Acts 8:18-27

¹⁸Edo Simon Iesu da binga atopapotegari embobo mi ungoda ingo ungoda kopiri da itero Asisi Kotopu burisera awa gido edo ganu Peter de John de da dombu da itido ungoda yei sisira, “Embo ave naso ingo uso kopiri da itano edo Asisi Kotopu borase sedo goroba eiawa naso yei itigave.”

²⁰Setiri Peter mi uso ge mina sisira, “Imo kotesa imo ganu mi God da kando eiawa ori adesa. Edo imo awodo adesa awa imo de iso ganu de awa riawo euse matawa atari yei ainda mambadesa.

²¹Edo iso jo awa God da diti da awa awara ae ira awasedo imo awa buro einda kondade ari sago ae ira.

²²Edo iso kotari biae eiawa dodo Bada God da yei wareregedo edo iso kotari biae eiawa kotembedo doarase sedo gio.

²³Edo na gosena iso jo awa dipapa nembogamo bebegae mi beda ari ra. Edo iso wasiri bebegae mi imo awa digido gogo arira.”

²⁴Edo Peter awodo setiri Simon mi Peter de John de da yei sisira, “Doawo ari bebegae inemi setesa awa naso yei eure ta sedo gosena naso jawo da God manunugegave.”

²⁵Edo ungo Jerusalem nati da mambuse God da binga ewamei awa Samaria busu da nati berari da atopapotisera.

²⁶Bada God da asisi ewamei mi Philip da yei sisira, “Iso rora sia edo ijari kena awodo wosedo yeio emboro Jerusalem nati da edo Gaza nati da mambari edo emboro yei embo atae da jo da awodo mambari ainda mambuio.”

²⁷Edo asisi ewamei awodo Philip da yei setiri, Philip sia edo mambusira. Edo iji ainde Ethiopia busu da evetu gitijigari da gayapa simba ari embo awa uso busu topo da sekago engenembedo mambusira. Umo Jerusalem nati da tumondebain adi mambudo edo umo uso nga wo mi jumbudo ira ainde da engenemburira. Edoumo mambuse God da binga sari embo Isaiah mi jiwari jiusira awa ajigurisira.