Hechos 26:23-32

²³e dseángꞌˉ nɨsɨꞌíˆbaꞌ e nijúungˉ Dseaˋ Jmáangˉ, dsʉꞌ mɨ˜ ningɨ́ˋ e nijúuiñˉ do, íˋbre dseaˋ laꞌuii˜ nijí̱ꞌˊtu̱r jee˜ jaléngꞌˋ ꞌlɨɨ˜. Jo̱guɨ íˋbre dseaˋ niguiárˉ júuˆ jee˜ jaléngꞌˋ dseaˋ góoˊooꞌ dseaˋ Israel jial nileángˋ jaléngꞌˋ dseaˋ íˋ jee˜ dseeˉ quiáꞌrˉ jo̱guɨ cajo̱ jial nileángˋ jaléngꞌˋ dseaˋ i̱ jaˋ lɨ́ɨngˊ dseaˋ Israel jee˜ dseeˉ quiáꞌrˉ. Jo̱ e júuˆ e niguiáˉ Dseaˋ Jmáangˉ do lɨ́ɨˊ la lɨ́ɨˊ co̱o̱ˋ jɨˋ e jneáˋ e jmɨcó̱o̱ꞌ˜ jaléngꞌˋ i̱ dseaˋ íˋ.

²⁴Jo̱ mɨ˜ calɨ́ˉ féꞌˋ Paaˉ e júuˆ jo̱ e jmɨꞌǿngꞌˋ ꞌñiaꞌrˊ, jo̱ dsifɨˊ lajo̱b caféꞌˋ i̱ dseata˜ Festo do có̱o̱ꞌ˜ júuˆ teáˋ jo̱ cajíñꞌˉ: —¡Ngaamˋ ꞌnʉˋ, Paaˉ, nɨcaꞌléebˊ quíiꞌˉ e nɨcajmɨtɨ́ɨnꞌˋ eáangˊ, jo̱ có̱o̱ꞌ˜ e jo̱ nɨcaꞌuíingˉ e nɨcalɨcaam˜baꞌ!

²⁵Jo̱baꞌ cañíiˋ i̱ Paaˉ do quiáꞌˉ dseata˜ Festo jo̱ cajíñꞌˉ casɨ́ꞌˉreiñꞌ: —Jaˋ ngaang˜ jnea˜, dseata˜ quíˉiiꞌ Festo, dsʉꞌ ꞌnʉˋ ɨˊ oꞌˊ lɨ́ꞌˉ rɨjíimˋ, co̱ꞌ lajaléꞌˋ e fáꞌˋ jnea˜ la jmangꞌˉ júuˆ guiʉ́bˉ jo̱guɨ jmangꞌˉ júuˆ jábꞌˉ cajo̱.

²⁶Nab guiing˜ dseata˜ dseaˋ féngꞌˊ Agripa, jo̱ ñiˊbre laꞌuiing˜ jaléꞌˋ e júuˆ na. Jo̱ jaˋ ꞌgóꞌˋo e fáꞌˋa fɨˊ quinirˇ, co̱ꞌ ñiˋbaa røøˋ e ñiˊbre laꞌuiing˜ lanʉ́ꞌˉ cajo̱ jaléꞌˋ e guiʉ́ˉ e cajméeˋ Jesús fɨˊ jmɨgüíˋ la, dsʉco̱ꞌ jaléꞌˋ e jo̱ o̱ꞌ e calɨ́ˉ lɨ˜ jaˋ i̱i̱ˋ jǿøˉ o̱si lɨ˜ jaˋ jnéengˉ é.

²⁷Jo̱guɨ ꞌnʉˋ, dseata˜ dseaˋ féngꞌˊ Agripa, nɨñibˋ jnea˜ e jábꞌˉ lɨ́ɨngˋ ꞌnʉˋ jaléꞌˋ júuˆ e caguiaˊ i̱ dseaˋ i̱ caféꞌˋ cuaiñ˜ quiáꞌˉ Fidiéeˇ malɨɨ˜guɨ eáangˊ.

²⁸Jo̱baꞌ cañíiˋ i̱ dseata˜ Agripa do quiáꞌˉ Paaˉ jo̱ cajíñꞌˉ: —Jiʉʉ˜baꞌ jaˋ mɨˊ calɨꞌˊ jnea˜ e niꞌuíinˉn dseaˋ quiáꞌˉ Dseaˋ Jmáangˉ.

²⁹Jo̱baꞌ cañíiˋtu̱ Paaˉ quiáꞌˉ dseata˜ Agripa jo̱ casɨ́ꞌˉreiñꞌ: —Nañiˊ si jiʉ˜ o̱si jmiguiʉˊbɨ é jaˋ mɨˊ calɨꞌˊɨ ꞌnʉˋ, dsʉꞌ iing˜ Fidiéeˇ e lajɨɨmˋ ꞌnʉ́ꞌˋ niꞌuíingˉnaꞌ dseaˋ quiáꞌˉ Dseaˋ Jmáangˉ laco̱ꞌguɨ la lɨ́ɨngˊ jnea˜; jo̱ dsʉꞌ o̱ꞌ laco̱ꞌ jnea˜ lana e ꞌñúunꞌ˜n có̱o̱ꞌ˜ ñíˆ cadena.

³⁰Jo̱ mɨ˜ cangɨ́ˋ e cajíngꞌˉ Paaˉ e júuˆ jo̱, jo̱ caró̱o̱bˉ i̱ dseata˜ dseaˋ féngꞌˊ Agripa do có̱o̱ꞌ˜guɨ i̱ dseata˜ Festo do co̱lɨɨng˜ có̱o̱ꞌ˜ i̱ rúiñꞌˋ dseaˋ ngáangꞌ˜ có̱o̱ꞌr˜ i̱ siiˋ Berenice lɨ́ꞌˆ lajɨɨngˋ i̱ dseaˋ i̱ neáangˊ do ie˜ jo̱.

³¹Jo̱ mɨ˜ cangɨ́ˋ jo̱, caꞌuøømˋbre e cangosiiñˇ e júuˆ do lajeeˇ yaaiñ˜ fɨˊ lɨ˜ jiéꞌˋ. Jo̱ lalab sɨ́ɨiñˋ lajeeˇ yaaiñ˜ jo̱ féꞌrˋ: —I̱ dseañʉꞌˋ la jaˋ e mɨˊ caꞌléerˊ jí̱i̱ꞌ˜ co̱o̱ˋ faꞌ dsi˜ íꞌˋ e nijúuiñˉ o̱ꞌguɨ e sɨjnɨ́ɨngˇguɨr fɨˊ dsíiˊ ꞌnʉñíˆ.

³²Jo̱guɨ cañíiˋ i̱ dseata˜ dseaˋ féngꞌˊ Agripa do quiáꞌˉ dseata˜ Festo jo̱ casɨ́ꞌˉreiñꞌ: —Cuǿømˋ nileángˋ i̱ dseañʉꞌˋ la lana faco̱ꞌ mɨ˜ jaˋ mɨˊ camɨrˊ ꞌñiaꞌrˊ jéengˊguɨ e niquidsiˊ i̱ dseata˜ dseaˋ féngꞌˊ i̱ guiing˜ fɨˊ Roma do íꞌˋ quiáꞌrˉ lají̱i̱ꞌ˜ e lɨ́ɨˊ quiáꞌrˉ.