela bebo-galagwensur-nanasmalad be-iesmalad, bar bemar-amiedgi binsasurmalad. Be, dummad-ibmar-isgana-imaksad-ulale, degi, be, dummad-isgusad-ulale, an be-sarsosad, degi, a-ulale, an be-odurdaksad. Igi dule-isgana dule-sabsur-imakdamalayob an bemar-imaksad.
15¿Ibiga nunmakedba be binnasuli gole? Ar be-bonide gege-nudakleged. Be, dummad-ibmar-isgana-imaksad-ulale, degi, be dummad-isgusad-ulale, an weyobi bemar-imaksad.
16”Bela be-wiomaladi, bela wiolemarmogoed, bela be-isdarmalad gales-seledmaloed. Begi-dii-dii-annamaladi, egi dii-dii annalemarmogoed, bela dulemar-bei-ibmar-sumaladi, bela ei ibmar sulemarmogoed.
17Gannarse an be-onudakoed, be-boni-amisadi an bega osulogoed. Ar be-isdarmalad sogmalale, Sión-yala oballessiiye, dule bar Sión-yalagi binsasurmarye. Deyob sokarmalar, gwen akarsulid.”
18Bab-Jehová weyob soged: “Jacob-wagan-gales-bukmalad gannar an sedagoed, Jacob-wagan an nue-wiledakoed. Neggweburmar gannar e-ambikusadgi ambikuoed, reyneg gannar iduar-sii gusadgi sigoed.
19Neg-galimbabali, dog-nuedgi-namakleged itoledagoed, degi, weligwaledba binnasuli-oimake itoledagoed. Be-anagan an bega omelomai imakoed, bega ichegumai guosulid. Be-nug-ogannodii an imakoed, mesagwar-imakledii be guosurmalad.
20Be-mimmigana, idualedyobi gumaloed, an-asabinni gannarse-bukwa gumaloed. Ani an, bela dule-mesagwar-be-imakmalad obelogoed.”
21Bab-Jehová soged: “Bemar-abargi, bemar-iduged nodagoed, a-dulegine, bemarga-negseed danikoed. An-walikaa-guega an imakoed, anba gudii guoed. Degite, ¿doa an-walikaa anse-dagega guakwasunna?
22Bemar anse alile, be an-dulaga gumaloed, ani an, bemar-Bab-Dummadga gumogoed.
23”An-urwedi burwa-dummad-goleyob gued. Burwa-bipirmakaledyobi gwichigualid, dule-ibmar-isgana-imakmaladgi, gwichigunonikoed.
24An-urwedi gwen-bogguosulid, bela an-ibmar-abemaid-imakedse, an-urwed bogguoed. Geb bela we-ibmarmar-gusadgi, be magar itononimaloed.”
