Acts 26:23-32

²³fare Messiah e thangri gafgow me ir e cha’ ni som’on ni nge fos ko yam’, me tamilangnag piyu Israel nge pi’in gathi yad piyu Israel u rogon me thap e girdi’ ngak Got.”

²⁴Nap’an ni be welthin Paul ni aray rogon ni aram e be ayuweg ir, me tolul Festus ngak ni ga’ar, “Paul, kam aliliy! Kayigi gel e sukul ni kam tay ke aliliynigem!”

²⁵Me fulweg Paul ni ga’ar, “Festus ni Pilung, dawor gu aliliy! Pi thin ney ni gu be weliy e ba riyul’ ma gathi kug thum’ ngay.

²⁶Agrippa ni Pilung! Rayag ni gu welthin ngom ndab gu tamdag, ni fan e ga manang murung’agen e pin’ey. Bmuduwgil u wun’ug ni go’ ga manang fan e pin’ey nreb nge reb, ya pin’ey e gathi bogi n’en ni yib i m’ug mi ni mithag.

²⁷Agrippa ni Pilung, bmich u wun’um fapi profet fa danga’? Gu manang nib mich u wun’um!”

²⁸Me ga’ar Agrippa ngak Paul, “Ga be finey nrayag ni ngam pingegeg nggu mang reb i girdi’en Kristus u lan e chingiyal’ i n’ey nib ngoch?”

²⁹Me fulweg Paul ni ga’ar, “Demturug ko ba ngoch nap’an ara ba n’uw nap’an, ma meybil rog ngak Got e gur nge gimed urngin e pi’in gimed be motoyil ngog e daba’ e manga yugu mboded gag — kemus ni pi chen ney e dabug ni nga ni m’ag ngomed!”

³⁰Ma fare pilung, nge fare am, nge Bernice, nge urngin e girdi’ e ra sak’iygad,

³¹ma nap’an ni ka ranod miyad yog rorad ni be lungurad, “Re mo’on nem e dawori ngongliy ban’en ni gomanga ke yib tapgin riy ni ngan thang e pogofan rok ara ntay nga kalbus.”

³²Me ga’ar Agrippa ngak Festus, “Re mo’on nem e fa’an mang e dawori wenignag ir ni ngan pi’ e oloboch nge yan ngak e en ni Emperor nu Roma nge mang ir e pufthinnag, ma kan pag e chiney.”