Iliga꞉felo꞉ 8:18-27

¹⁸Iliga꞉felo꞉ kaluwa꞉lo꞉ dagiya꞉ golab amio꞉ Mama ko꞉lo꞉ diab a꞉no꞉ ba꞉da꞉ga꞉yo꞉, Saimon eyo꞉ a꞉la꞉ a꞉no꞉ moleya꞉ kililia꞉no꞉ asulaki, a꞉la꞉mo꞉wo꞉ dabu ba꞉ba꞉, “Gaindo꞉ man dimidab ko꞉ aumbo꞉, niyo꞉lo꞉ dagiya꞉yo꞉ kalu nolo꞉ golalikiyo꞉ Mamayo꞉lo꞉ dima꞉ki, halaido꞉ gaindo꞉ ko꞉ nelo꞉ dia꞉niki kililia꞉nigo꞉l.”

²⁰Ko꞉sega Bida eyo꞉ a꞉ma꞉la꞉bo꞉ a꞉la꞉sio꞉, “Godeya꞉ boba kelego꞉ we gi moleya꞉ kililia꞉no꞉ a꞉la꞉liki asulab ko꞉lo꞉ go꞉no꞉n o꞉lia꞉ mole gilo꞉ a꞉no꞉lia꞉yo꞉ de hena soma꞉ni ha꞉na꞉bi.

²¹Gi asulo꞉wo꞉ Godeya꞉ siwa꞉l amio꞉ digalo꞉leyo꞉ mo꞉a꞉lab ko꞉lo꞉ nanog naindo꞉ dio꞉l we, ge o꞉lia꞉ mada mo꞉lido꞉.

²²Mogago꞉ gilo꞉ dimido꞉ a꞉no꞉ ta꞉ta꞉sa꞉ga꞉, Godemo꞉ foga꞉le sama. Giyo꞉ a꞉la꞉dimidalikiyo꞉, asulo꞉ gilo꞉ amio꞉ kele asulo꞉ a꞉no꞉ ga꞉lila꞉ma꞉ibele a꞉la꞉asulo꞉l.

²³Mo꞉wo꞉ ge meselo꞉wo꞉ alan dowaki, man mogago꞉ ko꞉lilo꞉ a꞉ma꞉yo꞉ ge meleya꞉fo꞉lab.”

²⁴A꞉la꞉sa꞉labiki, Saimon eyo꞉ a꞉ma꞉la꞉bo꞉ a꞉la꞉sio꞉, “Kelego꞉ gaindo꞉ sa꞉lab a꞉no꞉ ne amio꞉ fa꞉la꞉dowaba꞉na꞉kiyo꞉, ne mada gaino꞉ Godemo꞉ dulugu sama.”

²⁵A꞉la꞉ma꞉yo꞉ Alana꞉ to o꞉lia꞉ a꞉la꞉mo꞉lo꞉ dimido꞉wo꞉ o꞉lia꞉yo꞉ malolo꞉ mia꞉sa꞉ga꞉yo꞉, a꞉ma꞉la꞉ Ya꞉lusalem ha꞉nakiyo꞉, Samalia amisa꞉n nol amio꞉lo꞉ to nafale a꞉no꞉ ko꞉lo꞉ wida꞉li ane.

²⁶A꞉la꞉fo꞉ko꞉lo꞉ Godeya꞉ ma꞉mul kaluwa꞉yo꞉ Filibo꞉wo꞉ a꞉la꞉sio꞉, “Ge dimidalia꞉ga꞉, kalalili hen a꞉namio꞉, tog nowo꞉ Ya꞉lusalem a꞉la꞉ta꞉ga꞉ Gasa amisa꞉n a꞉na ha꞉na꞉sen a꞉lab ko꞉lo꞉ ge a꞉na tiha꞉na꞉bi.”

²⁷A꞉la꞉sa꞉labiki, Filib e tog a꞉na ha꞉na꞉lena, Itiobia kalu nowo꞉ a꞉na yabiki ba꞉ba꞉. Kalu a꞉ma꞉ ito꞉wo꞉ dugula꞉. Kalu a꞉no꞉ Itiobiaya꞉ misa꞉ ka꞉isale, Kandasiya꞉ ene nanogdo꞉ dian kalu alan nowo꞉ e. E Kandasiya꞉ moleyo꞉ a꞉la꞉ta꞉ga꞉ kelego꞉ nafalelo꞉ tambo bo꞉fo꞉lowano꞉ e. E Godeyo꞉ wabuluma꞉niki, Ya꞉lusalem ane ko꞉lo꞉ a꞉ma꞉la꞉ ya꞉lena ba꞉ba꞉.