Ekisi 8:18-27

¹⁸Ro e Saemoni fu giake e ije Fitakiro Joni bu umui nigofo naejiaeva ije buka Godido Kavene ije abevoga fu giae. Ijadufuo fu uri Fitakiro Joni kiae, Na moni vajiakono ni na daro miega nadua na e umui nigofo naejiaga bu Godido Kavene abeno kiae.

²⁰Fu ijiege kiamoga Fita fu una kuae, A Godido Kavene ije moni ijia fuaevekiro vierafemo ije fuka ma baki. Ro a ijiege rekuma na vierafe a moni one ijiaki jaka are ise miane naeno ijia vake.

²¹Ijadufuo maeje na gaga oe one fu Godido nidua ijia fuka ma baki ijadufuo abe noena besu imeke.

²²Ijadufuo vierafe one ka ise ije a Godido Kavene ije monido fuaevekiro vierafemo ije nika arekiro Godi kuaga fu ise one ije gana arene.

²³Ijadufuo maeje na gaga aka daro ige no abeva ijare riezaga a ije abekiro vierafei. Rove aeje fune ise one ijare dabe utifaremano kuae.

²⁴Bu ijiege kuavoga Saemoni fu una kiae, Ja isekie ni noefuo Godi baname isoega vua ije ja kuarieva ije fube none reno kiae.

²⁵Areme Fitakiro Joni bune uri Godido vua maeje abe e Sameria ijia kariva ije kuariae. Ro kuke bu Godi fu izege vame maeje buone rema ijene nijasiama furinoga bune una Jerusareme vae. Bune una vakinu Jesudo vua maeje abena e are isesina Sameria ijia kariva ije kuariajana vae.

²⁶Areme Godido anera be fu arina e Firifi kuae, Ani urina vame ije bu Jerusareme ijia una gafia Gaza vako ijane vano kuae. Ro vame ije fuka isuiko e bu ijia oenoejo baki.

²⁷Ijadufuo Firifi fune urina vakiro vakuma vame ijia e ireobo be aesakae Itiofiako fu bara Kuini Kedesino kuavo ijadufuo moni samuamo ije bie. E ireobo ije fu are Jerusareme ijia Godido baname isoekiro vaema una romo fu bie. Ro e ije fu fata ije bu ose kena maniaeru oejo ijia ajia fina Asaea e Godido vua vierafena kuaemo ijadufuo vua fu isoema ije dakinu ruome.