1Si Darius he Midianhen he anak ni Ahasuerus, iyan hadì dutun he timpu ziyà te tivuuk he Babilonia. Te nehuna he tuig te kedhadì din, netuenan ku ziyà te insurat he lalag te Megbevayà he kenà egkevangun is nevengkag he inged he Jerusalem seled te 70 he tuig, su iyan heini nekaǥi te Nengazen diyà te mibpenaub din he si Jeremias.
3Ne tenged dutun midangep a ziyà te Nengazen he Megbevayà pinaaǥi te ked-ampù. Mibpuasa a, mibivisti a te saku, wey mibukbukan ku te avu is ulu ku tenged te kegkeseeng ku.
4Ne iyan heini migkaǥi ku zutun te ked-ampù ku ziyà te Nengazen he Megbevayè ku wey kedtug-an ku te menge salè ku wey menge salà te menge Israilihanen: “Nengazen, mekeǥeǥehem ka wey egkein-inuwan he Megbevayà. Metinumanen ka, ne edtumanen nu is penaad nu he ebmahalen nu is ebmahal kenikew wey edtuman te menge suǥù nu.
5Nekesalè key ziyà te kenikew. Mibaal key te mezaat wey mid-engkezan dey is menge suǥù nu wey menge sulunuzen he ibpesunud nu.
6Wazè key mibpemineg te menge suluǥuen nu he mibpenaub nu he iyan midsuǥù nu te kebpekidlalag te menge hadì dey, menge pengulu zey, menge kepuun dey, wey te langun he menge etew te Israel.
7“Metazeng ka, Nengazen, iyan, sikami mulà mekeeled-eled is menge vaal zey minsan guntaan. Tutuu heini ziyà te langun he menge meǥinged diyà te Juda wey Jerusalem, wey ziyà te langun he menge Israilihanen he impedsusuwey nu ziyà te uvey wey meziyù he menge lugar tenged te kedsupak dan kenikew.
8Mekeeled-eled key, Nengazen, ragkes en is menge hadì dey, menge pengulu zey, wey menge kepuun dey, tenged te nekesalè key ziyà te kenikew.
9Piru hihizuwen ka ǥihapun wey mepineseyluwen minsan pa te nesupak dey sikew.
10Wazè dey metuman is egkesuatan nu su ǥeina te wazè dey sunuza is menge suǥù he imbeǥey nu kenami pinaaǥi te menge suluǥuen nu he ebpemeneuven nu.
11Midsupak is langun he menge Israilihanen te menge suǥù nu; kenè dan egkesuat he edtuman te menge lalag nu. Ne tenged te kebaal zey te salà, neseǥazan dey is rawak he ingkesurat diyà te Kesuǥuan ni Moises te suluǥuen nu.
12Midtuman nu is kezeetan he impetizaan nu kenami wey te menge pengulu zey he iyan is ebpurungan key kenikew edsiluti. Umbe wazè pa nehitavù kayi te kelibutan he iring te mezaat he nehitavù diyà te Jerusalem.
13Nehitavù diyà te kenami heini he silut sumalà is ingkesurat diyà te Kesuǥuan ni Moises. Piru Nengazen he Megbevayè dey, minsan pa te iyan heini nehitavù kenami wazè key ǥihapun medtinguha te kebpenunuat kenikew pinaaǥi te ked-iniyug te menge salè dey wey kegkilala te tutuu.
14Andam ka he edsilut kenami; ne mibeelan nu en heini tenged te egkezumahan te hustu he kukuman is langun he ebeelan nu, piru wazè key ǥihapun mebpezumazuma kenikew.
15“He Nengazen he Megbevayè dey, impeehè nu is gehem nu pinaaǥi te kegeuza nu te menge etew nu puun te Ehipto, ne nevantug ka tenged kayi taman en guntaan. Piru mibaal key te salà wey kelelalung.
