IOSUA 1:11-16

¹¹Taruha amo ba raka hanai, taunimanima ba haḡanidia, baoto “Amui dala lakwana bavabia heḡaeḡae, badina be dina toi basie ore ai na ina Ioridane sinavaina ba hanaia, Iehova, emui Dirava, ese be henimuimu tanona ai ba raka vareai, bona bavabia emui tano.”

¹²Bena Iosua ese Ruben iduhuna taudia bona Gad iduhuna taudia bona Manase iduhuna kahana taudia e hamaorodia, eto,

¹³Iehova ena hesiai tauna Mose e haḡanilaimui herevana ba laloa tao. Ia eto “Iehova, emui Dirava, ese emui laḡa-ani gabuna baine henimui bona ina tano danu baine henimui e tomu”.

¹⁴Adavamui bona natumui maraḡidia bona emui boromakau na hari Mose e henimui tanona ai bae noho, Ioridane sinavaina inikahana ai; a tuari mai dibamui taumui iboumui ai na emui tuari ḡaudia bavabi kau, tadikakamui vairadiai ba raka hanai, ba durudia,

¹⁵ela bona Iehova ese tadikakamui edia laḡa-ani gabuna baine henidia, umui e henimui heḡereḡerena. Bena idia danu Iehova, emui Dirava, ese be henidiamu tanona bae abia, edia tano ai bae halaoa. Una negana ai, umui emui tano, Iehova ena hesiai tauna Mose ese e henimui tanona Ioridane sinavaina mairiveina kahan ai, vada ba lou henia bona ba noholaia.

¹⁶Bena idia ese Iosua e haere henia, eto, Vada o haḡanilaimai karadia iboudiai baia kara, bona ba siaimai gabudia baiala.