1Sesalia amisa꞉n a꞉namio꞉, kalu nowo꞉ ene wiyo꞉ Konilius a꞉na sen. Eyo꞉ Loma꞉ ami kalu “Itali” a꞉la꞉sa꞉lan us a꞉namio꞉ nanogo꞉ dimidaki, e da꞉la꞉di fudo꞉ otalen bo꞉fo꞉lowan kalu nowo꞉ e.
2Konilius o꞉lia꞉ ene eso꞉lo꞉ o꞉lia꞉ma꞉yo꞉ Godeya꞉ mando꞉ kudu ha꞉na꞉likiyo꞉, iyo꞉ ho꞉leno꞉ tambo Godemo꞉ dulugu sa꞉la꞉len a꞉la꞉ta꞉ga꞉ Yu kalu molelo꞉ma wa꞉feyo꞉ o꞉mo꞉wo꞉ dimia꞉len.
3Ho꞉len no amio꞉, ofa꞉si ga꞉lo asola dowabiki, e ho꞉le ba꞉dakiyo꞉, Godeya꞉ ma꞉mula꞉ kaluwo꞉ elo꞉wa ya꞉sa꞉ga꞉ a꞉la꞉sio꞉, “Konilius!”
4A꞉la꞉sa꞉labiki, Konilius e ba꞉da꞉kiyo꞉, tagilaki a꞉la꞉sio꞉, “Kalu alan, o꞉ba?” A꞉la꞉dabuba꞉dabiki, ma꞉mula꞉ kaluwa꞉yo꞉ emo꞉wo꞉ a꞉la꞉sio꞉, “Gilo꞉ dulugu sa꞉la꞉seno꞉ a꞉la꞉ta꞉ga꞉ boba kelego꞉ ko꞉lo꞉ wa꞉feyo꞉ kalumo꞉lo꞉ dimia꞉sen a꞉no꞉lo꞉, o꞉go꞉ Godemo꞉lo꞉ boba dimi o꞉ngo꞉ fa꞉la꞉dowo꞉ ko꞉lo꞉ Godeya꞉yo꞉ a꞉no꞉ ba꞉da꞉ga꞉ sagalab.
5A꞉la꞉fo꞉ko꞉lo꞉ Saimon Bida e mena꞉ki, o꞉go꞉ ge kalu nolo꞉ Yoba amisa꞉na iliga꞉foma. Bida e no꞉ do꞉go꞉fdo dinafaya꞉sen kalu, Saimon o꞉lia꞉ so꞉lu ho꞉n aniba sab ko꞉lo꞉, e gelo꞉wa mena꞉ki, kalu nolo꞉ iliga꞉foma.”
7Ma꞉mula꞉ kaluwa꞉yo꞉ a꞉la꞉sa꞉la꞉sa꞉ga꞉ ha꞉na꞉ga꞉ dotabiki, Konilius eyo꞉ ene nanogdo꞉ dian kalu a꞉la꞉ a꞉la꞉ta꞉ga꞉ ene da꞉la꞉di nowo꞉ elo꞉wa mena꞉ki ho꞉ido꞉.
8Konilius elo꞉ dabu a꞉no꞉ imo꞉wo꞉ tambo malolo꞉ mia꞉sa꞉ga꞉, i a꞉no꞉ Yoba amisa꞉na iliga꞉fo꞉.
9Ho꞉len no amio꞉ iyo꞉ ha꞉na꞉la꞉ga꞉yo꞉, amisa꞉no꞉ ko꞉na꞉ma fa꞉la꞉doma꞉niki disi dowabikiyo꞉, Bida e Godemo꞉ sa꞉ma꞉ni, a fa꞉sa wa꞉la fa꞉la꞉ ane.
10E a꞉na siliki, maiyo꞉ alan dowabiki, ma꞉no꞉wo꞉ sofa꞉ki sa꞉la꞉sa꞉ga꞉, iyo꞉ ma꞉no꞉ soda꞉lab amio꞉, e ho꞉le ba꞉ba꞉.
11Eyo꞉ ho꞉le ba꞉dakiyo꞉, Hebeneyo꞉ kolaita꞉sa꞉ga꞉, kelego꞉ nowo꞉ helebeso꞉g alan o꞉ngo꞉ ko꞉lo꞉ migif fa꞉la꞉da꞉in amio꞉ ta꞉lidota꞉ga꞉, ololo to꞉lo꞉lo꞉ ko꞉lo꞉ tindabi ba꞉ba꞉.
