Ɩsɑyii 1:7-29

⁷Pǝ kpiisɑ mǝ tɛtʋ nɑ kɔkɔ nyɑɣɑ mǝ ɑcɑlɛɛ. Kpɑɩ nyǝ́mɑ wɑkǝlǝɣɩ mǝ tɛtʋ nɑ ɩ́ nyǝnǝɣɩ. Pǝ wɑkǝlɑɑ kɛ́ ɩsɩɩ wɑɑtʋ wei nyɩɩtʋ tɑɑ nyǝ́mɑ kɑ kɔmɑ tɔ.

⁸Yosɑlɛm kɛ pǝ kɑɑsɑɑ ɩsɩɩ cokǝle kɛ kɑɑmɑ tɑɑ. Yɑɑ cɑŋʋɣʋ kɛ tɩɩŋ wei pɑ yɑɑ sɩ lɛsɛŋ tɔ ɩ tɑɑlɛ tɑɑ, nɑ yoolɑɑ tɑmɑ-ɩ kotɑɣɑ.

⁹Ye Tɑcɑɑ Pǝ tǝnɑ pǝ tʋ ɩ́ tɑɑ kɑɑsɩ-mɛɣɛ yǝlɑɑ kɛ pǝcɔ, ɩ́ kɑ nǝɣǝsǝnɑ kɛ́ ɩsɩɩ Sɔtɔm nyǝ́mɑ. Ɩ́ kɑ wɛ ɩsɩɩ Kɔmɔɔ nyǝ́mɑ.

¹⁰Sɔtɔm ɑwulɑɑ mɛ, ɩ́ nɩɩ Tɑcɑɑ kʋyɔɣɔtʋtʋ. Kɔmɔɔ yǝlɑɑ mɛ́ ɩ́ ke ŋkpɑŋŋ nɑ Tɑcɑɑ kʋsǝsɩɩtʋ.

¹¹Tɑcɑɑ pɔɔsǝɣɩ sɩ: Pepeɣe mɑ lɑkǝnɑ mǝ kɔtɑsɩ tuutuumɑ, mɑ hɑɣɑ mǝ ɩwɑɑŋ nɑ mǝ nɑwee kɔtɑsɩ nsi kɔkɔ lusɑɑ tɔ sɩ nim. Mɑ nyǝɣǝsɑ mǝ lɑtǝcɛnɑɑ nɑ mǝ heeŋ nɑ mǝ pǝŋtʋlʋŋ cɑlǝm.

¹²Wɑɑtʋ wei ɩ́ kɔŋ mɑ kiŋ tɔ ɑwe heelɑ-mɛ sɩ ɩ́ fɛlɩ mɑ tɑɣɑ tɔɔ?

¹³Ɩ́ yele kɑwɑlɑɣɑ kɛ mǝ ɩsɔtʋnɑɑ kʋfɑmɑ ɑcimɑ tɑɑ, nɑ kʋyɛɛŋ kʋhɛɛsǝŋ nɑ mǝ kotuŋ ɑcimɑ tɑɑ. Mɑɑ cɑɑkɩ sɩ mɑ́ nɑ́ ɩsɑɣɑtʋ, nɑ kʋyɛɛŋ sɔsɔɔŋ pǝ situɣu.

¹⁴Mɑ tɑɑ kpɑɑkǝnɑ mǝ ɩsɔtʋnɑɑ kʋfɑmɑ nɑ mǝ ɑcimɑ kɛ́. A wɛ-m tǝlɑsɩ kɛ́, mɑ kɑwɑ ɑ tɔm.

¹⁵Wɑɑtʋ wei ɩ́ tɛkǝɣɩ-m niŋ tɔ mɑ kɛɛsǝɣɩ mɑ ɩsɛ kɛ́. Pɑɑ ɩ́ lʋlʋsǝɣɩ sǝlǝmǝŋ tɔ, mɑɑ nɩɩkɩ. Mpi tɔ, cɑlǝm suwɑ mǝ niŋ tɑɑ kɛ́.

¹⁶Ɩ́ sɔ́ lʋm nɑ ɩ́ lɑ́ nyɔɔŋ tɔɔ ɑsilimɑ kɛɛlʋɣʋ kɔtɑɣɑ. Ɩ́ yele mpi pǝ fɛɩ teu tɔ, nɑ ɩsɑɣɑtʋ lɑpʋ.

¹⁷Ɩ́ kpɛlǝmɩ kʋpɑntʋ lɑpʋ, nɑ ɩ́ pɛɛkɩ tɑmpɑnɑ tǝŋʋɣʋ. Ɩ́ pɑɑsǝnɑ mpɑ pɑ ɩsɛ pɑ tɔkɩ tɔ. Ɩ́ hɑ sulɑʋ kɛ ɩ tɑmpɑnɑ. Ɩ́ sɛɛnɑ ɑlʋ leelu tɔɔ.

