Godigo Nogi Ugwaba Sabo Tęąbi Po Wabo Buku Dabe 31:6-23

⁶Nago te tibo god dabede lotu wabo bidi dabe te wei mu me isiąwai. Tiali goli, eno konealubo homu nageba dąų wali.

⁷Nago ena sesemane sogo homu dene yai, tama tiyu eno nageba wiegi yai homu pemene ebao. Nago eno te sęgę suali, tama nago enaba te pedalubo dwai ebo kolesaga te koneanio.

⁸Nago ena te boi bidi dabego kalabus emainu me ebeo. Nago ena bugagia tau siyu, tama ena te dwagi yai madigi bugagia bidibao.

⁹Genuai Bidi, nago te olo tau sabo wiegi yai kolesaga enabolo yao. Ena te genuai sęgę elalubao. Ena gela hauwa weyu, tama eno gedu bo dalio. Eno dili dabe te bomo kimi meni yani.

¹⁰Te ena haliga sęgęgo digi ena bidabo ula pęwadage ilali. Ena gela mu udu gebaso, tama tiyu, te ena sesabi elama me bidigobeo. Eno genuai sęgę mu elalubao, tama tiyu, eno bomo silalio, tama eno dili tigidali dolobo sę ebao.

¹¹Te boi bidi dabego dwai posobo po enaba wali. Tama tibaso, te abagi dabego me enaba po dwai weyu, tama eno abagi dabego enade dwai wi mu yali. Ena te sunumidu pobadi, te bidi dabego ena sulama, augwali wi peyu ebo dao.

¹²Tigidali bidigo ena homu kone ebo tagalali, augwaligo te isai bidi homu kone isiąbo tiwai gilama yalio. Ena te tǫgo nigali sospen sene alua pobaso sąbo tiwai gilama yai.

¹³Eno odali, te boi bidi dabe hauwago ena posobo po odali. Augwaligo ena moni wi ilali. Tama augwa deliba sisinama, tama enaba dwai sę yabo po mia sai. Augwaligo ena ela muabo po wai.

¹⁴Tiali goli, tagalao. Genuai Bidi, eno konealubo homu nageba dąų wabo da. Eno te tama wali, nage eno God da po wai.

¹⁵Ena nago nogode sesemane sogo bidibao. Nago enade te boi bidi ebo bidi me, te ena pobeasa bilibo bidi dabego nogode ma dobola sao. Tiyu, augwaligo ena dolidalio.

¹⁶Ena nago sę bidi da, nago olo tau sabo wiegi yai kolesagago ena tau sao. Nago ena godolo mu ebo kolesaga te siligobeo, tama tiyu, nago ena ma sao.

¹⁷Genuai Bidi, eno nageba i wabo, te nago ena tau somainu obao. Nago ena te boi bidi dabego aiyaba elalumainu me igio. Tiali goli, te boi bidi dabe da, dolomainu yao. Augwali isimainu elama, tama augwa pedauwali te isibo bidi dabego pesagede pania sai elalumainu yao.

¹⁸Te bidi dabe augwaligo te hagoma eyu, te posobo po weyu ebo da, tama doloba pai bidi dabeba po dwai weyu ebo dao. Augwaligo tibo po naga wabo da. Nago augwali dolama, tama augwa pedauwali te mu pania somainu yao.

¹⁹Nago te nage dologode bidibo we bidi olo tau sabo wiegi yai kolesaga hauwa tolalubo dao. Nago te nageba konealubo homu dąų wabo we bidi bugagia tonalubo dao. Nago te augwali tau sabo te tigidali we bidi gedude umabo mu ebo dao.

²⁰Nago te konealubo homu dąų wabo bidi dabe te nage pąba geme dualubo dao, tama te augwali elainu te po mia sali bidi dabe, augwali usu me egobeo. Nago te nageba homu kęą pabo bidi dabe geme bugagia dualama, tama te boi bidi dabego tibo po kisilibo po wabogo te augwali aiyaba me elalugobeo.

²¹Genuai Bidigo nogi ugwaba sao. Agai enaba dwagi yai sę umabo mu elama, tama agai ena tau sabo wiegi yai sę yali, te boi bidi dabego ena pobeasa biliyu, dolainu yali sogo te ena tau sai.

²²Genuai Bidi, polobadu ena wi mu elama, tama eno homugo te nago ena sela sąyu, tama ena nage pąde ma bidigobe homu yalio. Tiali goli, nago eno gela wabo odoyu, tama nago ena tau sali, te eno nageba i olama, enade homu dene eyu, tau sao po wali sogo te tama tiai dao.

²³Te Godigo we bidi dabe, dagego aga wei eyu, godolo mu yao. Agai te aga wali asobo we bidi dabe bugagia tonalubo da. Tiali goli, agai te hagoma ebo we bidi dabeba te dwai dene dolo wei ponobo dao.