Aposol 26:23-32

²³Kema hu'za Kraisi'a ataza erino friteno pusante fri'pintira otino, Jiu vahete'ene megi'a vahetera tavi'a eri ama hugahie hu'naze.

²⁴Polima agra'ama agu'mavazisia zamofo keagama nehiana, Festusi'a ranke huno Poliga hago ifo nehano! Ra'ma'a zama rempi hu'nana zamo kagrira kazeri savari'nehie!

²⁵Higeno Poli'a huno, Nagrira antahintahinimo'a havizana osu'ne, Festasiga so'e ne' mani'nane. Hianagi nagrama nehua nanekea tamage hu'na fatgo antahintahizanteti nehue.

²⁶Amana kema nehuana Kini ne'mo'a antahino keno hu'negu nagra agritera hu'ama hu'na nehue. Ama anazanku'ma nehuana kinimofo avurera fra'okine.

²⁷Kini ne' Agripaga kasnampa vahe kegu kamentinti'a nehampi? Nagra antahi'noe, kagra kamentinti nehane.

²⁸Higeno Kini Agripa'a Polinku anage hu'ne, Kagrama kagesa antahinana ama atupa knafina nazeri rukarehe hanankena, nagra mono ne' manigahufi?

²⁹Anage higeno Poli'a kenona'a huno, atupa knafino, za'za knafino nagra Anumzantega nunamu nehue, kagrikukera nosuanki ama menima mani'ne'za nagrama huanke'ma nentahiza vahe'mo'za, nagrikna hihogu nehuankino, ama'na seni nofinura kina reozmante'saze.

³⁰Anage hige'za, Kini neki, Gavana neki Benesiki, zamagranema mani'naza vahe'amoza oti'naze.

³¹Oti'za ana noma atre'za fegi'a nevu'za, ke huganti hugama hu'za anage hu'naze. Ama'na nera mago knare ke agafa omaneneankita ahe frige' kina huntege osu'tfa hugahune, hu'za hu'naze.

³²Agripa'a, Festusi asmi'no, Sisante'ma vugahue osiasina, ama nera katufe atrosine.