Dad Nimò 28:22-31

²²Kabay kayèmi fanlinge ku tan i mnè di nawam, du gadèmi nun dad to di kdee banwe dmuen i fnaglut gumaginam.”

²³Taman nun kasbangla stifun du fanlingela Fol, na di duh i kasbangla, dee fa dad to salu di gumnè Fol. Na fandà flafus kel butang faglabatan na tdoan gablà di kagot Dwata. Too kenen fgal tamdò gablà ku Dyisas mdà di dad flalò blé Dwata fagu di ku Mosis na i sulat i dad tugad Dwata, du fye faglut ale.

²⁴Na nun dademe di dale faglut mdà di gman Fol, bay dademe là mayè faglut.

²⁵Na baling ale sdal di kdàla. Kabay di là ale fa mdà, man Fol, “Too glut i gman i Mtiu Tulus di dad gutambulyu fagu di tugad Dwata Isaya, manan,

²⁶‘Salu ge ditù di dad to, na ani manyu di dale, Balù nun lingeyu bay knean landè kaglabatyu, na balù mite gamu, bay i teenyu làyu dilè.

²⁷Du i dad to ani mbaling mgal i ulula. snafangla i klingela, na fnidangla matala, du fye là ale mite, na là ale mlinge, du ken ale gamlabat i kaglutan, na fakay ale msal, na falwàgu ale di dad salàla.’

²⁸“Taman fye tooyu gadè i kagalwà mdà di Dwata takel di dad to ise Dyu, du ale i mayè flinge.”

²⁹Na di kafnge Fol man ani, mdà i dad Dyu, na sdal ale gablà di gmanan.

³⁰Lwe fali klo Fol mnè di gumnè ndeman, na dnawatan i kdee dad to mlauy kenen.

³¹Na too nun klabè i nawan na landè gablabal di katdoan gablà di kagot Dwata na i kaglut gablà di Amuito Dyisas Krayst.