Aisea 1:7-29

⁷Fanüemi a tala, nge ämi telinimw ra karala. Chon ekis ra mongö uän fanüemi fän mesemi. Iwe, fanüemi a ta usun chök eu fanü chon ekis ra ataela.

⁸Iwe, Jerusalem chök a chüen nonom usun chök eu telinimw sounfiu ra pwelifeili ren pisekin maun. A apwangapwang usun chök apwangapwangen eu likachoch lon tanipin wain ika eu likachoch won tö.

⁹Are ewe Samol mi Unusen Manaman esap amanaua ekoch leich, sipwe usun chök chon Sotom me chon Komora.

¹⁰Jerusalem, om kewe samol me aramasom kewe ra usun chök chon Sotom me chon Komora. Oupwe rongorong alon ewe Samol mi Lapalap. Oupwe aüselinga mine ach we Kot a mochen aiti ngenikemi.

¹¹Ewe Samol mi Lapalap a apasa, “Met lomoten ämi achomonga asoren man ngeniei? Üa ku ren ämi asor ngeniei ätemwänin sip me kirisin man mi öümanau. Üsap pwapwa ngeni chan ätemwänin kow me sip me ätemwänin kuuch.

¹²Iö a pesei ngenikemi pwe oupwe uwato ekei asor, lupwen oua feito pwe oupwe fel ngeniei? Iö a pesei ngenikemi pwe oupwe pusüngüsüng lon imwei imwenfel?

¹³A lomotongau ämi uwato rei ämi kewe asor. Ämi apach mi pwokus a fokun anioput me rei, nge ämi chulapen popun maram me ränin sapat me chulap mi pin üsap efich, pun meinisin ra ingau ren ämi tipis.

¹⁴Üa oput ämi chulapen popun maram me ämi chulap mi kefilitä ren unusen letipei. Ra aweiresiei, üsap chüen mochen ar repwe fis.

¹⁵Lupwen ämi oua aitietä pöümi le iotek, üsap nenengenikemi. Nge lupwen oua fen kapaspat lon ämi iotek, üsap fokun aüseling, pun oua lepöücha ren ämi niela aramas.

¹⁶Oupwe limetikemi pwe oupwe limöch, oupwe pöütala ämi föföringau seni fän mesei o ükütiu le föri mine a ngau.

¹⁷Iwe, oupwe kaiö föföröch o kütta pwüngüöch, nge oupwe epeti angangen chon mwänewüs. Oupwe peni chokewe mi mäsen, oupwe pwal alisi ekewe fefin mi mä pwülüer.”

¹⁸Iei alon ewe Samol mi Lapalap, “Ou etto, ousipwe pwüngüpwüngfengen. Oua limengau ren tipis usun eman a limengau ren cha. Nge ngang üpwe limetikemi pwe oupwe limöch usun pwechepwechen sno. Inamwo are oua limengau usun mangaku mi fötöpwül, oupwe fokun limöch.

¹⁹Are oupwe achocho le aleasochisiei, oupwe mongö seni öchün uän ewe fanü.

²⁰Nge are oua lükümach o ü ngeniei, oupwe mäla lon maun. Ngang ewe Samol mi Lapalap üa kapas.”

²¹Ewe telinimw mi pwüng me lom a usun chök eman fefin mi föri föförün lisowu. Me lom aramas mi pwüng ra imweimw lon, nge ikenai chon niela aramas ra choni.

²²Jerusalem, me lom ka wewe ngeni silifer, nge iei ka ngününgauan chök. Ka wewe ngeni wain mi mürina, nge iei ka koluk echök.

²³Om kewe souemwen ra wiliti chon pälüeni mwü, ra pwal chiechi ngeni chon solä. Ir meinisin ra sani lifangen amichimich, ra pwal tipemong won lifang. Resap peni chokewe mi mäsen lon kapwüng, resap pwal alisi ekewe fefin mi mä pwülüer.

²⁴Iei oupwe rongorong mine ewe Samol mi Unusen Manaman, ewe Koten Israel a apasa, “Ngang üpwe atoto ai song womi, ämi chon pälüeniei, üpwe pwal ngenikemi chappen ämi föför, ämi chon oputaei.

²⁵Ngang üpwe apwüngükemi, üpwe limetikemi usun mächä a limelim ren ekkei, pwe meinisin mine a ngau lomi epwe imwüla senikemi, üpwe pwal angei senikemi ämi limengau.

²⁶Iwe, üpwe atosefälielong ämi souapwüng me souemwen lon wiser usun chök ätekewe me lom. Mürin, Jerusalem epwe iteni eu telinimw mi pwüngüöch me allükülük.”

²⁷Jerusalem epwe ngasala ren apwüng o aramasan mi ekieksefäl repwe ngasala ren pwüng.

²⁸Nge ekewe chon ü ngeni Kot me chon tipis repwe rosola meinisin, chokewe mi likitala ewe Samol mi Lapalap repwe mola.

²⁹Oupwe säw pokiten ekewe irä ook mi pin oua pwapwaiti le fel ngeni, oupwe pwal mitingau ren ekewe tanipi oua filätä pwe oupwe fel ngeni ämi uluulun anü lon.