¹⁸Ḿpʋ́ɣʋ́ Tɑcɑɑ tɔmɑ sɩ: Ɩ́ kɔɔ nɑ mɑ́ nɑ-mɛ tǝ ciiki. Ye mǝ ɩsɑɣɑtʋ sɛɛwɑ ɩsɩɩ tɔɔlʋm, tɩɩ hʋlʋmɩ ɩsɩɩ kɑɣɑlʋ. Ye tǝ sɛɛwɑ ɩsɩɩ kpɑncǝŋɑ, tɩɩ hʋlʋmɩ ɩsɩɩ kpoŋkpomʋlʋm.

¹⁹Ye ɩ kɑ tisɑɣɑ nɑ ɩ́ nɩɩnɑ-m, ɩ́ kɑ tɔɣɑ tɛtʋ kʋlʋlʋm kʋpɑm.

²⁰Amɑ ye ɩ́ kisɑɑ nɑ ɩ́ kʋlǝɣɩ mɑ tɔɔ, ɩ́ kɑ́ sɩ yoou tɑɑ. Mpi tɔ, Tɑcɑɑ yɔɣɔtǝnɑ.

²¹Ɩsǝnɑɣɑ pǝ lɑpɑ nɑ Yosɑlɛm ɩcɑtɛ kʋpɑntɛ ńtɛ́ tǝ́ pǝsɩ wɑsɑŋkɑlɩ? Pǝ́cɔ́ yǝlɑɑ kʋpɑmɑ kɑ sunɑ tǝ tɑɑ nɑ pɑ́ tǝŋǝɣɩ siɣisuɣu. Amɑ nɔɔnɔɔ yʋlʋkʋlɑɑ wɛnnɑ.

²²Yosɑlɛm ɩcɑtɛ kɑ wɛ kɛ́ ɩsɩɩ liɣitee. Amɑ nɔɔnɔɔ tǝ pǝsɑ ɩsɩɩ pɔɣɔlɑsɩ. Pǝyele tɩɩ nǝɣǝsǝnɑ kɛ́ ɩsɩɩ sʋlʋm kʋpɑm, ɩlɛ nɔɔnɔɔ pǝ pɑlɑ lʋm.

²³Tǝ ɑwulɑɑ kɛ́ tɔɔ kʋllɑɑ kɛ́, nɑ ŋmɩɩlɑɑ sǝnlɑɑ. Pɑ tǝnɑ pɑ sɔɔlɑ kʋhɑɑŋ kɛ́ nɑ pɑ́ pɛɛkǝɣɩ kɑsǝyɑɣɑ. Pɑɑ pɑɑsǝɣǝnɑ ɑlʋ leelu tɔm, pǝ́cɔ́ pɑɑ hɑɑkɩ sulɑʋ kɛ ɩ tɑmpɑnɑ.

²⁴Pǝ tɔɔ kɛ́ Pǝ tǝnɑ pǝ tʋ Tɑcɑɑ wei ɩ kɛ́ Ɩsɛɣɛlɩ Ɩsɔ tɔ ɩ tɔmɑ sɩ: Mɑɑ lɛɛtɩ mɑ kolontunɑɑ, nɑ mɑ́ wɛɛnɑ tɑmpɑnɑ.

²⁵Yosɑlɛm ɩcɑtɛ nyɑ́ mɑɑ tʋ nyɑ́ tɔɔ kɛ́ niŋ. Mɑɑ tʋ-ŋ kɔkɔ tɑɑ ɩsɩɩ pɑ tɑɣɑnʋɣʋ liɣitee tɔ nɑ kɔkɔ nyɑɣɑ nyɑ́ ɑsilimɑ.

²⁶Mɑɑ mǝŋnɑ nyɑ́ hʋʋlɑɑ kʋpɑmɑ ɩsɩɩ pɑɑ wɛʋ lɔŋtɑɑ tɔ, nɑ nyɑ́ lɑɣɑtʋ tɑsǝlɑɑ ɩsɩɩ pɑɑ wɛʋ kɑncɑɑlɑɣɑ tɔ. Pǝlɛ pǝ wɑɑlɩ kɛ́ pɑɑ yɑɑ-ŋ ɩcɑtɛ kʋpɑntɛ nɑ kʋsiɣisile.

²⁷Ye Siyɔŋ nyǝ́mɑ lɑɣɑsɑɑ nɑ pɑ́ tǝŋ mpi pǝ wɛ teu tɔ, Ɩsɔ kɑ́ yɑ-wɛ.

²⁸Amɑ pɩɩ wɑkǝlɩ ɑsɑɣɑɑ nɑ pǝntǝlɑɑ, nɑ mpɑ pɑ lɔɔkɩ Tɑcɑɑ tɔ pɑɑ le.

²⁹Fɛɛlɛ kɑ́ kpɑ-mɛ nɑ tɩɩŋ wei ɩ́ luŋiɣi tɔ. Tɑwɑ wenɑ ɩ́ fɛɛnǝɣɩ tɔ ɑ kɑ́ yele nɑ ɩ́ tɔɣɔ fɛɛlɛ.