SALAMO 31:6-23

⁶Dirava koikoidia laulaudia e badinadiamu taudia na inai henidiamu; a Iehova na abidadama heniamu.

⁷Lau baina moale, emu hebogahisi baina moalelaia; badina be egu hisihisi vada o itaia, egu hekwarahi vada o haeroa;

⁸lau inaigu imadia ai so negegu, a lau aegu na taora bada gabuna ai vada o atodia.

⁹Iehova e, ame bogagu hisi, badina be hisihisi ese a gugubagumu, taitai ese matagu e hadikamu, laumagu bona tau-anigu danu e dikamu.

¹⁰Badina be egu mauri na lalo-hisihisi ai e oremu, egu mauri laḡanidia na ḡanaḡana ai e oremu; egu goada na e oremu, egu kara dika daidiai, bona turiagu na e mamano.

¹¹Inaigu iboudiai ese e dadaraigumu, dekegu taudia ese e dadaraigu hereamu, turagu ese e gari henigumu, ariara ai e itagumu taudia ese e heautanigumu.

¹²Taunimanima ese vada e lalogu boio, mase tauna na heto; lau na uro makohina na heto.

¹³Oibe, hutuma edia hemaunu na kamonaimu, kudou hetaha na kaha iboudiai e miamu. Idia ese e henega heboumu, lau ihadikagu totona, egu mauri iabi-ohona dalana e tahuamu.

¹⁴Iehova e, lau oi na abidadama henimumu, na tomu “Oi na egu Dirava”.

¹⁵Egu nega na oi imamu ai; lau inaigu bona e daḡedaḡe henigumu taudia imadia amo ba hamaurigu.

¹⁶Oi vairamu ese emu hesiai tauna baine hadiaria; emu hebogahisi ai ba hamaurigu.

¹⁷Iehova e, hemarai ese basine abigu, badina be oi na hahanemumu; kara dika taudia na bae hemarai, asi reḡereḡedia na mase taudia edia gabu baela.

¹⁸Koikoi taudia bibinadia na bae mu; edia heaḡi ai bona edia hedadarai ai kara maoromaoro taudia bae ihi-ihiraidia taudia na ududia bae hahekapu.

¹⁹Emu hahenamo na bada herea, o abia heḡaeḡaemu, oi e gari henimumu taudia edia, bona o karaiamu, oi metaimu e heau heniamu taudia edia, taunimanima natudia vairadiai o karaiamu.

²⁰Oi metaimu ai o hunidiamu, taunimanima edia hedibaḡani karadia amo o hunidiamu; emu kalaga ai o naridiamu, badu taudia maladia amo o gimadiamu.

²¹Iehova aina hanamoa; badina be ena hebogahisi na egu ai vada e hahedinaraia, hoa ḡauna na heto, e heḡeḡe dae hanuana lalonai e kougu ahu negana ai.

²²Egu gari ai nato “Oi vairamu amo na henege daure”. A oi ese egu noinoi o kamonai, na tai henimu negana ai.

²³Iehova ena helaḡa taumui e, ia ba lalokau henia. Iehova ese kamonai taudia e hamauridiamu, a heaḡi karadia e karamu taudia na davadia e henidiamu.