12Helebeso꞉g us amio꞉ no꞉ ko꞉li ko꞉lilo꞉ a꞉la꞉ta꞉ga꞉ sowa꞉ a꞉la꞉ta꞉ga꞉ o꞉ba꞉ ko꞉li ko꞉lilo꞉, Godeya꞉lo꞉ na꞉so꞉boka꞉ a꞉la꞉likilo꞉ saefa꞉ a꞉no꞉lo꞉ a꞉na delena ba꞉ba꞉.
13A꞉no꞉ ba꞉da꞉sa꞉ga꞉yo꞉, to nowo꞉ a꞉la꞉sio꞉, “Bida, ge dasima! No꞉ we yasala꞉sa꞉ga꞉ maiya!”
14A꞉la꞉sa꞉labiki, Bida eyo꞉ a꞉ma꞉la꞉bo꞉ a꞉la꞉sio꞉, “Alan, ne a꞉la꞉bo꞉ mada mo꞉dimidama꞉no꞉! Yu kaluwa꞉ ele difa꞉ usamilo꞉ ‘Na꞉so꞉bo’ a꞉la꞉do꞉ saefo꞉ a꞉no꞉ ne mada mo꞉nan.”
15A꞉la꞉sa꞉labikiyo꞉, towo꞉ emo꞉wo꞉ wa꞉ka a꞉sio꞉, “Godeya꞉lo꞉ ‘gemo꞉lo꞉ we nafa ko꞉lo꞉ o꞉li na꞉bika꞉’ a꞉la꞉do꞉ sio꞉ a꞉no꞉, giyo꞉ ma꞉no꞉ a꞉no꞉ Godeya꞉ siwa꞉l amio꞉ mogago꞉ a꞉la꞉likiyo꞉ sa꞉la꞉so꞉bo” a꞉la꞉sio꞉.
16A꞉la꞉dimida꞉lowo꞉wo꞉ otalen fa꞉la꞉dota꞉ga꞉, wigibo a꞉na꞉ka kelego꞉ a꞉no꞉ a꞉ma꞉la꞉ Hebene dia꞉gane.
17Bida eyo꞉ ho꞉le ba꞉ba꞉ a꞉ma꞉ ha꞉go꞉ kedelena, Koniliusa꞉lo꞉ iliga꞉fo꞉ kalu i a꞉no꞉ amisa꞉na fa꞉la꞉dowa꞉ta꞉ga꞉, Saimona꞉ ayo꞉ keda꞉i ya꞉ga꞉, a elo꞉ a꞉na fa꞉la꞉dowo꞉.
18Iyo꞉ a꞉na fa꞉la꞉dowakiyo꞉, “Saimon Bidayo꞉ wiyo꞉ saba?” a꞉la꞉ ho꞉le dabu.
19Bida eyo꞉ ho꞉le ba꞉ba꞉ a꞉ma꞉ ha꞉go꞉ o꞉kedelen amio꞉, Godeya꞉ Mamaya꞉yo꞉ emo꞉wo꞉ a꞉la꞉sio꞉, “Saimon, kalu otalena꞉yo꞉ ge kedab ko꞉lo꞉ ge dasila꞉sa꞉ga꞉, ha꞉g holona timana. I a꞉no꞉ No꞉no꞉n gelo꞉wa iliga꞉fo꞉ ko꞉lo꞉ ge i o꞉lia꞉ ha꞉nakiyo꞉ kele asulakiyo꞉ ha꞉na꞉so꞉bo.”
21A꞉la꞉sa꞉labiki da꞉da꞉sa꞉ga꞉yo꞉, Bida e ha꞉ga tina꞉sa꞉ga꞉, imo꞉wo꞉ a꞉la꞉sio꞉, “Gililo꞉ keda꞉i mio꞉wo꞉ ne ko꞉lo꞉ giyo꞉ nelo꞉ amilo꞉ mio꞉we mo꞉wo꞉ o꞉ba?”
