1Woꞌobꞌ qꞌij kꞌu rikꞌowik waꞌ echiriꞌ ri Ananías ri kajawal raj chakunel pa Rocho Dios xqaj lo pa ri tinamit Cesarea. Rire erachbꞌilam lo jujun nimaq winaq re ri tinamit y jun chik achi aj esay kichiꞌ, Tértulo rubꞌiꞌ. Xebꞌopon kꞌu riꞌ chwach ri taqanel re kakitzꞌaq uchiꞌ ri Pablo.
2Ekꞌuchiriꞌ xsikꞌix ri Pablo, ri Tértulo xujeqo kutzꞌaq uchiꞌ, jewaꞌ kubꞌiꞌij che ri taqanel Félix: «Lal Félix ri lik kꞌo wach la, ri qatinamit uma rilal uriqom unimal utzil chomal y lik utz ri taqanik la paqawiꞌ ruma lik kꞌo naꞌoj la.
3Waꞌ wa utz ꞌanom la chiqe na xa ta janipa qꞌij uwach y na xa ta pa jun luwar kaqil wi, ma pa taq ronoje luwar kaqil wi. Ruma kꞌu riꞌ waꞌ, lik kaqatioxij cheꞌla.
4»Ekꞌu wa joqꞌotaj, chaꞌ na kaqabꞌay ta la, ꞌana ko la riꞌ chojtana la kꞌenoq rukꞌ ri relej kꞌuꞌx la.
5»Wa qariqom riꞌoj chirij wa jun achi e pachaꞌ chi jun petel-laj yabꞌil. Rire ebꞌuchꞌiꞌom rukꞌ chꞌaꞌoj konoje raj judiꞌabꞌ e kꞌo pa taq ronoje luwar che ruwachulew. Yey e kꞌamayom kiwach ri jumutzaj tikawex kabꞌiꞌx “nazarenos” chike.
6Y na xew ta waꞌ, ma xutij ne uqꞌij kuꞌan che ri Rocho Dios pachaꞌ na jinta chi uqꞌij. Ruma kꞌu laꞌ, xqachapo y xqaj kaqꞌat tzij puwiꞌ e chirij ri tzijpixabꞌ qe riꞌoj.
7»Pero ri comandante Lisias xumin ribꞌ chiqaxoꞌl kukꞌ ukꞌiyal soldados y xumaj paqaqꞌabꞌ.
8Xebꞌutaq kꞌu ri ketzꞌaqaw uchiꞌ waꞌchi chaꞌ kepe na wara ukꞌ la. We xta kꞌu la uchiꞌ, kꞌa ekꞌuchiriꞌ ketaꞌmaj la lik qatzij janipa ri qabꞌiꞌim riꞌoj chirij» xchaꞌ.
9Yey raj judiꞌabꞌ e kꞌo chiriꞌ xkijikibꞌaꞌ uwach che ri taqanel: «Lik qatzij; e uꞌanom janipa ri bꞌiꞌtal chirij» xechaꞌ.
10Ekꞌu ri taqanel xuꞌan jun kꞌutubꞌal che ri Pablo chaꞌ kachꞌaꞌtik, y rire xujeq ubꞌiꞌxikil: «Lik wetaꞌam ukꞌiyal chi junabꞌ lal aj qꞌatal tzij re wa qatinamit; e uwariꞌche, rukꞌ ronoje nukꞌuꞌx kantoꞌbꞌej wibꞌ chiwach la.
11We kaꞌaj la katzꞌonobꞌej la puwiꞌ, ketaꞌmaj kꞌu la riꞌ: Riꞌin kꞌa e ne ukabꞌlajuj qꞌij riꞌ xinopon pa ri tinamit Jerusalem chaꞌ kanloqꞌnimaj uqꞌij ri Dios.
12Yey ri ketzꞌaqaw nuchiꞌ, rike na xinkiriq taj kinchꞌoꞌjin rukꞌ junoq, na xinkiriq tane e enuchꞌiꞌom rukꞌ chꞌaꞌoj rukꞌiyal winaq pa ri Rocho Dios, pa taq ri sinagogas o pa juna chik luwar re ri tinamit.
13Jekꞌuriꞌlaꞌ, rike na utz taj kakijikibꞌaꞌ uwach chiwach la woꞌora janipa ri kitzꞌaqom chwij.
14»Pero chiwach kꞌu la kanya wibꞌ chupa waꞌ: Qatzij, riꞌin in kꞌo chupa ri Bꞌe re ri Cristo, yey rike kakibꞌiꞌij che wa Bꞌe, xa e jun kꞌutunik re sokosoꞌnik. Pero chupa waꞌ wa Bꞌe, riꞌin e kanloqꞌnimaj ri Dios ke ri qatiꞌ-qamam re ojertan; ma nukojom janipa ri kꞌo chupa Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ.
