Salmos 76:1-12

¹Zaj núnbea benne' Judá ca' Dios, na' ládujla benne' Israel zrente̱ nácaqueze La Le̱'.

²Lu xe̱zre Salem zua lataj lá'azxa chee̱'. Lu xe̱zre Sión zua naga zúaqueze̱'.

³Lataj na' gudíchaje̱' xaga nalá xéche'ze ca', ne xia da dxucu'uj na benne' lu wedil-la, ne ca naca da dxuluchínene̱' lu wedil-la.

⁴Benne' xabáa nacu' Lue', ne Benne' wál-ladxa ca xi'a zri'a ca'.

⁵Xeajlechaze benne' wal-la ca', ne guláse dínnaje̱'. Netú benne' wal-la ca' quebe belexechisa ne̱'e̱ chee̱ xelune̱' wedil-la.

⁶Dios chee̱ benne' Israel ca', gate gudil-lu' benne' ca', guláse dinnaj bzrina' ca', ne benne' gulebíe̱'-ba'.

⁷Nacu' Lue' Benne' zrébedxu. ¿Nu benne' gaca se̱' lau Lue' gate dxezra'u?

⁸Xabáate̱ gunná'u, na' guchi'u chee̱ bénneache. Dxelezrebe bénneache lu xe̱zr la xu, na' dxelebeze̱'

⁹zra seu' Lue', Dios, chee̱ guchi'u chee̱ bénneache, ne chee̱ guseláu' xúgute̱ benne' dxexruj lazre' zaj zre̱'e̱ lu xe̱zr la xu.

¹⁰Da líqueze xel-la' dxelezrá'a chee̱ bénneache gaca na tu da gucá'ana szren na Lue'. Guzúa zriu' xel-la' dxelezrá'a chee̱ bénneache zaj nagá'ane̱'.

¹¹Le che̱be lázrele da gunle chee̱ Dios, na' le gun da na' chee̱ Xránadxu, Dios chee̱le. Xúgute̱ benne' zaj zre̱'e̱ du gabi'ila xelelé̱'e̱, na' xulunézruje̱' da zaj nu'e̱ chee̱ Dios, Bénnea' dxezrébedxu.

¹²Guzague̱' da xu'u lu xichaj lázxdau benne' blau ca'. Le̱' dxuchebe̱' benne' wenná bea ca' zaj zre̱'e̱ lu xe̱zr la xu.