22A꞉la꞉dabu ba꞉dabiki, iliyo꞉ a꞉la꞉sio꞉, “Loma꞉ da꞉la꞉di bo꞉fo꞉lowan kalu Konilius, nio꞉ e iliga꞉tabiki, gelo꞉wa mio꞉. Konilius, e man digalo꞉ kuduha꞉nakiyo꞉, Godeya꞉ mando꞉ kudu ha꞉na꞉sen ko꞉lo꞉ Yu kaluka꞉isale tambo e ko꞉lo꞉ wabuda꞉sen. A꞉la꞉ta꞉ga꞉ Godeya꞉ ma꞉mula꞉ kaluwo꞉ elo꞉wa ya꞉sa꞉ga꞉ sa꞉lakiyo꞉, ‘Bida elo꞉ to sa꞉lab a꞉no꞉ gelo꞉ da꞉ba꞉niki, e mena꞉ki ho꞉lema’ a꞉la꞉sio꞉ ko꞉lo꞉ mio꞉.”
23A꞉la꞉sa꞉labiki, Bida eyo꞉ iyo꞉ a꞉na alima꞉ki, a usa tilia꞉gane. Iyo꞉ alita꞉ga꞉yo꞉, kea꞉fo amio꞉ Bida o꞉lia꞉ Yoba tilidabu ao i nol o꞉lia꞉ Koniliusa꞉lo꞉ iliga꞉fo꞉ kalu a꞉no꞉lia꞉ iyo꞉ a꞉ma꞉la꞉ ha꞉na꞉ni ane.
24Ho꞉len imiligo꞉ alita꞉ga꞉yo꞉, Sesalia amisa꞉na fa꞉la꞉dowo꞉. Konilius eyo꞉ i a꞉no꞉ mia꞉ib a꞉la꞉bo꞉ asula꞉sa꞉ga꞉, eyo꞉ ene so꞉lo꞉ o꞉lia꞉ ene milileyo꞉ elo꞉wa kegenefo꞉liki yasilo꞉.
25A꞉la꞉fo꞉ko꞉lo꞉ Bida e a usa tinabikiyo꞉, Konilius eyo꞉ Bidayo꞉ ebea꞉sa꞉ga꞉yo꞉, e wabudaki gulalu asi.
26Ko꞉sega Bida eyo꞉ e gasiliakiyo꞉ a꞉la꞉sio꞉, “Dasima, nelo꞉ kalu ge o꞉ngo꞉” a꞉la꞉sio꞉.
27Bida eyo꞉ e o꞉lia꞉ nenela꞉liki, a usa tina꞉ga꞉, kaluka꞉isale kegeo꞉wo꞉ modo꞉ ko꞉lo꞉ sena ba꞉ba꞉.
28Bida eyo꞉ kalu kegeo꞉ o꞉mo꞉wo꞉ a꞉la꞉sio꞉, “Yuwa꞉ ele amio꞉, Yu kaluwa꞉yo꞉ ha꞉la꞉ kalu o꞉lia꞉yo꞉ ualo꞉ gasaya꞉so꞉bo a꞉la꞉saefa꞉. Ele a꞉no꞉ gio꞉ asulo꞉ ko꞉sega niyo꞉ kalu nowo꞉ ‘Godeya꞉ siwa꞉l amio꞉ e mogago꞉’ a꞉la꞉bo꞉ mo꞉sama꞉ki asulakiyo꞉, Godeya꞉yo꞉ nemo꞉ wido꞉.
29A꞉la꞉fo꞉ko꞉lo꞉ giyo꞉ ne mena꞉ki ho꞉idabikiyo꞉, ne mo꞉mo꞉beaki mio꞉ ko꞉lo꞉ gilo꞉ kalu nelo꞉ amio꞉ iliga꞉fo꞉ a꞉no꞉ o꞉bo꞉ sa꞉ma꞉nigo꞉wo꞉?”
30A꞉la꞉sa꞉labiki, Konilius eyo꞉ a꞉ma꞉la꞉bo꞉ a꞉la꞉sio꞉, “A꞉ma꞉ inali amio꞉, ne ofa꞉siyo꞉ ga꞉lo asola dowabikiyo꞉, ne aya siliki, Godemo꞉ dulugu sa꞉la꞉li sen amio꞉, wigibole a꞉naka kalu nowo꞉, helebeso꞉g ho꞉lo꞉, siyo꞉ funa꞉ a꞉la꞉ma꞉no꞉ ko꞉lo꞉ a꞉no꞉ nelo꞉wa fa꞉la꞉dowakiyo꞉, nemo꞉wo꞉ a꞉la꞉sio꞉, ‘Konilius, gilo꞉ Godemo꞉lo꞉ dulugu sio꞉ a꞉no꞉ Godeyo꞉ dabu. A꞉la꞉ta꞉ga꞉ gilo꞉ wa꞉feyo꞉ kalumo꞉lo꞉ boba dimisen a꞉no꞉ E asulaki go꞉.
