Asuki 28:22-31

²²Shegai tsa ciga ta̱ tsu pana ili iꞌya iꞌa̱ri a katakasuvu ka vunu, kpaci ili iꞌya tsu revei a kaci ka kaɓolo ka savu ka na ki iꞌya ko nte wa a ka dana ta̱ ukuna u cingi a kaci ka ne.”

²³A zuwai kain ka a ka tuwa̱ a gawunsa n eyi a asu u ɗa u cipa̱i vi. Kain ki a tuwa̱ ta̱ ushani. Ili iꞌya i bidyai usana hal ubana kuvuli, Bulus wa̱ri udansa n ele ukuna u tsugono tsu Kashila̱. U yan ta̱ manyan n Mele ma Musa n Itagara̱da i Ntsumate. Wa moɗono tsa̱ra̱ u rono le utuwa̱ a asu u Yesu.

²⁴Aza roku a wushuku ta̱ n ili iꞌya u danai, aza roku tani wa.

²⁵Aku aꞌa̱ri kananamgbani ubana n ugono utyoku u le, aku a gita̱i ulaza̱sa. A makorishi, Bulus danai, “Kulu Keri ku dana ta̱ mai an ku yain kadyanshi a una̱ u Ishaya matsumate, an u tonukoi isheku i tsunu,

²⁶“ ‘Ba vu tonuko ama a va̱, Ya pana ta̱ kadyanshi ka va̱, shegai ya reve wa. Ya wene ta̱, shegai ya reve kalen ka ne wa.

²⁷Kpaci atakasuvu a ɗe a gbama ɗe, a votsuku ɗe atsuvu a ɗe, a kimba̱ ɗe aꞌeshi a ɗe. Tsa̱ra̱ i wene n aꞌeshi a ɗe wa, i pana n atsuvu a ɗe wa, kpam i reve n atakasuvu a ɗe wa. A da baci nala wa, iꞌa̱ri ya kpatala ta̱ utuwa̱ ara va̱ aku n ta̱na̱sa̱ ɗa̱.’

²⁸“Adama a nala, ma ciga i reve, alabari a iwauwi a nala yi a asu u Kashila̱ u ɗa a wuta̱i hal utuwa̱ a asu u Awulawa, kpam alya a ka wusha a ɗa.”

²⁹An u danai nala, aku aza a Yahuda a ꞌya̱nga̱i aꞌa̱ri uyan kananamgbani utyoku u le.

³⁰Bulus dusuku ta̱ a kuwa ka wa tsupusa ikebe hal ayen a re n u wushi gba̱ uza ɗa baci dem u tuwa̱ yi uwene.

³¹U yain kuɓari ku tsugono tsu Kashila̱ bawu uwonvo, n u wenishiki ama ukuna u Yesu Kawauwi Asheku, kpam uza u ɓishinka yi wa.