Slg 28:22-31

²²Ta kumay aŋni ta snaŋtá skwi ta ndanu kagha ka ghəŋa gha nda ma wa gha. Skwi ya snaŋ aŋni ná, nda ndəgha gwal ta pgha rutsak ta na lfiɗa dina ghuni na,» ka həŋ.

²³Ka tsaftá həŋ ta sana fitik tama ŋa gwayavata taŋ. Baɗu tsa fitik ya, ka sliʼaftá ndəghata həŋ ka lagha slanaghatá Pwal ma vla nzakwani. Ka zlraftá Pwal ta paslay, ka mnay ŋa taŋ ta gwaɗa ta ga mgham Lazglafta, daga gasərɗək, ha tekulemes fitik, ŋa tɗakta ghunislaka taŋ ta ghəŋa gwaɗa ta Yesu. Ka mnə tsi ta gwaɗa ma deftera zlaha Musa, nda ya ma deftera la anabi, ŋa taŋ.

²⁴Ka ksaftá fəlma sanlaha ta tsa gwaɗa ta mnə tsi ya, ta kwalaghutá sanlaha ta tsuʼafta ɗekɗek.

²⁵Ka traptá həŋ ta dzraftawi ka skwa turtuk, ka gazlə heŋ. Ka Pwal nda həŋ mantsa: «A ta ŋa Sulkum nda ghuɓa ta mnay ŋa dzidzíha ghuni nda ma wa anabi Isaya kazlay:

²⁶“La da slanaghatá na mnduha na, ka ka nda həŋ na: Dzaʼa nda sna kuni nda sləməŋa ghuni, ama tsatsafta a kuni ɗekɗek wa. Dzaʼa nda ngha kuni nda ira ghuni, ama tsəmafta a kuni ɗekɗek guli wa.

²⁷Nana mnduha na ná, təŋtəŋa ghəŋa taŋ. Dərzliŋdərzla həŋ ta sləməŋa taŋ, hahafhaha həŋ ta ira taŋ, kabga vaʼa həŋ ta nghaŋta nda ira taŋ wu, va a həŋ ta snaŋta nda sləməŋa taŋ guli wu, da lamə tsi da ŋuɗufa taŋ, da mbəɗaktá həŋ ta vgha tvə iʼi, da mbanafta yu ta həŋ kəʼa ya kay.”

²⁸Ala wya tsi tama, ghunafghuna Lazglafta ta na Lfiɗa Gwaɗa na da gwal kul nzakway ka la Yahuda. Hahəŋ, dzaʼa snay həŋ,» kaʼa.

²⁹Kɗakwa Pwal ta mnatá tsa gwaɗa ya, ka gazlaghutá la Yahuda nda zlərɗay mataba taŋ.

³⁰Ka zatá Pwal ta vaku rəŋ rəŋ his ma tsa həga ta plə tsi nda pla ya. Ta tsuʼay ta inda mndu ta lagha slanaghata hada guli.

³¹Pyaf a lu wu, ka mnə tsi ta gwaɗa ta ghəŋa ga mghama Lazglafta. Ka taghə tsi ta skwi ta ghəŋa Mgham Yesu Kristi, haɗ sana skwi ta gurtsaŋta wa.