16Umbe, Nengazen, tenged dà te kenikew he keupiya, edhangyù a ziyà te kenikew he iawè nu en is pauk nu te menge meǥinged diyà te Jerusalem te inged nu he segradu he vuvungan. Tenged te menge salè dey wey menge salà te menge kepuun dey, mibpeel-elezan key wey is menge tig-Jerusalem te menge etew he nekeelingkus kenami.
17“Umbe, Megbevayè ku, pemineǥa nu is hangyù ku wey pengemuyù ku. Para meveǥayi ka te zengeg, Nengazen, umana nu venguna is baley nu he nerundus he mibey-anan en.
18He Megbevayà, pemineǥa a kenikew. Su utew mekehizuhizu is kebpekesavuk dey wey nevengkag is inged nu he zutun egkilelaa is kegkemegbevayè nu. Wazè key medhangyù diyà te kenikew tenged te ketazeng dey, kekenà, tenged te netuenan dey he utew ka hihizuwen.
19Pemineǥa key, Nengazen, wey peseyluwa key. Segugunà key tevangi para meveǥayi ka te zengeg, su migkilala ka he Megbevayà diyà te inged nu wey menge etew nu.”
20Mibpedayun a is ebpengemuyù wey edtug-an te menge salè ku wey menge salà te menge zuma ku he menge Israilihanen. Midhengyuan ku is Nengazen he Megbevayè ku para te segradu he vuvungan din.
21Ne zutun te ked-ampù ku, meǥaan he midlayang pehendiyà te kedì si Gabriel is nehune en he mibpelawas kedì. Uras haazà te mahapun he kebpemuhat.
22Impesavut e zin, ke sikandin te, “Daniel, midhendini a su ibpesavut ku kenikew is tagnà.
23Su kebpuun nu zà ked-ampù ne zuen en impahayag te Megbevayà, ne midhendini a su egkeǥiyen ku kenikew haazà, su utew ka mibmahal te Megbevayà. Umbe pemineǥa nu wey sevuta nu is idseysey ku ziyà te kenikew:
24“Midtelaan en te Megbevayà is 490 he tuig he para zuen te segradu he inged wey te menge zuma nu, su zutun he timpu egkeengked is kebpekidsukulè dan te Megbevayà, ne egkevelukasan sikandan te kegkeuripena kandan te salà, ne ebpeketezengen sikandan te Megbevayà te ketazeng he ebpedayun taman te taman, su para metuman sikan is nelewasan wey kes netagnà, wey para ikeuman ikepehinungud diyà te Megbevayà is baley zin.
25“Kinahanglan he egketuenan nu wey egkesavut nu he puun te timpu te kebmandù ku he ed-umanan ebenguna is Jerusalem taman te kebpekeuma te pengulu he pinilì te Megbevayà, ne edlavey is 49 he tuig. Ne seled te 434 he tuig ed-umanan ebenguna is Jerusalem he zuen din menge pelasa wey pengalang. Ne timpu haazà te kesamuk.
26Ne kegkepasad te 434 he tuig edhimetayan is pengulu he pinilì te Megbevayà he wazà edtavang kandin. Ne ebpekeuma is sevaha he hadì ne edezeetan te menge etew zin haazà is inged wey is baley te Nengazen. Ne ebpedayun is kezeetan wey kebpetebtebekà taman te ketepusan su imbanglis te Megbevayà is kegkeul-ulaha kayi. Henduen be te zalem is kegkeuma te ketepusan he menge andew.
27Haazà is hadì, edhimu te melig-en he kesebutan diyà te mahabet he menge etew he egketapus te pitu he tuig. Piru kedlavey te tetelu he tuig wey tengà, ebpeengkezan din is kebpemuhat ne idsavuk din diyà te valey te Nengazen is utew mezaat he vutang he egkehimu he hinungdan te kebey-ani zutun te valey te Nengazen. Ne kenà heini egkaawà dutun taman te kemulu pa haazà is hadì su iyan heini imbanglis te Megbevayà.”