32A꞉la꞉fo꞉ko꞉lo꞉ ge kalu nolo꞉ Yoba amisa꞉na iliga꞉ta꞉ga꞉, Saimon Bidayo꞉ nelowa mena꞉ki, sa꞉ma꞉ hamana. Bida e kalu noma꞉ aya sab. Kalu a꞉ma꞉ wi a꞉no꞉lo꞉ Saimon ko꞉lo꞉ e so꞉lu ho꞉n aniba siliki, no꞉ do꞉go꞉fdo dinafaya꞉liki ta꞉sen’ a꞉la꞉sio꞉.
33A꞉la꞉fo꞉ko꞉lo꞉ ge nelo꞉ wena mena꞉ki, niyo꞉ kalu we gelo꞉ amio꞉ bo꞉i iliga꞉fo꞉ ko꞉lo꞉ ge mada o꞉li mio꞉. A꞉la꞉go꞉ko꞉lo꞉ nio꞉ o꞉ma Godeya꞉ siwa꞉l amio꞉ tambo kegenelia꞉ga꞉lo꞉ sen we, Godeya꞉lo꞉ gemo꞉lo꞉ sama꞉kilo꞉ sio꞉ a꞉no꞉, nilo꞉ da꞉ba꞉niki so꞉l.”
34A꞉la꞉sa꞉labiki, Bida eyo꞉ a꞉la꞉sio꞉, “Niyo꞉ o꞉go꞉ fanda asulakiyo꞉, Godeya꞉yo꞉ henfelo꞉ kaluka꞉isale ko꞉li ko꞉lilo꞉ sab o꞉mo꞉wo꞉, mano꞉ imilig dimida꞉sen.
35Kaluka꞉isale abeyo꞉, man digalo꞉le dimidaki, E ha꞉ga dowalega, Godeya꞉yo꞉ i o꞉mo꞉wo꞉ sagale alita꞉sen. Kaluka꞉isale henfelo꞉ amilo꞉ ko꞉li ko꞉lilo꞉wa a꞉la꞉ta꞉ga꞉lo꞉ mio꞉ a꞉no꞉, Godeya꞉ tambo i o꞉mo꞉wo꞉ a꞉la꞉ dimida꞉sen.
36Godeya꞉ sagalo꞉ to ko꞉lo꞉ Isolael kaluka꞉isalemo꞉ saga꞉fo꞉ a꞉no꞉, Ya꞉su Alan, tambolo꞉ bo꞉fo꞉lowan, man a꞉no꞉ e dia꞉mio꞉ ko꞉lo꞉ kaluka꞉isaleyo꞉ to a꞉no꞉ da꞉dakiyo꞉, Gode o꞉lia꞉ o꞉li sagalaki, ege doma꞉ib.
37Yon eyo꞉ ho꞉na to꞉lo꞉lan wida꞉sa꞉ga꞉yo꞉, Ga꞉lili hen us a꞉namio꞉ mo꞉mo꞉daki, Yesuwa꞉lo꞉ Yudia hen amilo꞉ dimido꞉ a꞉no꞉ gio꞉ asulo꞉
38Niyo꞉ a꞉no꞉ ko꞉lo꞉ sio꞉. Ya꞉su, Nasa꞉la꞉d kalu e, Godeya꞉yo꞉ da꞉fea꞉sa꞉ga꞉, halaido꞉ o꞉lia꞉ Ene Mama o꞉lia꞉yo꞉ dimi ko꞉lo꞉ Ya꞉su e, Gode o꞉lia꞉ ilikiyo꞉, man nafa dimida꞉liki sia꞉len. A꞉la꞉ta꞉ga꞉ eyo꞉ kaluka꞉isaleyo꞉ Seteneya꞉ bo꞉fo꞉likilo꞉ dikidia꞉sen a꞉no꞉ sili alifelo꞉.
