Buka Linge 143:1-11

¹Nina kokoeliulivuti David. Lord, ko rongovighi mai nigua na kokoeliulivuti, mo ko holopangotighi tu kurutigho mo ko bosa tughui vaniu mai, na pukuna nimua na lio kikinima mana maemane.

²Bei lubatia nimua na tinoni lutu tara tabotabo, taho ahei ke maemane tana matamu.

³Na ghagua na levunimate tana ghuru, me labu horu tana pari me neu inau, mu ghahau lokana na pungi, vaghara gaira tara ghahara lokana na gilu.

⁴Na lei ghanaghanagu soko te totobo lee vamua, mu nia sosoko ni labu tua na matagu.

⁵Inau tu ghanaghana olighi na lei bongi idania, mu kene olighi na lei nimua na lutu te haeharegha, tu ghanaghanai nimiu na lei gehegehe te sule.

⁶Inau tu mamangaha mu kene taonigho, te vagha na pari mamaha te haga inu, te liona na kolobu ni uha ge ke vaa malobua.

⁷Lord, mina, mo ko mai, mo ko bosa tughu, na pukuna nigua na vahola te sule ngangata, ko bei saniu ku mate gea.

⁸Tana puipungi ko lubatiu, ge ku varongohia nimua na dolo, te mua soko varangagu, ko tughunitatea vaniu mai na halautugu, inau tu mai tana matana ta nigua na kokoeliulivuti.

⁹Ko volau ghe Lord, itadira ghagua na levunimate, Inau ku sama kodo tamua ge ku vola.

¹⁰Taraiu ge ku taonia na liomu, ighoe nigua na God, ge nimua na tarunga ni utuni ke uhuliu tana halautu te kaekage.

¹¹Ghe Lord, na rongoraghana na ahamu, ku nia vola, ma nimua na maemane ke lavi kehau tana sosodo eni.