MII GUN MIINU MO 26:23-32

²³ka Ḵrisṯẖos yan mina isi mii ’kosh ka nyor mo dhali a’di jin midi ta amanpiya pi nṯwa/a/ jin wuki’d mo midi ’taki c̱i moŋkush ki ’kwani mo dhali ki ’kwani kun ’koki ta ’Kwani Yahuuda/ si’da/ mo.

²⁴Dhali ki a’di c̱iki gwo jin ta jiny ’ce’d shem piti kan mo tani P̱asṯuus oki gwo ki dhan ’twa/ mo ki: Buulus /e guskina du mo ba/. Mmomisha /e to deŋ e kagahara mo a’di ṯu’k /eya du mo mmogus mo.

²⁵Hila Buulus oki gwo mo ki: Aha/ dinaki gusa du mo ba/ P̱asṯuus /e jin ta jim ’borga/ mo hili aha/ ona gwoŋ gana/ mo dhali ka du jin ḵuthi/ is ki ’cese/ ’cese/ mo be.

²⁶Haala maliḵ mishki to gwansan mo. E a’di si’da/ aha/ ona gwo ki dar gi monyju/ mo gom aha/ laluwa du sho’k gom toŋ kamu/ ṯal ’de/ ’peni ’kwani gwansan yisa di’da jin bagu mo ’peni a’di mo haali/ mii yansan yisa miikunu ki tar mo.

²⁷Maliḵ Aghripaas, gwo ’peni imanc̱i gwo ma Arumgimis kadhamo/ gamkina /e is mowa? A’di mishga/ ki /e gami gwo is mo.

²⁸Dhala Aghripaas oki’da Buulus gwo mo ki: A/e palaa/ ki ari mompal mmolal aha/ sho’k ki gwo mo jin miga/ war ka Ḵrisṯẖiyan mo?

²⁹Dhala Buulus oki gwo mo ki: Aha/ mishayi ka Arumgimis ki ari pal walla ki dhan mompala caaga/ mo, yisa /e ’deya, hili si’da/ uni ’baar mo gun ciḵki aha/ ka tee yan mini ’taki war mo mmowa e ki aha/ isi ciki/ ki dar gi mondeḵ gwansan mo be.

³⁰Dhala maliḵ cu mis mo dhala mudhiir dhala Barniiki mo dhali uni gun nyaḵki ’ko ki uni mo.

³¹Dhali ki uni thoṯẖkin ka pije/ mo tani uni c̱iki gwo ka rem ’kup̱ mo mmo/o gwo mo ki: Wathi/ yan diki mii toŋ kamu/ jin midi gam ’pemen jin ta ji gi wu mo walla jin midi ta jin minu deḵa deḵ mo be.

³²Dhala Aghripaas oki’da P̱asṯuus gwo mo ki: Wathi/ yan minu ’taki kar ki ’kus mo waḵki/ a’di midi ’taki diki yip̱ ’kup̱ ’kup̱ ka Kaysar mo be.