Bunanige 28:22-31

²²Eatu ka sanamaniya o kabaḡa tunisitunisi nenesiyai kwami tovitumaḡana yokomima si sawasawanovimiya. Na fasinei nuwanuwaki ya nuwanuwa kata sanamaniya.”

²³Eketa kuyadayada tamokaḡa si vinuwadadaniya nenei namoḡa yagwanisi si nemiya yana kabaḡai. Fauno i visawavenena Guyau yana kafa visime fasinei. Nuwabuni i vibutuwa eketa i niiya kana nivaniva i nuwabuna. Mosese yana visime eketa Guyau yana tomatakawa yasi viginiwa nenesiyai i misinivikavina. Nuwanuwana Yeisu fasinei nuwatasi ina kaniya be sina vitumaḡaniya.

²⁴Tunisi namoḡa Fauno yana nusifufu nuwatasi i oviya eketa si vitumaḡana, eatu tunisi o muka.

²⁵Na nenei tututausi sinesiyai amanamanagibu nakasina eatu muniyai yo sita kafiyauyauna, Fauno yana bwadu kafa nusafu i venisiya i bwaduwa, “Kanunu Tafutafuna bwadu kana venemokena nenei tomatakawa Aiseya i veniya eketa waḡawaḡami i nusifufuwisiya i bwaduwa.

²⁶‘Kuna niya tauḡu ya sabu Isineni nenesiyai eketa kuna iyavisiya kuna bwaduwa, “Naki kwa vanevaneneḡa eatu muka nuwatami ita mayemayesiya. Naki kwa tonetoneya eketa ibasima Guyau i fufufunisiya kwa kitikitisiya, eatu kasi nuwanuwa muka nuwatami ita mayemayesiya.

²⁷Nofe namoisima muka nuwatasi ita mayemayesiya uḡuna katekatesi i fakina. Na taniyasi eatu avana si vanevaneneiya o muka sita nowanowaniya, matasi si kinoḡowa uḡuna muka nuwanuwasi sina kita. Taki nuwanuwasi fonaku sina muniiya, nao matasiyai sina kitikuwa eketa taniyasiyai sina vaneneikuwa, yota nuwatasi ina mayesiya ebe kamo sina ugevinisiya yasi fufunagoyo nenesiyai ebe ana givibwinisiya.”’

²⁸Kwami Fiyao Diu o muka bwadu kana venemokena kwata vanevaneneḡei, na fasinei nuwanuwaku kwana sanamaniya vitana Guyau yana gifafafana kana matakawa, naki i vininitiya Kani Kwauna nenesiyai ebe tasike sina vaneneḡa.”

³⁰Fauno yana numa si veniya eketa i fatafatiya, eatu nokomai manamana nuwesi i fakwiiya. Namoḡa matatafusi i katukatuvisiya tovanama si nenemiya kana venufota fasinei.

³¹Na yana katevatu eketa katekatena matatafunei biga dewadewana i nunumamaniya Guyau yana kafa visime, yota Tuveka Yeisu Togifafafana Gigibokeinana fasinei i vivisawavenena, eatu muka tamo kana sawatana.