Buka Linge 73:5-22

⁵te mua kalera siki gunaguna, mara mua sodoa na vola te vaghara na balu.

⁶Te haghavira na talunagho na tobadira, mana haurake te saopoa na voladira.

⁷Tana tobadira te va rughu horu mai na dika. mi tana liodira tara nighi viri na lei ghanaghana te mua marabu.

⁸Ma gaira tara kia haghinira na vure, mara bosa dikalara, Na talu nagho te nera ge ra dikalara na balu vure.

⁹Ma gaira tara bosa dikalaa God i kokou: mara bosa ke, ma gaira tara vunaghina na maramana talighu ghua.

¹⁰Keri vaho ge a nina vure God tara vuha ririu vanira, Mara lioni ngangata na taluutuniani na lei totobo tara bosai vanira

¹¹Ma gaira tara bosa, “Ke mua ghilalai God na hava ta gonighi. Gaia na puku ni haba ke mua kenei.”

¹²Keri tara ghaghua igaa rana dika: “te uto vanira so na vola, me sule so didira na lologho”

¹³E taho na pukuna tu mata reireia na kabu uto. Mu mua gonia siki totobo te hahi.

¹⁴God tana dani udolu to neu ge ku kabu vahaghitaili, Mo neu na totoro tughu puipungi.

¹⁵Ma ge Inau ku bosai na lei bosa raeni ke: Mi nau tu perora vamua na lei kulamu na vure.

¹⁶Keri ke ge inau tu tabotabo na kene ghanaghana na hava na pukuna ge ra tangomana na vure tangohahi. hauva ka, me vahola ngangata vaniu ge ku ghilalaa.

¹⁷Mi ta sakai bongi vaho tu va haghe ta nimua na vale tabu, keri vaho ge ghilala na hava ke kalera na vure tangohahi raeni.

¹⁸E utuni, Ighoe to talura tana halautu te madali, mo nera ge ra turi dororo tana tigetige mara tumu pari haia.

¹⁹Na viti tua mara dudura horu: na mataghu te nera ge ra haurake.

²⁰Na voladira te vagha na maturu bole vamua: to rarai tana puipungi mo nia ponolio tua.

²¹Me vaho ge u ghanaghana olia ivei te vagha na dikaagu inau. Ivei te vagha na vahaghitaili tu righighi mai tua tana bona tu ghahau iga.

²²Inau tu bule mu vatei sikagha, mi nau te vaghau na maumanu te mua manahagha itamua.