Buka Linge 31:6-23

⁶U mua liodira ara hei tara holohabara na lei titinoni na pukuna tu ghanaghana kodo tatana Lord.

⁷E sule ngangata nigua na togotogo na pukuna nimua na dolo te tona haliu so, mo righighi na lei nigua na vahola.

⁸Mo mua lubatiu va tadira ghagua na levunimate mo laviu va so tana bona te tatavahale.

⁹Ko aroviu, ghe Lord, na pukuna tu ghau tana vahola na matagu te kukurodo na pukuna na kolobu ni matagu, na huligu mana tarungagu tara labe.

¹⁰U nia tangi na dika lio, na niulugu te kukulua nigua na dika lio.

¹¹Ghagua na levunimate tara batobatou, ma rana ghagua kulagu na komukolu tara pasapasau, ma sughua rana kulagu tara mataghu na mai dutuviagu

¹²Ra righiu vaghau tu mate vagha na popo te taboha.

¹³Na lei kokoe tu rongovighi tara nei vaniu me talighutiu na hava te mua uto. Ghagua na levunimate tara mua liogu, ra kenea na mateagu.

¹⁴Lord inau tu ghanaghanagho so, Ge u bosaa. “Ighoe nigua na God.”

¹⁵U talua tana limana ivei ku ghoi ghaghua mai ko volau tadira tara mua liogu.

¹⁶Lubatia nimua na veiarovi ke hinaria nimua na tinoni lutu, nia nimua na dolo ke volau

¹⁷Lord, ko bei lubatiu ge ke vatei aroviagu, mu hologho so ge ke hangau, mo ko nera tara dika ge ke vatei aroviadira ma kara koli tana gilu vaghara na tinoni mate.

¹⁸Na ghidudira te sori ke todore, gaira tara talunagho mara hurura na maemane ke bei bosa na hava.

¹⁹E sule ngangata nimua na lutu. O talu dila nimua na vauto vanira tara talu mavagho mo gonia vanira na hava tara mai tamua, mo ko vautora tana maramana eni.

²⁰Mo polara sarana nimua na malei righitaoni tadira tara mua liodira. ko polora sarana nimua na malei righitaoni sagauvira na manga tara hurura nia

²¹Holoutoa Lord, te tatea nina dolo vaniu, te righitaoniu tara suravia na komugu.

²²Nigua na mataghu, tu ngangaraha dato vania ra pusi kehau tatana Lord Hauva mo rongoviu so nigua na tangi ni veiarovi, me bosa tughuna nigua na hoholo ni hahanga.

²³Kau dolovia Lord ighau rana maemane pile. Ma Lord ke righi taonira tara varava ngasi tatana na pukuna ara hei tara mua varava ngasi tatana ke torora.