Miamun 24:1-8

¹Abraham aruani iwaʼ da nam fufidan biŋan sib, da Yawe ifinti araŋan i sanab mara maran.

²Gubuʼ maŋan da Abraham ini da gan garam guman miamun gan mpada tayaŋʼ araŋan naŋgan santan ini binaʼ, “Warim baŋim waruʼ dzi faga rampuat

³da wani nan nidzun da wataga ruam da Yawe, Anutu suda wain i gunuŋun da intap, i agu anuŋʼ uda sagat intap Kanan ani gan maŋan da dzi naruŋgaŋʼ u.

⁴Da bitsintaʼ watip wafa dzi gampaŋʼ wain da wau sagat maŋan namiŋʼ dzi utupaŋʼ i suda dzi naruŋgaŋʼ Isak finiŋgan.”

⁵Da garam gum igutin, “Da bida sagat igi buginda i taŋinda gampan rai i ruta dzi badan? Da isaŋʼ i dzi tipa uda Isak fada u gampam wain igi?”

⁶Da Abraham ini, “Imaʼ. Watsaŋa ruŋgam sib i u anuŋʼ tipa uda dzi naruŋgaŋʼ fadan nigi u.

⁷Yawe, Anutu suda wain i gunuŋun, iyu dzi sinuŋʼ dzi ramaŋgaŋʼ gampan da dzi intapaŋʼ da iraga nan muŋʼ da dzi i buŋʼ ataŋin intap aruani da dzi yaŋin rusaŋʼ. Araŋan buŋʼ ataŋin gan aŋira gan namuŋʼ i agu nafa dzi gampaŋʼ wain, i rima agu sib i uda sagat i dzi naruŋgaŋʼ miŋʼa nigi.

⁸Da bida sagat igi buginda i ruta agu badan, da nan u tagada ruam in da dzi anuŋʼ muntida sib i agu u. Da bitsintaʼ agu anuŋʼ uda dzi naruŋgaŋʼ tipa fada dzi gampaŋʼ wain igi u.”