Genesis 24:1-8

¹Nayan, ontò den temoay si Abraham, aw gayed mèpiya se imbegay te Timanem diyà kandin.

²Minikagi si Abraham diyà te pengolo te menge sineligan din, sìyan egpengibing te kedakel te kedònan din, “Soli se belad nikaw diyà te salad te bobon ko amon ketegahan ko te tomanen no se ipunù ko kamno seini.

³Ibeg ko megsapà ka pineokit te Timanem mig-inang te langit aw keneyonan. Pegpakang ka diyà kanak te eked no pemellii se bayi pengognanen te batà ko lekat te menge otaw eg-ogpà dini te Canaan.

⁴Meneng keilangan lomikò ka doton te tanà tinebawan ko, aw pemellii se bayi lekat te menge kedomaan ko amon doen pengognanen te batà ko si Isaac.”

⁵Meneng mig-insà se sineligan, “Megmeno a aw eked keibeg se bayi tomaking kanak aw molì a dini? Ibingen ko lay se batà no doton te tanà tinikedowan nikaw?”

⁶Timaba si Abraham, “Ikà palos egpengibing te batà ko doton.

⁷Kedengan, inikegiyan a te Timanem eg-ogpà doton te langit te keilangan mesayo a lekat te menge kedomaan te amay ko aw tanà tinebawan ko, aw ontò a din pinekangan te ibegay din se tanà seini diyà te menge bowad-bowad ko. Isogò te Timanem se anghil monà diyà kamno aw megtabang kamno amon mekeabat ka te bayi pengognanen te batà ko.

⁸Meneng aw eked keibeg se bayi tomaking kamno, yan wedad keilangan te pegtoman no te pakang no seini. Meneng ikà palos egpengibing te batà ko doton.”