Aposel 28:22-31

²²Ma doŋtom yêlô ayala nena loŋ nômbêŋ intu sapêŋ ma avômalô enaŋ abô kambom hathak loŋôndê nênêmimbiŋ Yisu. Ba intu yêlô leŋiŋhaviŋ nadaŋô anêm auk nena honaŋ aisê hathak loŋôndê êŋ.”

²³Êŋ ma etak wak yaŋ ek nesak doŋtom imbiŋ yani. Wak êŋ hayô ma avômalô Islael bêŋ anôŋ êyô unyak atu ba Pol hamô. Lôkbôk hi aleba bôlôvôŋ ma Pol hanaŋ abô hadêŋ thêlô. Ma hik Wapômbêŋ anêŋ loŋ lôkliŋyak anêŋ ôdôŋ thô hadêŋ i. Ma hik iniŋ auk liŋ hathak Mose anêŋ balabuŋ lôk plopet iniŋ abô ek thêlô nênêmimbiŋ nena Yisu ma Mesia atu.

²⁴Ma thêlô doho êvhaviŋ abô takatu ba hanaŋ ma doho ma mi.

²⁵Ma thêlôda enaŋ abô lôk vovak ba evak i vose hi ôdôŋ ju. Ba idum ek ini ma Pol hanaŋ abô te haveŋ yam nena, “Lovak Matheŋ bôk hanaŋ abô avanôŋ hadêŋ libumi halôk plopet Aisaia ba hanaŋ aêntêk,

²⁶“‘Nu êndêŋ avômalô takêntêk ba onaŋ êndêŋ i nena, “Wak nômbêŋ intu ma tem nodaŋô abô, ma doŋtom tem miŋ hatôm noyala anêŋ ôdôŋ ami; Ma wak nômbêŋ intu ma tem ôŋgô nômlate, ma doŋtom miŋ hatôm nôpôm anêŋ ôdôŋ ami.”

²⁷Ek malê nena avômalô takêŋ iniŋ auk ma thekthek, ma ibi leŋiŋôndôŋ siŋ, lôk ivuliv maleŋiŋ siŋ. Ma mi, ma tem nêgê tak esak maleŋiŋ, lôk nedaŋô êndôk leŋiŋôndôŋ, lôk neja ênjêk iniŋ auk ma tem nede kapôlôŋiŋ liliŋ ek yandum thêlô ba nimbitak mavi.’

²⁸“Aêŋ ba noyala katô nena Wapômbêŋ hêv anêŋ abô hathak anêŋ bulubiŋ hadêŋ avômalô loŋ buyaŋ ba tem thêlô neja thô.”

²⁹Pol hanaŋ abô êŋ yôv, êŋ ma avômalô Islael etak yani ba i. Ma êkôki hathak anêŋ abô takatu.

³⁰Hatôm sondabêŋ ju ma Pol hamô unyak atu ba yanida hêv vuli ma hawa avômalô takatu ba êlêm ek nêgê yani thô lôk lamavi.

³¹Ma yani hamiŋ lôklokwaŋ ma kô mi ma hanaŋ abô hathak Wapômbêŋ anêŋ loŋ lôkliŋyak ma hadôŋ avômalô hathak Anyô Bêŋ Yisu Kilisi. Ma anyôla miŋ hamiŋ yani loŋ siŋ ami.