39Elo꞉ Isolael hen o꞉lia꞉ Ya꞉lusalem amisa꞉n amilo꞉ dimido꞉ a꞉no꞉ nio꞉ ba꞉ba꞉ ko꞉lo꞉ asulo꞉. A꞉la꞉ta꞉ga꞉ tif amio꞉ iliyo꞉ e i malana alula꞉sa꞉ga꞉ sana sowo꞉ ko꞉sega, ho꞉len otalen ta꞉ta꞉sa꞉ga꞉, Godeya꞉yo꞉ e a꞉ma꞉la꞉ a꞉dasi alita꞉ga꞉, kalu nolbo꞉wo꞉ bo꞉ba꞉ki ta꞉fo꞉.
41Ya꞉su e ko꞉lo꞉ dasili a꞉no꞉, kalu tambowa꞉yo꞉ mo꞉ba꞉ba꞉, ko꞉sega Godeya꞉lo꞉ tamin amilo꞉ da꞉feyo꞉ kalu nolba꞉ ba꞉ba. Kalu a꞉no꞉, ni ko꞉lo꞉ Ya꞉suwo꞉ dasila꞉sa꞉ga꞉yo꞉, negele silikiyo꞉ ma꞉n o꞉lia꞉ ho꞉n o꞉lia꞉yo꞉ na꞉len.
42A꞉la꞉fo꞉ko꞉lo꞉ nio꞉ kaluka꞉isalemo꞉wo꞉ Godeya꞉ to nafa a꞉no꞉ walama꞉kiyo꞉, Eyo꞉ nimo꞉wo꞉ sio꞉. A꞉la꞉ta꞉ga꞉ E kaluka꞉isalelo꞉ mela꞉no꞉lo꞉ o꞉lab o꞉lia꞉ dane ane o꞉lia꞉lo꞉ alobanama꞉no꞉wo꞉, Godeya꞉yo꞉ E ko꞉lo꞉ da꞉feyo꞉ a꞉la꞉likiyo꞉, nimo꞉wo꞉ wida꞉melea꞉ki walalifa꞉.
43Tamin amio꞉ dinali sa꞉lan kalu tambowa꞉yo꞉ Ya꞉su ko꞉lo꞉ sa꞉la꞉kiyo꞉ a꞉la꞉sio꞉, ‘Kaluka꞉isale abeyo꞉ eya tilida꞉dalega, Ya꞉su Keliso a꞉ma꞉ wiyalikiyo꞉, Godeya꞉yo꞉ mogago꞉ ililo꞉wo꞉ ga꞉lila꞉ma꞉ib.’”
44Bida e to a꞉no꞉ko꞉ o꞉sa꞉la꞉lena, Godeya꞉ Mamayo꞉ kaluka꞉isale tolo꞉ da꞉da꞉lab ilo꞉wa tinda꞉ga꞉ dowo꞉.
45Godeya꞉ Mamayo꞉ Yu kaluma i amio꞉lo꞉ dowa꞉sa꞉ga꞉, iyo꞉ to ko꞉li ko꞉lilo꞉ sa꞉laki, Godeya꞉ wiyo꞉ duludabiki, Yoba a꞉la꞉ta꞉ga꞉lo꞉, Yu tilidabu kalu, Bida o꞉lia꞉lo꞉ mio꞉ a꞉no꞉, iliyo꞉ da꞉da꞉ga꞉ iligo꞉.
47A꞉la꞉gabiki, Bidaya꞉yo꞉ a꞉la꞉sio꞉, “Kaluka꞉isale i we Godeya꞉ Mamayo꞉ nililo꞉ di o꞉ngo꞉ di ko꞉lo꞉, kalu nolba꞉yo꞉ i we ho꞉na to꞉loma꞉no꞉wo꞉ mo꞉ka꞉ma꞉ib.”
48A꞉la꞉go꞉ko꞉lo꞉ Bida eyo꞉ iyo꞉ Ya꞉su Keliso wiya iliki ho꞉na to꞉loma a꞉la꞉sa꞉labiki, ho꞉na to꞉lolo꞉ ko꞉lo꞉ iliyo꞉ Bida e ho꞉len nolo꞉ i o꞉lia꞉ o꞉doma꞉ki dabuba꞉ba꞉.