15Y jelaꞌ pachaꞌ rike, riꞌin lik nukubꞌam pan nukꞌuꞌx rukꞌ ri Dios. Ma wetaꞌam ri Dios kebꞌukꞌastajisaj na lo konoje ri ekaminaq; jelaꞌ kuꞌan chike ri e jusukꞌ y ri na e ta jusukꞌ.
16Ruma taq kꞌu riꞌ waꞌ, lik kinok il riꞌin che ri nubꞌinik chaꞌ jelaꞌ kakꞌojiꞌ ri nunaꞌoj chi jusukꞌ chwach ri Dios y chikiwach ri tikawex.
17»Yey ikꞌowinaq chi jujun junabꞌ riꞌin na in oponinaq ta pa ri nutinamit; kꞌa ekꞌu woꞌora xinoponik chaꞌ kiꞌnyaꞌa nuqasaꞌn re toꞌbꞌal ke ri nibꞌaꞌibꞌ y kiꞌnyaꞌa nuqasaꞌn chwa raltar re ri Dios.
18»Echiriꞌ xineꞌkiriqa jujun aj judiꞌabꞌ e petinaq pa taq ri luwar re Asia, riꞌin e riꞌ kankꞌis ri nujosqꞌikil pa ri Rocho Dios. Na xinkiriq ta kꞌu chikixoꞌl rukꞌiyal winaq o kukꞌ ri ketukuk pa chꞌaꞌoj.
19Ekꞌu wa e aj Asia, we kꞌo juna mak kakaj kakikoj chwij, lik e usukꞌ riꞌ e rike ri koꞌlkibꞌiꞌij waꞌ chiwach la.
20»Yey kꞌu wa e kꞌo wara, kibꞌiꞌij rike we kꞌo juna mak xkiriq chwij echiriꞌ xineꞌela chwach ri qꞌatbꞌal tzij ke raj judiꞌabꞌ.
21Ri numak riꞌin chikiwach rike, e echiriꞌ xinkꞌojiꞌ chikixoꞌl, xinsikꞌin chikiwach konoje, jewaꞌ ximbꞌiꞌij: “Ralaq kaqꞌat alaq tzij panuwiꞌ waqꞌij xa ruma nukubꞌam pan nukꞌuꞌx che ri kꞌastajibꞌal ke ri ekaminaq”» xcha ri Pablo.
22Ri taqanel Félix lik utom chi puwi wa Kꞌakꞌ Bꞌe re ri Jesús. E uwariꞌche echiriꞌ xuta waꞌ, xuchaqij ri kimolom wi kibꞌ, jewaꞌ xubꞌiꞌij chike: «Echiriꞌ kakꞌun ri comandante Lisias, kꞌa ekꞌuchiriꞌ kankꞌis retaꞌmaxik wa ikꞌamom lo chinuwach» xchaꞌ.
23Xtaqan kꞌu che ri capitán ke ri soldados chaꞌ kachajix ri Pablo, yey xtaqan che chaꞌ kayaꞌ luwar chike ri rachbꞌiꞌil kebꞌoꞌlbꞌina rukꞌ y koꞌlkinimaj.
24Jujun qꞌij kꞌut ikꞌowinaq, xopon tanchi ri taqanel Félix rukꞌ ri rixoqil Drusila; waꞌ wiꞌxoq e kukꞌil raj judiꞌabꞌ. Ekꞌu ri taqanel Félix xutaq usikꞌixik ri Pablo y xuta chi uchiꞌ puwi ri kubꞌulibꞌal kꞌuꞌxaj rukꞌ ri Qanimajawal Jesucristo.
25Pero echiriꞌ ri Pablo xujeq kachꞌaꞌt chikiwach puwi ri jusukꞌ bꞌinik, puwi ri lik kuchajij ribꞌ jun chiribꞌil ribꞌ chaꞌ na katzaq ta pa mak y puwi ri qꞌatbꞌal tzij katajin lo pakiwi raj makibꞌ chiqawach apanoq, ri taqanel xuxiꞌij ribꞌ che waꞌ y xubꞌiꞌij: «Woꞌora jat, kꞌate na katinsikꞌij tanchik echiriꞌ kajamiꞌ nuwach» xchaꞌ.
26Yey wa taqanel Félix xa royeꞌem we ri Pablo kuya puaq che chaꞌ rukꞌ riꞌ kutzoqopij bꞌi. Ruma kꞌu laꞌ, ukꞌiyal laj xusikꞌij y xchꞌaꞌt rukꞌ.
27Xikꞌow kꞌu kebꞌ junabꞌ, yey ri taqanel Félix xjal bꞌi y xkanaj ri Porcio Festo pukꞌaxel. Ekꞌu ri Félix, xa ruma karaj kakanaj kan utz chikiwach raj judiꞌabꞌ, xuya kan ri Pablo pa cárcel.
