Erubasa 24:9-28

⁹Salà is minsan hengkey he pelanu te etew he tulebung, ne egkeepesan te menge etew is ked-undaunda.

¹⁰Emun egkeewaan ka te perateng te timpu te kemereǥenan, tuus heeyan he meluya ka.

¹¹Kenè ka peneǥana te kedlibri te menge etew he wazà salà he midsintinsiyahan he edhimetayan.

¹²Egkehimu he ebpemarew ka he wazè nu metueni heini. Piru netuenan te Megbevayà ke tutuu ve is migkaǥi nu wey kekenà, su ebentayan ke zin ne netuenan din ke hengkey is diyà te isip nu. Ebelesan ke zin sumalà te nengeveelan nu.

¹³Mama, kaan ka te teneb su meupiya heini para kenikew,

¹⁴su iring keniyan is ketau. Su ke uluwanen ka, duen meupiya he egkeperateng nu ne kenà egkehimu he wazà pulus te menge penganduy nu.

¹⁵Kenè nu iringi is lalung he etew, he ebpeniid su ebpenulis diyà te valey te etew he metazeng.

¹⁶Su minsan kepipitu pa mepiley is etew he metazeng, iyan, layun sikandin ebpekeenew. Ne emun iyan is lalung egkepiley, kenè en sikandin ebpekeenew.

¹⁷Kenè nu ikelipey emun duen mezaat he egkeulaula te kuntada nu.

¹⁸Egkaahà te Nengazen is baal nu, ne kenè din heeyan egkesuatan; ne kenè din en edsilutan haazà is kuntada nu.

¹⁹Kenè ka mesemuki wey mesina te menge lalung he menge etew,

²⁰su wazà meupiya he egkepaabut dan, su is untung dan iring te sulù he egkeevukan.

²¹Mama, tehuza nu is Nengazen wey is hadì. Kenè ka medtampu te menge etew he edsukul kandan,

²²su egketik-awan sikandan te silut. Wazè nu metueni ke hengkey he kelasi te kemeresayan is ibpigada te Megbevayà etawa te hadì diyà te kandan.

²³Heini pa is duma he menge erubasa te menge etew he uluwanen: Kenà meupiya is kedhukum nu he zuen nu ibpelavi.

²⁴Emun egkaǥi ka he wazà salà dutun te nekesalà, ebpenrewakan ka wey egkepeukan ka te menge etew.

²⁵Piru emun ebpigedahan nu haazà is nekesalà, edtuvazan ka wey ed-uswag ka.

²⁶Is tavak he hustu ne tuus te tutuu he teleemiǥu.

²⁷Hunaa nu endama is igkeuyag-uyag nu, iring te pemuleey nu, ne human ka tukud te pemilya.

²⁸Kenè ka penistiǥus he kaatbang te idsumbung he siringan nu emun kenè ka zait he ebpenistiǥus dutun he kasu.