Hechos 26:23-32

²³Ma rike xkibꞌiꞌij chirajawaxik ri Cristo karikꞌowibꞌej na rukꞌaxkꞌolil ri kamik y kuꞌana ri nabꞌe kakꞌastaj lo chikixoꞌl ri ekaminaq, chaꞌ jelaꞌ kutzijoj ri Qꞌijsaq chike ri qatinamit y chike ri jujun chik tinamit na e ta aj judiꞌabꞌ.»

²⁴Ekꞌu riꞌ katajin ri Pablo che ubꞌiꞌxikil waꞌ re toꞌbꞌal ribꞌ, ri Festo lik ko xchꞌawik y xubꞌiꞌij: —Pablo, ¡at chꞌuꞌjerinaq! Lik katikꞌow uwiꞌ che rajilaxik ukꞌiyal wuj, y ruma waꞌ xatchꞌuꞌjerik —xchaꞌ.

²⁵Noꞌj ri Pablo xubꞌiꞌij: —Na in chꞌuꞌjerinaq taj, Festo, ri lik kꞌo wach la. Ma wa kintajin che uqꞌalajisaxik lik qatzij y lik usukꞌ.

²⁶Ma e ne ri rey Agripa, ri in kꞌo chwach, rire lik retaꞌam puwi taq waꞌ. Ruma ne riꞌ, lik kinchꞌaꞌt rukꞌ ronoje nukꞌuꞌx chwach rire. Ma chinuwach riꞌin, ronoje taq wa kintajin che ubꞌiꞌxikil, utom chi rire; ma taq waꞌ na xa ta xeꞌlaqꞌay uꞌanom.

²⁷¿Kakoj la rilal lal rey Agripa, janipa ri kitzꞌibꞌam kan ri qꞌalajisanelabꞌ ojertan? ¡Riꞌin wetaꞌam kakoj la waꞌ! —xchaꞌ.

²⁸Ekꞌuchiriꞌ, ri rey Agripa xubꞌiꞌij che ri Pablo: —E kami kachꞌobꞌ riꞌat, ¿xa jubꞌiqꞌ chi karaj kakoj pa nujolom chaꞌ kinuꞌana in jun kukꞌ ri kikojom rubꞌiꞌ ri Cristo? —xchaꞌ.

²⁹Ekꞌu ri Pablo xubꞌiꞌij che: —E lik kuaj riꞌ kuꞌana waꞌ ukꞌ la, xa pa joqꞌotaj o tobꞌ kamayinik; pero ¡lik kantzꞌonoj che ri Dios chaꞌ na xew ta rilal, ma e janipa wa kinkitataꞌ wa joqꞌotaj, kebꞌuꞌana jelaꞌ pachaꞌ riꞌin! Xew kꞌu na kuaj taj kayaꞌiꞌ alaq pa karena pachaꞌ wa ꞌanom chwe riꞌin —xchaꞌ.

³⁰Echiriꞌ xubꞌiꞌij waꞌ ri Pablo, xeyaktaj ri rey Agripa, ri taqanel Festo, rixoq Berenice y konoje ri etzꞌul chiriꞌ kukꞌ.

³¹Yey echiriꞌ xkijach taq bꞌi kibꞌ, chikiwach kakibꞌiꞌij: «Waꞌchi, na jinta kꞌo uꞌanom chaꞌ taqal che kakamisaxik o kayaꞌ pa cárcel» kechaꞌ.

³²Ekꞌu ri Agripa xubꞌiꞌij che ri Festo: —Waꞌchi, utz katzoqpix bꞌi tamaji utzꞌonom kataꞌ uchiꞌ ruma ri nimalaj taqanel re Roma —xchaꞌ.