Buka Linge 76:1-12

¹Vania na tinoni gehe linge: linge kolua na lei ghalo ni gougonu. Na linge nina Asaph A God tara ghilala i Judah. Mara holohabaa na ahana rana Israel.

²Na komuna i Jerusalem. Me ghahaa tana ghotu i Zion.

³Agaia te goat sodui didira na lei kuali rana ghana levunimate. maia didira tako mana isi mana lei totobo ni veitotoghoni.

⁴God, Ighoe to rongoragha, mo vunaghi haba! tana bona to oli mai tana lei ghotu. Iga to laga vulera ghamua na kana.

⁵Ma didira na lei malaghai laga tara sagu keha kolui didira na totobo: Mara matera tua me taho tua siki sakai ke ghoi kokoe vanighai mai taeni.

⁶Ighoe God ta Jacob tana bona to pasara: A gaira tara haehaghe i vuvungadira na horse tara tumu horu mara mate.

⁷Ma keri te vaghaa ge subo tara mataghu nigho ighoe Lord, me taho siki sakai ke tughuru tana matamu tana bona to rutu.

⁸Mi ghoe to ladavaghinia nimua na bosa ni dete mai kokou, vania ghamua na kana, Mana maramana te mataghu me beto tana matamu.

⁹Tana bona to detera tara tangohahi hahi mo hangara tara vahaghitaili tana maramana.

¹⁰Na rutu ni tinoni te liliu ni holohaba vanigho ighoe Ma gaira tara vola tana kisumate kara pangotia nimua na bongi ni savukolu.

¹¹Kau va hea na Lord nimiu God na hava tau nia baubahu kau dolovia nia ma kau vaa hea nimiu na hevei oli, ighau na lei kema tau dutuvia.

¹²God te nera na lei tinoni ge kara talumava; Me nera na lei dalei vunaghi haba ge ra talumurira mara mataghunia na lei vunaghi haba ni maramana talighu.