Tinata Valavalar 24:9-28

⁹A nuknuk i ra umana lunga i tar kaina, Ma ra tena varkulumai i da ra magit na milmilikuan ta ra luaina mata i ra tarai.

¹⁰Ba u matmat ta ra bung ba di tur bat u, A ongorim i ikilik ika.

¹¹Una valaun pa diat di al pa diat tadav ra minat, Ma una tigal bat diat dia pa lebalebe tadav ra vardodoko.

¹²Ba u biti, Ea, vakir ave ga nunure go, Dave, nina ba i valar ra bala i ra tarai pa i nuk pa ia bar? Ma nina i balaure bat ra tulungeam pa i nunure bar? Ma pa na vabongon vang ra tarai tikatikai varogop ma kadia papalum?

¹³Natugu, una en ra polo na livur, tago i boina, Ma ra bulit na livur, nina i kalakalami ta ra ngiem.

¹⁴Una nunure ba ra kabinana i damana ta ra tulungeam; Ba u tar tikan tadav ia, una vatur vake ra vabongon, Ma ra magit u kiki ung pa ia pa na panie.

¹⁵U ra tena varpiam, koko una kobot upi ra gunan kai ra tena takodo; Koko una vakaina kana pal na vava;

¹⁶Tago ra tena takodo i bura lavurua na pakana, ma i tut mulai; Ma ga ra kaina magit i vue pukue vue ra umana tena varpiam.

¹⁷Ba kaum ebar i bura, koko una gugu; Ma ba i tutukai, koko ra balam na ga tana;

¹⁸Kan ra Luluai na gire, ma pa na manane, Ma kana kankan na ngo kan ia.

¹⁹Koko una ngarangarao ure ra umana tena varpiam, Ma koko una pin ra umana bilak na tutana;

²⁰Tago ra tena varpiam pa na vatur vake ta vabongon, Ma da pun ra lamp kai ra umana tena varpiam.

²¹Natugu, una ru ra Luluai ma ra king, Ma koko una laure diat dia pukpukue ra mangamangana;

²²Tago kadia kinadik na vut vakaian; Ma to ia i nunure ra vinirua i vuna ta dir?

²³Go bula ra umana tinata kai ra umana tena kabinana. Pa i boina ba di ru vakuku ra tarai ta ra varkurai.

²⁴Nina i biti ta ra tena varpiam, U a tena takodo, A tarai diat a tata kaina ure, ma ra umana vuna tarai diat a milmilikuane;

²⁵Ma diat dia pit ra tena varpiam diat a gugu boko, Ma ra bo na nidoan na tadav diat.

²⁶Nina i bali vatakodo ra tinata, I da i galum ra bul na ngie i dat.

²⁷Una vaninara ure ra papalum aro ra pia, Ma una mal varurue ra tabarikik aro ra pupui; Ma namur una vatur kaum pal.

²⁸Koko una takun vakuku talaim, Ma koko una vartuam ma ra bul na ngiem.